សុវត្ថិភាពកូនតូចៗ នៅលើប្រព័ន្ធអ៊ីនធើណេត

ការពារសុវត្ថិភាពកូនៗរបស់អ្នកនៅលើប្រព័ន្ធអ៊ីនធើណិត គឺជារឿងសំខាន់បំផុតក្នុងយុគសម័យឌីជីថលនេះ។ ក្មេងៗកាន់តែច្រើន បានចំណាយពេលយ៉ាងសកម្មនៅលើគេហទំព័រប្រព័ន្ធអ៊ីនធឺណិត ការណ៍នេះក៏ងាយពួកគេងាយក្លាយជាជនរងគ្រោះ ប្រឈមនឹងហានិភ័យផ្សេងៗ ដែលអ្នកនឹកស្មានមិនដល់។

ហេតុដូច្នេះហើយ សូមកំហិតការចែករំលែកព័ត៌មានផ្ទាល់ខ្លួននិងក្រុមគ្រួសារលើបណ្តាញសង្គម និងត្រូវឧស្សាហ៍ពិនិត្យឧបករណ៍ឬថ្នាលឌីជីថលដែលអ្នក និងក្រុមគ្រួសាររបស់អ្នកកំពុងប្រើប្រាស់ឲ្យបានម៉ត់ចត់ ថាអ្នកបានអនុវត្តនូវវិធីសាស្រ្តគ្រប់គ្រងទិន្នន័យដែលមានសុវត្ថិភាពសម្រាប់ពួកគេហើយ។

វិធីសាស្រ្តសំខាន់ៗក្នុងការរក្សាសុវត្ថិភាពកូនៗរបស់អ្នក មានដូចជា៖

ការកំណត់ព័ត៌មានឯកជន ៖

កំណត់ព័ត៌មានឯកជន ៖ ពិនិត្យមើលឧបករណ៍របស់កូនរបស់អ្នក ដើម្បីឲ្យប្រាកដថាឧបករណ៍នោះបានធ្វើបច្ចុប្បន្នភាព (អាប់ដេត) និងកំពុងដំណើរការដោយសូហ្វវែរចុងក្រោយគេ ហើយកំណត់ឯកជនភាពរបស់ពួកគេ ដោយកំណត់លក្ខណៈដែលកាត់បន្ថយការប្រមូលទិន្នន័យ ដើម្បីកុំឱ្យជនទាំងឡាយមើលឃើញព័ត៌មានណាមួយ ដែលអ្នកមិនចង់ឱ្យជនទាំងនោះមើលឃើញ។ ការកំណត់ឯកជនភាពនេះ ត្រូវធ្វើឡើងទាំងនៅក្នុងប្រព័ន្ធផ្សព្វផ្សាយសង្គមផ្សេងៗ នឹងក្នុងកម្មវិធីហ្គេម។

បង្កើតលេខសំងាត់ដែលរឹងមាំ ៖ បង្រៀនកូនៗរបស់អ្នកឲ្យចេះបង្កើតពាក្យ ឬលេខសម្ងាត់ដែលពិបាក នឹងមានតែមួយគត់ ដើម្បីចៀសវាងបញ្ហាលួចចូលប្រើប្រាស់ពីជនខិលខូច។ ពន្យល់អំពីសារៈសំខាន់នៃការរួមបញ្ចូលគ្នារវាងការប្រើប្រាស់លាយ អក្សរ តូច ធំ លេខ និងនិមិត្តសញ្ញាផ្សេងៗ និងមិនត្រូវចែករំលែកលេខកូដសម្ងាត់របស់អ្នកជាមួយនរណាម្នាក់ សូម្បីតែមិត្តភក្ដិជិតស្និទ្ធក្ដី!

សូមគិតឲ្យបានល្អិតល្អន់មុនបង្ហោះអ្វីមួយ ៖ អ្វីក៏ដោយនៅលើប្រព័ន្ធអ៊ីនធឺណិត សុទ្ធសឹងតែមានអ្នកតាមដាន។ នៅពេលអ្នកបង្ហោះអ្វីមួយនៅលើអ៊ីនធឺណិត វាពិតជាលំបាកណាស់ក្នុងការលុបវាចោលទាំងស្រុង ព្រោះមានអ្នកប្រើប្រាស់ជាច្រើនបានធ្វើការចែករំលែកតគ្នា និងថតរូបភាព ឬវីដេអូនោះទុករួចស្រេចបាត់ទៅហើយ។
គ្រោះថ្នាក់ពីមនុស្សចម្លែក ៖ ចូរបង្រៀនកូនកុំឲ្យទទួលសំណើរសុំស្គាល់ជាមិត្តក្នុងប្រព័ន្ធសង្គមពីមនុស្សមិនស្គាល់។ អ្នកគប្បីពិនិត្យមើលprofile របស់ពួកគេ និងព្យាយាមរកមើលថាតើពួកគេ គឺជានរណា។ តើអ្នកមានមិត្តភក្ដិរួមគ្នាដែរឬទេ? សូមគិតមុនពេលទទួល និងកុំចែករំលែកព័ត៌មានផ្ទាល់ខ្លួន ដូចជា អាសយដ្ឋាន លេខទូរស័ព្ទ ឬព័ត៌មានលម្អិតនៃធនាគាររបស់អ្នក ទៅកាន់ជនមិនស្គាល់ ទោះបីជានៅក្នុងជីវិតពិត ឬបណ្តាញសង្គម។

យល់ដឹងអំពីការគំរាមកំហែងតាមប្រព័ន្ធអ៊ីនធឺណិត ៖ អប់រំកូនអំពីការគំរាមកំហែងតាមរយៈអ៊ីនធឺណិត និងផលប៉ះពាល់ដ៏ធ្ងន់ធ្ងររបស់វា។ សូមជួយពួកគេឱ្យស្គាល់អំពីការផ្សាយពាណិជ្ជកម្មតាមអនឡាញ និងប្រើប្រាស់ឱកាសនេះ ដើម្បីស្វែងយល់រួមគ្នាថាតើមានអ្វីមិនប្រក្រតីជាមួយនឹងសារអវិជ្ជមានមួយចំនួន ដែលអ្នកឃើញ។ ចូរលើកទឹកចិត្តពួកគេឱ្យរាយការណ៍ករណីណាមួយនៃការគំរាមកំហែងតាមអ៊ីនធឺណិតដែលពួកគេបានជួបប្រទះ។

យល់ដឹងអំពីតំណលីងគ្មានសុវត្ថិភាព ៖ ពិភាក្សាអំពីតំណលីងដែលគ្មានសុវត្ថិភាព ដែលកំពុងរីករាលដាល ពាសពេញប្រព័ន្ធអ៊ីនធើណេត ចៀសវាងមានគេលួចយក (Hack) ទិន្នន័យព័ត៌មានផ្ទាល់ខ្លួនរបស់អ្នក។ ពិចារណាលើការប្រើឧបករណ៍គ្រប់គ្រងដោយមាតាបិតា ដើម្បីរក្សាសុវត្ថិភាព ឬរារាំងការចូលប្រើប្រាស់គេហទំព័រដែលមិនសមស្របតាមអាយុរបស់កុមារ។

កសាងកេរ្តិ៍ឈ្មោះឌីជីថល ៖ ការចំណាយពេលនៅតាមអនឡាញ ក៏អាចជាឱកាសដ៏អស្ចារ្យ ដើម្បីឱ្យកូនៗរបស់អ្នកបង្កើតភាពច្នៃប្រឌិត រៀនសូត្រ ប្រើប្រាស់សម្លេងរបស់ពួកគេ ដើម្បីចែករំលែកទស្សនៈទានបានដែរ។ ចូរពន្យល់ នឹងលើកទឹកចិត្តពួកគេឲ្យប្រើប្រាស់ធនធាននៅលើប្រព័ន្ធអ៊ិនធឺណេតឲ្យបានត្រឹមត្រូវ ដើម្បីសាងកេរ្តិ៍ឈ្មោះឌីជីថល។ បន្ថែមពីនេះ អ្នកត្រូវបង្រៀនគេឲ្យមានការគោរព មានទំនួលខុសត្រូវចំពោះសកម្មភាពរបស់ខ្លួន នឹងចេះបង្កើតតុល្យភាព រវាងសកម្មភាពអនឡាញជាមួយនឹងបែបបទរស់នៅបែបសកម្ម និងការកម្សាន្តអហ្វឡាញ ផងដែរ។