ម្រេចខ្មៅកម្ពុជាចំនួន ៣០តោន ត្រូវបាននាំចេញទៅប្រទេសចិនជាលើកដំបូង

ប្រទេស​កម្ពុ​ជាមាន​ប្រពៃណី​ជាង ៧០០​ឆ្នាំ មកហើយ​ក្នុង​ការដាំដុះ​ម្រេច ដែលជា​អត្ថប្រយោជន៍​ពី​ធម្មជាតិ​មិនអាច​រំលង​បាន​។ នៅក្នុងឆ្នាំ ២០២៤នេះ កម្ពុជាសម្រេចបានគោលដៅទីផ្សារដ៏ធំមួយទៀតគឺ បាននាំចេញម្រេចខ្មៅទៅទីផ្សារចិនជាលើកដំបូង ក្នុងបរិមាណ៣០តោន។

 ជាក់ស្តែង ម្រេចគឺជាផលិតផលកសិកម្មដំបូងរបស់កម្ពុជា ដែលត្រូវបានអនុញ្ញាតឱ្យនាំចេញទៅកាន់ប្រទេសចិន ហើយក៏ជាគ្រឿងទេសដំបូងគេដែលត្រូវបានអនុញ្ញាតឱ្យនាំចេញទៅកាន់ទីផ្សារប្រទេសចិនផងដែរ។ ម្រេចកម្ពុជាត្រូវបានទទួលស្គាល់ថាជាប្រភេទម្រេចដែលមានគុណភាពល្អក្នុងការនាំចេញទៅកាន់ពិភពលោក។

 កាលពីថ្ងៃទី១២ ខែឧសភា ឆ្នាំ២០២៣ កន្លងទៅស្ថានទូតចិនប្រចាំកម្ពុជា បានប្រកាសជាផ្លូវការថា ម្រេចរបស់កម្ពុជា ត្រូវបានអនុញ្ញាត ឱ្យនាំចេញដោយផ្ទាល់ទៅកាន់ប្រទេសចិន បន្ទាប់ពីបានបំពេញគ្រប់លក្ខខណ្ឌតម្រូវរួចរាល់។ ក្នុងនោះមានទីតាំងដាំម្រេចចំនួន ២៨កន្លែង និងរោងចក្រវេចខ្ចប់ចំនួន ៧កន្លែង ត្រូវបានចុះបញ្ជី និងទទួលបានការអនុញ្ញាតពីភាគីចិន ក្នុងការនាំចេញ។

 ចំពោះការនាំចេញម្រេចខ្មៅចំនួន ៣០តោន ទៅទីផ្សារចិននេះ គឺធ្វើការនាំចេញដោយក្រុមហ៊ុន Sela Pepper។ ​អ្នកគ្រប់គ្រងក្រុមហ៊ុន Sela Pepper បានអោយដឹងថា ចិនគឺជាទីផ្សារធំ ​ហើយនាំចេញម្រេចជាលើកដំបូងទៅទីផ្សារនេះ នឹងធ្វើឱ្យប្រជាជននៅប្រទេសចិន បានស្គាល់ពីរសជាតិម្រេចកម្ពុជា។ ជាមួយគ្នានេះ ការនាំចេញម្រេចទៅកាន់ទីផ្សារចិននេះ ក៏ជាឱកាសមួយក្នុងការផ្សព្វផ្សាយ ពីផលិតផលម្រេចកម្ពុជាទៅកាន់បណ្តាប្រទេសផ្សេងៗទៀតផងដែរ។ បច្ចុប្បន្ននេះ ក្រុមហ៊ុន Sela Pepper បាននាំចេញម្រេចទៅកាន់ទីផ្សារមួយចំនួនដូចជា ប្រទេសជប៉ុន កូរ៉េ អាល្លឺម៉ង អូលែន ម៉ាលី និងថៃជាដើម។

បើតាមរយបាយការណ៍របស់ក្រសួងកសិកម្មរក្ខាប្រមាញ់ និងនេសាទ គិតត្រឹមដំណាច់ឆ្នាំ ២០២៣ កម្ពុជាមានផ្ទៃដីដាំម្រេចចំនួនជាង ៧២០០ហិចតា នៅខេត្តចំនួន១០ទូទាំងប្រទេស។ ខេត្តដែលដាំដំណាំម្រេចច្រើនជាងគេនោះគឺ ខេត្តកំពង់ធំ មណ្ឌលគីរី រតនៈគីរី និងត្បូងឃ្មុំ។ តាមរបាយការណ៍បានឱ្យដឹងថា ត្រឹម១១ខែ កាលពីឆ្នាំ២០២៣ កម្ពុជាបាននាំចេញម្រេចទៅកាន់ទីផ្សារអន្តរជាតិក្នុងបរិមាណ ៦ពាន់តោន ក្នុងប្រទេសដែលនាំចូលម្រេចពីកម្ពុជាច្រើនជាងគេគឺ វៀតណាម បន្ទប់មកប្រទេសអាល្លឺម៉ង់ និងសហរដ្ឋអាមេរិក ផងដែរ៕