ខ្យល់ពុលក្នុងបរិយាកាស ជះឥទ្ធិពលអាក្រក់ដល់សុខភាព

សន្ទស្សន៍គុណភាពខ្យល់មានការប្រែប្រួលខុសៗគ្នាទៅតាមភូមិសាស្ត្រពីខេត្តមួយទៅខេត្តមួយ នេះបើតាមសេចក្តីជូនដំណឹងរបស់ក្រសួងបរិស្ថាន។ ចំណែកក្រសួងសុខាភិបាលក៏បានចេញសេចក្តីប្រកាសព័ត៌មាន ឲ្យសារធារណជន តាមដានសន្ទស្សន៍គុណភាពខ្យល់ដោយយកចិត្តទុកដាក់ផងដែរ។

ការបំពុលបរិយាកាសខាងក្រៅ គឺជាការព្រួយបារម្ភជាសកល ដែលជះឥទ្ធិពលដល់សុខភាពយ៉ាងខ្លាំង។ ការលាយបញ្ចូលគ្នានៃឧស្ម័ន និងភាគល្អិតតូចៗដែលបង្កគ្រោះថ្នាក់នេះ អាចនាំឱ្យអ្នកកើតមានជំងឺផ្លូវដង្ហើមមួយចំនួន ដូចជា ជំងឺហឺត ជំងឺរលាកទងសួត និងជំងឺសរសៃឈាមបេះដូង ព្រមទាំងបង្កើនហានិភ័យនៃជំងឺមហារីកសួតទៀតផង។ នេះគឺជារឿងដែលអ្នកគួរយកចិត្តទុកដាក់ និងស្វែងយល់ដឹងអំពីហានិភ័យ រួចចាត់វិធានការដើម្បីកាត់បន្ថយការប៉ះពាល់។

ផលប៉ះពាល់ដល់សុខភាពនៃការបំពុលខ្យល់

ផលប៉ះពាល់នៃការបំពុលបរិយាកាសចំពោះសុខភាព គឺទូលំទូលាយណាស់ ដែលវានឹងបង្កជាផលប៉ះពាល់ដល់មនុស្សគ្រប់វ័យ មិនថា ក្មេង ចាស់ និងនៅគ្រប់មជ្ឈដ្ឋានទាំងអស់។ បញ្ហាសុខភាពទូទៅមួយចំនួនដែលទាក់ទងនឹងការបំពុលបរិយាកាសរួមមាន ៖

• ជំងឺផ្លូវដង្ហើម៖ ការបំពុលខ្យល់អាចធ្វើឱ្យរលាកផ្លូវដង្ហើម ដែលនាំឱ្យកើតទៅជា ជំងឺហឺត ជំងឺរលាកទងសួត និងជំងឺស្ទះសួតរ៉ាំរ៉ៃ (COPD)។

• ជំងឺសរសៃឈាមបេះដូង៖ ការសិក្សាជាច្រើនបានបង្ហាញអំពីទំនាក់ទំនងរវាងការបំពុលបរិយាកាស និងការកើនឡើងហានិភ័យនៃការគាំងបេះដូង ជំងឺដាច់សរសៃឈាមខួរក្បាល និងជំងឺសរសៃឈាមបេះដូងផ្សេងៗទៀត ដោយសារតែភាគល្អិតល្អនៅក្នុងខ្យល់កខ្វក់បានចូលទៅក្នុងចរន្តឈាមនៃរាងកាយ។

• មហារីកសួត៖ ការប៉ះពាល់ខ្យល់ពុលក្នុងរយៈពេលយូរនឹងអាចបង្កើនហានិភ័យជំងឺមហារីកសួត ជាពិសេសចំពោះសារធាតុបង្កមហារីកដូចជា Benzene និង Formaldehyde។

• បញ្ហាសុខភាពផ្សេងៗទៀត៖ ការបំពុលខ្យល់ក៏ត្រូវបានផ្សារភ្ជាប់ទៅនឹងបញ្ហាសុខភាពជាច្រើនផ្សេងទៀត រួមទាំងជំងឺទឹកនោមផ្អែម ជំងឺសរសៃប្រសាទ និងប៉ះពាល់ដល់ការបង្កកំណើត។

ការការពារសុខភាពរបស់អ្នកពីគុណភាពខ្យល់មិនល្អ គឺជាការចាំបាច់ ជាពិសេសនៅពេលដែលសន្ទស្សន៍គុណភាពខ្យល់ (AQI) ខ្ពស់ ស្ថិតក្នុងកម្រិតមានគ្រោះថ្នាក់។

ខាងក្រោមនេះ គឺជាគន្លឹះដ៏មានប្រសិទ្ធភាពមួយចំនួនដែលអ្នកអាចអនុវត្តបាន ៖

• តាមដានព័ត៌មានច្បាស់ការណ៍៖ សូមតាមដានរបាយការណ៍គុណភាពខ្យល់នៅក្នុងតំបន់របស់អ្នក និងកំហិតសកម្មភាពចេញក្រៅផ្ទះ នៅពេលដែលកម្រិតខ្យល់ពុលឡើងខ្ពស់។

• ចៀសវាងការកកស្ទះចរាចរណ៍៖ ជ្រើសរើសធ្វើដំណើរលើផ្លូវទូលាយ ឬបើអាច សូមធ្វើដំណើរថ្មើរជើង ឬជិះកង់នៅលើផ្លូវដែលមិនសូវមានចរាចរណ៍ខ្វាត់ខ្វែង។

• ពាក់ម៉ាស៖ នៅពេលដែលគុណភាពខ្យល់មានការបំពុលខ្លាំង សូមពាក់ម៉ាស់ឱ្យបានជាប់លាប់ និងជ្រើសប្រភេទម៉ាស់ដែលអាចការពារបានល្អ ដូចជា N95 ជាដើម។

• យកចិត្តទុកដាក់បរិយាកាសក្នុងផ្ទះ៖ ធានានូវខ្យល់ចេញចូលផ្ទះបានគ្រប់គ្រាន់ មិនថានៅកន្លែងធ្វើការក៏ដោយ។ ប្រើប្រាស់បំពង់បឺតខ្យល់ និងចៀសវាងការជក់បារីនៅក្នុងផ្ទះ ឧស្សាហ៍លាងម៉ាស៊ីនត្រជាក់ (យ៉ាងហោចណាស់ 3ខែម្តង)។

• ចូលរួមការទប់ស្កាត់ និងលើកកម្ពស់ខ្យល់ស្អាត ហើយកាត់បន្ថយការបំភាយឧស្ម័ន។

ការបំពុលខ្យល់មានវិសាលភាពដ៏ធំទូលាយនៃផលប៉ះពាល់ដល់សុខភាពមនុស្ស និងបរិស្ថាន ដូច្នេះសូមចូលរួមកាត់បន្ថយការបំពុលខ្យល់ ជាពិសេសកុំប៉ះពាល់នឹងការបំពុលបរិយាកាស ការពារខ្លួនអ្នក និងមនុស្សជាទីស្រលាញ់របស់អ្នកពីផលប៉ះពាល់ដ៏គ្រោះថ្នាក់នេះ ។