Angelina Jolie ត្រូវបានតែងតាំងជាឯកអគ្គរដ្ឋទូតសម្រស់នៃម៉ាកយីយោដ៏ល្បីល្បាញ Tom Ford

ភាពជាដៃគូរវាងតារាសម្ដែងអាមេរិក និងម៉ាកយីហោប្រណីតដ៏ល្បីល្បាញនេះ គឺជានិមិត្តរូបនៃការរួបរួមតំណាងពីររូប ក្នុងការចែករំលែកនូវទស្សនៈរួមបញ្ចូលគ្នានៃភាពឆើតឆាយ និងស្ទីលដ៏ពេញនិយម។

ពិភពនៃ ភាពស្រស់ស្អាត បានស្វាគមន៍យ៉ាងកក់ក្តៅទៅលើការសហការពិសេសថ្មីមួយគឺ ៖ អ្នកស្រី Angelina Jolie ដែលជាតារាហូលីវូតជួរមុខ និងជាសកម្មជនមនុស្សធម៌ត្រូវបានតែងតាំង និងទទួលស្គាល់ក្លាយខ្លួនជាឯកអគ្គរដ្ឋទូតថ្មីនៃក្រុមហ៊ុន Tom Ford “Beauty” ។

តារាសម្តែងហូលីវូដ Angelina Jolie ហាក់បានបង្កប់នូវគុណតម្លៃរបស់ម៉ាកយីហោ Tom Ford ដ៏មហាសាលក្រោមរូបភាព ៖ ប្រជាប្រិយភាពទាក់ទាញ, ថាមពលអស្ចារ្យ និងបូកបញ្ចូលជាមួយភាពសុច្ចរិតត្រឹមត្រូវ។ ជាមួយនឹងសម្រស់ពីធម្មជាតិ មិនមានការកែនកុន ថែមទាំងភាពល្បីល្បាញរបស់នាងបានធ្វើឱ្យតារាស្រីរូបនេះក្លាយខ្លួនជា និមិត្តរូបតំណាងនៃភាពប្រណីតបរិសុទ្ធ រួមនឹងសម្រស់ស្រស់ស្អាតបែបបុរាណ។

Tom Ford គឺជាផ្ទះប្រណីត មានដើមកំណើតនៅសហរដ្ឋអាមេរិក ដែលបង្កើតឡើងដោយអ្នករចនា ឈ្មោះ Tom Ford កំឡុងឆ្នាំ 2005។ សង្វាក់ផលិតផលរបស់ Tom Ford មានលក្ខណៈពិសេសក្នុងការផ្តល់ជូនដូចជា សម្លៀកបំពាក់ ស្បែកជើង កាបូប គ្រឿង Make Up គ្រឿងបំពាក់លេងស្ទីលសម្រាប់ស្រ្តី (Accessories) និងផ្សេងៗទៀត។

និន្នាការនេះត្រូវបានដឹកនាំដោយ លោក Mert Alas និង លោក Marcus Piggot ក្នុងគោលបំណង រំលេចពណ៌ Runway Lip Color ដែលវាគឺជាក្រែមលាបបបូរមាត់ដ៏ល្បីល្បាញរបស់ Tom Ford ។ លើសពីការផ្សព្វផ្សាយផលិតផល វាបានឱ្យដឹងថាការសហការនេះ ក៏ជាផ្នែកមួយនៃបរិបទទូលំទូលាយលើឥទ្ធិពលរបស់តារាហូលីវូដអំពីការអនុវត្តយុទ្ធការនានាប្រកបដោយក្រមសីលធម៌។

Angelina Jolie បានប្តេជ្ញាចិត្តយ៉ាងមុះមុតចំពោះបុព្វហេតុមនុស្សធម៌ ដែលវាបានជះឥទ្ធិពលល្អទៅលើប្រេន Tom Ford Beauty ក្នុងគំនិតផ្តួចផ្តើមប្រកបដោយនិរន្តរភាព និងមានទំនួលខុសត្រូវកាន់តែខ្ពស់។