កំហុសនៃរចនាប័ទ្មនៅក្នុងគេហដ្ឋាន ដែលមិនផ្តល់ផាសុកភាពក្នុងការរស់នៅ

គេហដ្ឋានរបស់អ្នកត្រូវប្រាកដថាជាទីជម្រកដែលផ្តល់នូវសេចក្តីសុខផ្លូវចិត្ត ផ្លូវកាយមានផាសុកភាព និងជាទីកន្លែងសម្រាប់សម្រាកលំហែកាយ និងរីករាយជាមួយជីវិតផ្ទាល់ខ្លួន។ ប៉ុន្តែប្រសិនបើគេហដ្ឋានរបស់អ្នកមិនមានរចនាប័ទ្មត្រឹមត្រូវតាមក្បួនតម្រា នោះវាអាចបង្កើនកម្រិតស្ត្រេសរបស់អ្នកបន្ថែមនៅពេលអ្នកត្រឡប់ចូលក្នុងផ្ទះមិនថាជាថ្ងៃចុងសប្តាហ៍ត្រូវសម្រាក។

ជម្រើសនៃការរចនាគេហដ្ឋានខុស អាចនឹងធ្វើឱ្យអ្នកមានអារម្មណ៍តានតឹងដោយអចេតនា មិនថាបច្ចុប្បន្នអ្នកកំពុងជួសជុលផ្ទះ ដើម្បីផ្តល់ភាពស្រស់ស្អាត ឬព្យាយាមបង្កើតបរិយាកាសស្ងប់ស្ងាត់សម្រាប់ខ្លួនឯង និងគ្រួសារ សូមព្យាយាមជៀសវាងកំហុសរចនាប័ទ្មទាំងនេះដែលធ្វើឱ្យអ្នកពិបាកក្នុងការសម្រាកនៅផ្ទះ ៖

កំហុសរចនាប័ទ្មអំពូលភ្លើង

បញ្ហាធំដែលធ្វើឱ្យគេហដ្ឋានរបស់អ្នកទទួលបានផាសុកភាពក្នុងការរស់នៅ ឬជាការបង្កភាពតានតឹងចម្បងគឺ អំពូលតុបតែងផ្ទះ។ ប្រសិនបើអ្នកឈានជើងចូលផ្ទះក្នុងសភាពងងឹត ឬភ្លឺពេកប្រាកដណាស់ វាគ្មានភាពសមាមាត្រគ្នា ហើយពិបាកក្នុងការសម្រាកពីកន្លែងធ្វើការដ៏មមាញឹករបស់អ្នក។ ដូច្នេះ សូមជ្រើសរើសអំពូលឱ្យបានម៉ត់ចត់ ដោយដាក់ពណ៌ និងម៉ាកផ្សេងៗ ស៊ីសង្វាក់ស្មើគ្នា។ មនុស្សម្នាក់ៗតែងចង់បានពន្លឺដ៏កក់ក្តៅ ព្រោះវាជាអ្វីដែលជួយឱ្យអ្នកសម្រាកបានសុខស្រួល។

ជម្រើសថ្នាំលាបពណ៌មិនល្អ

ថ្នាំលាប គឺជារឿងដ៏សំខាន់ ព្រោះការដែលលាបពណ៌ខុសអាចធ្វើឱ្យអ្នកមានអារម្មណ៍ស្មុគស្មាញរាល់ពេលអ្នកដើរចូលបន្ទប់។ សូមជ្រើសពណ៌ដែលអ្នកស្រឡាញ់ ប៉ុន្តែត្រូវប្រាកដថា វាមានសមាមាត្រគ្នាជាមួយពន្លឺពេលព្រឹក និងពន្លឺភ្លើងក្នុងបន្ទប់នៅពេលយប់។ អ្នករចនាតុបតែងគេហដ្ឋានបានកត់សម្គាល់យ៉ាងច្បាស់ផងដែរថា ពណ៌មើលទៅខុសគ្នានៅក្នុងវេលាផ្សេងៗនៃថ្ងៃ ដូច្នេះវាជាការសំខាន់ណាស់ក្នុងការពិនិត្យមើលថ្នាំលាបនៅពេលព្រឹក ជុំវិញថ្ងៃត្រង់ និងនៅពេលយប់។

គ្រឿងសង្ហារឹម

ការតុបតែង ឬលើកដាក់គ្រឿងសង្ហារឹមនៅក្នុងផ្ទះ… អ្នកត្រូវតែពិនិត្យ និងគិតឱ្យបានល្អិតល្អន់។ កាលណា ផ្ទះមានទីធ្លាតូចចង្អៀតដោយកត្តាខ្វះការរៀបចំគ្រឿងសង្ហារឹមឱ្យបានត្រឹមត្រូវអាចធ្វើឱ្យអ្នកមានអារម្មណ៍ស្មុគស្មាញទៅតាមបរិយាកាសជុំវិញខ្លួន។ ម្យ៉ាងទៀត អ្នកគួរតែទិញរបស់របរណាជាតម្រូវការ ហើយអនុញ្ញាត្តឱ្យខ្លួនឯងតុបតែងគេហដ្ឋានតាមចំណង់ចំណូលចិត្តទើបមិនសូវមានសំពាធ។

បញ្ហាមួយចំនួនផ្សេងទៀត

ដូចគ្នានេះដែរ ការដំឡើងព្យួរក្រណាត់វាំងននដោយសភាពមិនស្មើគ្នា ឬវៀច កោង អាចធ្វើឱ្យពិបាកអ្នកមានអារម្មណ៍មិនល្អនៅក្នុងគេហដ្ឋានផ្ទាល់ខ្លួន។ នៅពេលដែលបរិវេណខាងក្នុងផ្ទះសុទ្ធតែរបស់រាយបាយ វាំងននធ្លាក់មក មិនស្មើគ្នា ឬការក្រាលព្រំមិនចំទីកន្លែងត្រឹមត្រូវ សុទ្ធសឹងតែជាបញ្ហានាំឱ្យអ្នកមិនចង់ត្រឡប់មកសម្រាកនៅក្នុងផ្ទះ ដូច្នេះសូមយកចិត្តទុកដាក់ចំពោះរឿងទាំងអស់នេះ។