ការតាំងពិព័រណ៍ប្រកួតស្នាដៃពហុសិល្បៈឯករាជ្យលើកទី២ លើប្រធានបទ “ទឹក” នៅសណ្ឋាគារសូហ្វីតែលភ្នំពេញ

សូហ្វីតែល ភ្នំពេញ ភូគីត្រា រៀបចំកម្មវិធីការតាំងពិព័រណ៍ប្រកួតស្នាដៃពហុសិល្បៈឯករាជ្យលើកទី២ កាលពីថ្ងៃទី៤ ខែមករា ឆ្នាំ២០២៥។ ព្រឹត្តិការណ៍នេះប្រារព្ធឡើងដើម្បីលើកកម្ពស់ទេពកោសល្យស្នាដៃសិល្បៈ បំផុសគំនិតនិងបង្រួបបង្រួមសហគមន៍ ជម្រុញឲ្យមានការផ្លាស់ប្តូរសិល្បៈវប្បធម៌ រវាងសិល្បករក្នុងស្រុក និងអន្តរជាតិ។

ប្រធានបទឆ្នាំនេះ គឺ “ទឹក” ក្នុងគោលបំណងបង្ហាញពីតួនាទីសំខាន់របស់ទឹកក្នុងជីវិត វប្បធម៌ និងបរិស្ថាន រួមទាំងបញ្ហាប្រឈម ដូចជាកង្វះខាត និងការបំពុលជាដើម។ ស្នាដៃចំនួន ៦៥ ក្នុងចំណោមការដាក់ស្នើជាង ២00ស្នាដៃ ត្រូវបានជ្រើសរើសដោយគណៈវិនិច្ឆ័យដែលមានបទពិសោធន៍និងជំនាញខាងសិល្បៈវប្បធម៌ រួមមានលោកស្រី Lysine Khao លោកស្រី Adrienne Ravez លោក Casey Barnett លោក Denis Laurent លោក Charles-Henri Chevet លោក Jean Morel និងលោក Pierre Rol ។

បង្កើតឡើងដោយលោក Charles-Henri Chevet លោក Jean Morel និងលោក Pierre Rol នៅឆ្នាំទី ២នេះ កម្មវិធីការតាំងពិព័រណ៍ប្រកួតស្នាដៃ បានរួមបញ្ចូលស្នាដៃសិល្បៈជាច្រើន រួមមាន ការថតរូប គំនូរបែបឌីជីថល រួមជាមួយនឹងទម្រង់សិល្បៈប្រពៃណីដូចជា ការរចនាសិល្បៈគំនូរបែបច្នៃប្រឌិត គំនូរដោយដៃ និងចម្លាក់។

ក្នុងនាមជាអ្នកគាំទ្រវិស័យសិល្បៈ សណ្ឋាគា សូហ្វីតែល ភ្នំពេញ ភូគីត្រា ជាអ្នកឧបត្ថម្ភធំ ដោយបានចូលរួមចំណែកក្នុងការផ្តល់រង្វាន់ចំនួន ៥០០០ ដុល្លារសហរដ្ឋអាមេរិច។ រង្វាន់ក្នុងនោះរួមមាន ពានរង្វាន់ Jury Award ចំនួន ២,000ដុល្លារសហរដ្ឋអាមេរិច និង ៧៥0ដុល្លារសហរដ្ឋអាមេរិច សម្រាប់អ្នកឈ្នះការប្រកួតប្រភេទនីមួយៗ (សំដៅលើ គំនូរសិល្បៈបែបច្នៃប្រឌិត គំនូរដោយដៃ ចម្លាក់ វិចិត្រសិល្បៈថតរូប សិល្បៈគំនូរបែបឌីជីថល)ជាដើម។ ខាងគណៈកម្មការក៏រំពឹងថានឹងមានអ្នកឧបត្ថម្ភពីសាជីវកម្មផ្សេងៗចូលរួមចំណែក ក្នុងការផ្តល់រង្វាន់បន្ថែមដល់សិល្បៈករដែលបានឈ្នះការប្រកួតផងដែរ។

គួររម្លឹកផងដែរថា កម្មវិធីការតាំងពិព័រណ៍ប្រកួតស្នាដៃពហុសិល្បៈឯករាជ្យ ត្រូវបានបង្កើតឡើងក្នុងឆ្នាំ ២០២៣ នឹងបានក្លាយជាព្រឹត្តិការណ៍វប្បធម៌ដ៏សំខាន់មួយនៅក្នុងទីក្រុងភ្នំពេញ ដែលផ្តល់ឱ្យសិល្បករនូវកន្លែងដើម្បីស្វែងរកប្រធានបទដ៏មានអត្ថន័យ ក្នុងការរំលេចនូវស្នាដៃសិល្បៈរបស់ខ្លួន។ ការតាំងពិព័រណ៍នេះបើកទូលាយដល់សាធារណជនក្នុងការចូលទស្សនាជារៀងរាល់ថ្ងៃ ចាប់ពីម៉ោង 8 ព្រឹកដល់ម៉ោង 10 យប់នៅ The Gallery & Lobby នៅសណ្ឋាគារសូហ្វីតែលភ្នំពេញ ។