និន្នាការម៉ូតសក់ សម្រាប់និទាឃរដូវ/រដូវក្តៅក្នុងឆ្នាំ 2025

Fashion Week សម្រាប់និទាឃរដូវ/រដូវក្តៅ បានបង្ហាញនូវទិន្នាការម៉ូតសក់ដ៏ស្រស់ស្អាត និងភាពទាក់ទាញបំផុតជាមួយការតុបតែងមុខ របស់តារាបង្ហាញម៉ូតដើរលើវិថីសិល្បៈទាំងអស់… នេះហាក់ បំផុសគំនិតស្ទីលម៉ូតសក់សម្រាប់មួយរដូវកាល។

ម៉ូដសក់ និទាឃរដូវ និងរដូវក្តៅឆ្នាំ 2025 នេះ បំផុសគំនិតលើភាពសាមញ្ញតាមបែបធម្មជាតិ រាប់ចាប់ពីសក់ទឹករលកដ៏ស្រស់ឆើតឆាយ សក់ខ្លីដែលមានលក្ខណៈផ្ទាល់ខ្លួន និងទាន់សម័យ រហូតដល់ការវិលត្រឡប់មកវិញនៃ Baby Bangs បែបអតីតកាល បង្កប់នូវសម្រស់ និងភាពជឿជាក់នៅតែមានដដែល។

មិនថាអ្នកចូលចិត្តទម្រង់សក់សាមញ្ញធម្មតា និងបែបផែនធម្មជាតិ ឬស្រស់ស្អាត ឆើតឆាយ… សូមពិចារណាលើម៉ូតសក់ទាំងនេះ។

• ទម្រង់សក់ទឹករលកបែបរ៉ូមែនទិក

ម៉ូតសក់នេះសង្កត់ធ្ងន់លើភ្លីរួញធំ សរសៃសក់រមួលបែបទម្រង់ទឹករលក មើលទៅហាក់ផ្តល់នូវភាពស្រស់ឆើតឆាយចំពោះស្រ្តីគ្រប់រូប។ វាស័ក្តិសមសម្រាប់ទម្រង់មុខទាំងអស់ និងមានផាសុកភាពយ៉ាងខ្លាំង។

• ម៉ូត Bob ទាន់សម័យ

ក្នុងទស្សវត្សរ៍ឆ្នាំ 1970 Bob គឺជាម៉ូតសក់ដ៏ពេញនិយម ប៉ុន្តែឥឡូវនេះ វាបានត្រឡប់មកកាន់វគ្គ Fashion Week ម្ដងទៀតហើយ ដោយឃើញមានតារាម៉ូដែលលេងស្ទីលម៉ូតសក់ខ្លី Bob មើលទៅពិតជាស្រស់ស្អាត មិនមែនគ្រាន់តែជាសក់ខ្លីធម្មតាទេ។ រាប់ចាប់ពីសរសៃគល់សក់រហូតដល់ចុងសក់ និងប្រវែងសម្រុងស្ទើរតែស្របគ្នា ហើយមានកម្រាស់ល្មម បូករួមនឹងស្រទាប់នៃការកាត់មិនថា រួញ ឬត្រង់។

• Retro Bangs

Bangs ឬ សក់សេះ កំពុងត្រឡប់មកវិញសម្រាប់និទាឃរដូវ/រដូវក្តៅនេះហើយ ដោយ Baby Bangs គឺជាតួឯកសំខាន់។ ម៉ូដសក់សេះ ដែលធ្លាក់ពីលើចិញ្ចើម បានបង្កើតរចនាប័ទ្មមិនស្មើគ្នា និងមានភាពរញ៉េរញ៉ៃបន្តិច ប៉ុន្តែរំលេចភាពស្រស់ស្អាតតាមបែបធម្មជាតិ និងសាមញ្ញ បន្ថែមពីនេះ វាធ្វើឱ្យថ្ពាល់កាន់តែលេចធ្លោ។

• ទម្រង់ពុះកណ្តាល

ម៉ូតសក់ពុះកណ្តាល មានលក្ខណៈស្រស់ស្អាតមិនចេះចប់ទេ ហើយទម្រង់ផ្សេងៗ មិនថា សក់វែង ឬសក់ខ្លីនៃម៉ូតពុះពាក់កណ្តាលគឹមានប្រជាប្រិយភាពខ្លាំងណាស់ ដូចជាសក់ត្រង់វែងពុះកណ្តាល សក់រួញពុះកណ្តាល ពួកវាសុទ្ធតែបង្ហាញពីសោភ័ណភាពទំនើប ដែលធ្វើឱ្យរូបរាងទាំងមូលកាន់តែមានភាពជាស្ត្រី។