ភាពវិជ្ជមាននៃរូបរាងកាយ របស់កុមារ និងយុវវ័យ

ការសិក្សារស្រាវជ្រាវជាច្រើន បានបង្ហាញការព្រួយបារម្ភ ចំពោះកុមារតូចៗ ចាប់ពីវ័យ ៣ ឆ្នាំទៅ ដែលជាវ័យពួកគេចាប់ផ្តើមចង់ដឹងចង់ស្វែងយល់ អំពី អត្តសញ្ញាណនៃរូបរាងកាយខ្លួនឯង… ហើយអ្វីដែលគួរឱ្យកត់សំគាល់ គឺរូបរាងរបស់ពួកគេមានការផ្លាស់ប្តូរយ៉ាងឆាប់រហ័ស។ ជាការព្រួយបារម្ភមួយដែល មាតាបិតាគ្រប់រូបត្រូវដើរតួនាទីដ៏សំខាន់ ក្នុងការបង្រៀន លើកកម្ពស់ការយល់ដឹងពាក់ព័ន្ធនឹងរូបរាងកាយរបស់ពួកគេ ឱ្យពួកគេទទួលយកឬពេញចិត្តចំពោះខ្លួនឯង ឱ្យតម្លៃលើសមត្ថភាពខ្លួនឯង និងជ្រើសរើសការរស់នៅដែលមានតុល្យភាព។

ឥទ្ធិពលនៃប្រព័ន្ធបណ្តាញសង្គម (Social Media) បានធ្វើឱ្យប៉ះដល់ផ្លូវចិត្តកុមារដែលទើបនឹងឈានដល់វ័យជំទង់យ៉ាងខ្លាំង ព្រោះថាប្រព័ន្ធទាំងអស់នោះ តែងតែឆ្លុះបញ្ចាំងអំពីភាពមិនពិតប្រាកដ នៃរូបរាងកាយ នឹងដាក់ស្លាក ថារាងកាយបែបនេះ ល្អ ឬមិនល្អ ស្អាតឬមិនស្អាត “វាមិនដែលចេះគ្រប់គ្រាន់” ទៅលើមនុស្សម្នាក់ៗ។

ទស្សនៈនៅក្នុងប្រព័ន្ធបណ្តាញសង្គម ដែលបង្ហាញអំពីប្រភេទរូបរាងកាយដែលមានភាព “ល្អឥតខ្ចោះ” ជារឿយៗ មិនមែនជាការពិតនោះទេ ពីព្រោះមុនពេលផុស រូបនោះ វាត្រូវបានគេធ្វើការកែសម្រួលរួចទៅហើយ ទើបគេដាក់បង្ហាញជាសាធារណៈក្នុងប្រព័ន្ធផ្សព្វផ្សាយ។ ការបង្ខំខ្លួន ឲ្យធ្វើតាមត្រាប់តាមគម្រូមិនពិតប្រាកដទាំងនោះ អាចបណ្តាលឲ្យមានការខកចិត្ត និងមានផលវិបាក និងជះឥទ្ធិពលអវិជ្ជមាននៅក្នុង ជីវិត។

សូម្បីតែសកម្មភាពតូចតាចដូចជា ការនិយាយលេងសើច ឬរិះគន់ អំពីរូបរាងកាយ និងរបស់របរប្រើប្រាស់ផ្ទាល់ខ្លួនមានសភាពមិនសមល្មមនឹងរូបរាងរបស់ពួកគេ ក៏អាចជះឥទ្ធិពលអវិជ្ជមានដល់ទស្សនៈនៃការយល់ឃើញរបស់ពួកគេផងដែរ។

សូមលើកទឹកចិត្តកូនតូចៗ ដោយបង្ហាញថា សេចក្តីសុខសុភមង្គល និងការទទួលយកពីអ្នកដទៃ ព្រមទាំងសេចក្តីស្រឡាញ់ស្មោះសរ មិនកំណត់លើទម្ងន់រូបរាងកាយ និងទំហំនៃសម្លៀកបំពាក់នោះទេ។

គួរបញ្ជាក់ថា ការសិក្សាស្រាវជ្រាវជាច្រើនបានបង្ហាញឱ្យឃើញថា ក្មេងស្រីងាយរងផលប៉ះពាល់ផ្លូវចិត្ត ជាជាងក្មេងប្រុស… ទោះជាយ៉ាងណាក៏ដោយ ក៏មិនប្រាកដថាក្មេងប្រុសមិនទទួលសំពាធនេះនោះទេ ហេតុដូច្នោះហើយអាណាព្យាបាលគ្រប់រូបក៏គួរយកចិត្តទុកដាក់លើកូនគ្រប់ភេទ។

មាតាបិតាគ្រប់រូប មានសមត្ថភាពអាចជួយកូនៗគ្រប់រូប ឲ្យបង្កើតរូបរាងកាយមួយដែលមានថាមពល មានតុល្យភាពខាងផ្នែករូបរាង និងស្មារតី ឬលើកទឹកចិត្តដល់ពួកគេឱ្យចេះទទួលយកនូវអ្វីដែលខ្លួនមាន ជាពិសេសលើកសរសើរអំពីចំណុចវិជ្ជមាននៃរាងកាយរបស់ពួកគេ ហើយចៀសវាងការនិយាយបន្ទោស សង្អាប់លើភាពអវិជ្ជមានផ្សេងៗនៃរូបកាយរបស់ពួកគេ ឬនិយាយប្រៀបធៀប ឬចំអកដល់អ្នកដទៃឲ្យគេបានឮ។ សូមនិយាយប្រាប់គេថា “អ្វីៗដែលកូនបានឃើញនៅលើប្រព័ន្ធបណ្តាញសង្គម មិនមែនសុទ្ធតែជាការពិតទាំងអស់នោះទេ! កូនត្រូវចេះស្រលាញ់ និងចូលពេញចិត្តនូវអ្វីដែលខ្លួនមាន និងបញ្ឈប់ការប្រៀបធៀបខ្លួនឯងជាមួយមនុស្សដទៃ” ។

ការបង្ហាញអំពីតម្លៃ និងសមត្ថភាពផ្ទាល់ខ្លួនរបស់បុគ្គលម្នាក់ៗ គឺជារឿងសំខាន់ ក្នុងនោះរួមមានបុគ្គលិកលក្ខណៈ សេចក្តីស្រឡាញ់ស្មោះត្រង់ ការទទួលស្គាល់ការពិត និងការយកចិត្តទុកដាក់ផងដែរ ដែលទាំងអស់នេះ មិនបានឆ្លុះបញ្ចាំងតាមរយៈការកំណត់ដោយរូបរាងកាយខាងក្រៅនោះឡើយ។