ខ្មែរ
English
លោក Paing Takhon ជាតារាសម្តែងប្រុសរូបស្រស់សង្ហាមីយ៉ាន់ម៉ា (ភូមា) ក្លាយជាអគ្គរដ្ឋទូតយុវជននៃមហោស្រពភាពយន្តកម្ពុជា-អាស៊ីលើកទី 2 កាលពីរាត្រីនៃពិធីចែកពានរង្វាន់នៅថ្ងៃទី 24 ខែសីហា ឆ្នាំ 2024។
លោក Paing Takhon ទទួលបានប្រជាប្រិយភាពយ៉ាងខ្លាំង ក្រោយពេលចូលរួមសម្តែងជាតួឯកប្រុសនៅក្នុងខ្សែភាពយន្តរឿង “ប្រវត្តស្នេហ៍នាងនាថ” និងមួយចំនួនទៀតរួមមាន រឿង “បណ្ដាសានាងរាត្រី” និងរឿង “ប្រុសលក់ខ្លួន” ក្រោមទេពកោសល្យនៃការសម្តែងរបស់លោក លាយលំជាមួយសម្រស់ដ៏ស្រស់សង្ហារ ជាពិសេសការស្វាគមន៍យ៉ាងកក់ក្តៅរបស់លោកនៅក្នុងវិស័យភាពយន្តខ្មែរកន្លងមក។
សូមបញ្ជាក់ជូនប្រិយមិត្តថា មហោស្រពភាពយន្តកម្ពុជា-អាស៊ីលើកទី 2 បានការប្រព្រឹត្តឡើងចំនួនថ្ងៃគឺកាលពីថ្ងៃទី 23 រហូតដល់ថ្ងៃទី 25 ខែសីហា ឆ្នាំ 2024 ដោយឡែកពិធីចែកពានរង្វាន់នៃមហោស្រពភាពយន្តកម្ពុជាអាស៊ីលើកទី 2 នេះ រៀបចំកាលយប់ថ្ងៃទី 24 ខែសីហា ឆ្នាំ 2024 ស្ថិតនៅសាលសន្និបាត PH Grand Hall ក្នុងបុរីប៉េងហួត បឹងស្នោ រាជធានីភ្នំពេញ ក្រោមអធិបតីភាពឯកឧត្តម សោម សុគន្ធ រដ្ឋលេខាធិការ តំណាងដ៏ខ្ពង់ខ្ពស់លោកជំទាវបណ្ឌិតសភាចារ្យរដ្ឋមន្រ្តីក្រសួងវប្បធម៌ និងវិចិត្រសិល្បៈ។
មហោស្រពភាពយន្ដកម្ពុជា-អាស៊ីលើកទី២ នឹងផ្ដល់ឱកាសដល់ផលិតករទាំងកម្ពុជា និងមកពីបណ្ដាប្រទេសផ្សេងៗទៀតបង្ហាញនូវសមត្ថភាព និងធ្វើការចែករំលែកបទពិសោធន៍ រវាងគ្នានិងគ្នាទៅវិញទៅមក ហាក់ដូចជាព្រឹត្តិការណ៍នៃផ្សព្វផ្សាយនូវភាពចម្រុះសិល្បៈវប្បធម៌។
បើយោងទៅតាមមន្ត្រីក្រសួងវប្បធម៌ និងវិចិត្រសិល្បៈ បានថ្លែងឱ្យដឹងថា ចំពោះការរៀបចំកម្មវិធី “មហោស្រពភាពយន្តកម្ពុជាអាស៊ី លើកទី២” គឺជាព្រឹត្តិការណ៍ដ៏មានសារសំខាន់ ដែលមិនត្រឹមតែជាវេទិកាសម្រាប់ប្រគល់ពានរង្វាន់ជូនផលិតករ សិល្បករ សិល្បការិនីប៉ុណ្ណោះទេ ប៉ុន្តែគឺវេទិកាដ៏មានឥទ្ធិពលក្នុងការផ្សព្វផ្សាយនូវភាពចម្រុះនៃសិល្បៈវប្បធម៌ ព្រមទាំងរឿងរ៉ាវជាច្រើនតាមរយៈស្នាដៃភាពយន្តរបស់បណ្តាប្រទេសនានាក្នុងតំបន់អាស៊ី។
