បំបាត់ស្នាមខ្មៅជាំនៅលើស្បែកដៃ និងជើងដោយគន្លឹះទាំងនេះ

ដៃ​ និងជើងរបស់អ្នកជាផ្នែកមួយដែលនៅខាងក្រៅបរិវេណដណ្តប់នៃសម្លៀកបំពាក់ វាមិនចម្លែកទេដែលកន្លែងទាំងពីរនេះទទួលរងនូវការដុតកម្លោចដោយកម្តៅយូវីព្រះអាទិត្យ បណ្តាលឱ្យស្បែកមានាភាពខ្មៅ ឡើងអុចៗ រលាកក្រហម និងមានសភាពក្រិនតិចៗ។

ខណៈដែលស្បែកដៃ​ និងស្បែកជើងរបស់អ្នកទទួលរងការខូចខាតបែបនេះ ប្រហែលជាអ្នកមានអារម្មណ៍មិនសូវល្អ​ក្នុងការតុបតែងខ្លួនស្លៀកសម្លៀកបំពាក់ស្អាតៗ ហើយទៅណាមកណាដោយខ្វះភាពជឿជាក់លើខ្លួនឯង។

ក្រៅពីការមើលថែរក្សាគ្រប់បរិវេណស្បែកនៃដងខ្លួនរបស់អ្នក សូមក្រឡេកមកមើលកន្លែងសំខាន់ក្នុងការថែទាំដូចគ្នា គឺ ស្បែកដៃ និងស្បែកជើង ឱ្យទទួលបានភាពស្រស់ថ្លា ស្មើសាច់ដងប្រាណ។

ឡេឌីស៍សូមចែកជូននូវគន្លឹះខ្លះៗដែលអ្នកអាចអនុវត្តជាប្រចាំ ដើម្បីទទួលបានប្រសិទ្ធិភាពជាទីគាប់ចិត្ត និងស្រស់ស្អាតពិតប្រាកដ។

តាមការស្រាវជ្រាវរបស់យើងខ្ញុំ ដើម្បីកែប្រែស្បែកជាំខ្មៅឱ្យក្លាយទៅជាសស្អាតឡើងវិញព្រមទាំងមិនចាំបាច់ចំណាយថវិកាច្រើន ៖

1. ក្រូចឆ្មារ

សាកល្បងយកក្រូចឆ្មារលាយជាមួយស្ករសរួចយកមកខាត់នៅបរិវេណស្បែកដៃ និងស្បែកជើងដែលមានស្នាមជាំខ្មៅក្រិនតិចៗ ដើម្បីជម្រុះកោសិកាស្បែកចាស់ចេញ។ ខាត់ត្រដុសស្បែកថ្នមៗរយៈពេល ១០នាទី និងផ្អាប់ទុករយៈពេល ១ ទៅ ២ម៉ោង។

ចូរអនុវត្តបែបនេះពេញមួយសប្តាហ៍ នោះអ្នកនឹងសង្កេតឃើញថា ស្បែករបស់អ្នកនឹងសស្អាតដូចសភាពដើមជាក់ជាមិនខានឡើយ។

       2. ទឹកដោះគោជូរ

គុណប្រយោជន៍នៃទឹកដោះគោជូរ គឺជារូបមន្តខាត់ស្បែកតាមបែបធម្មជាតិមួយ ដោយគេយកវាមកលាប និងម៉ាស្សានៅលើបរិវេណស្បែកខ្មៅរួចទុករយៈពេល ១០ ទៅ​ ១៥នាទី បន្ទាប់មកលាងសម្អាតជាមួយទឹកស្អាតជាការស្រេច។

អ្នកអាចអនុវត្តវិធីនេះជាប្រចាំ ១ ​ទៅ​ ២ដងក្នុងមួយថ្ងៃ ដើម្បីឱ្យស្បែកមានសំណើម។

       3. ត្រសក់

សូមចិតត្រសក់ជាចំណិតៗ ហើយយកមកបិទនៅលើបរិវេណស្បែកដែលជាំខ្មៅរយៈពេល ២០នាទី និងធ្វើបែបនេះ ២ ទៅ ៣ដងក្នុងមួយថ្ងៃ ឬ អ្នកអាចប្រើទឹកត្រសក់លាយជាមួយក្រូចឆ្មារផ្សំចូលជាល្បាយមួយ រួចយកមកម៉ាស្សានៅលើស្បែកដៃ និងជើងរយៈពេល ១០ ទៅ ១៥នាទី បន្ទាប់មកលាងទឹកចេញជាការស្រេច។

          4. ប្រទាលកន្ទុយក្រពើ

យកជែលប្រទាលកន្ទុយប្រពើមកត្រដុសពីលើស្បែកដៃ និងស្បែកជើងរយៈពេល ៥ ទៅ​ ១០នាទី រួចផ្អាប់ទុកចោល ៣០នាទី សឹមលាងទឹកចេញ។ គួរបញ្ជាក់ផងដែរថា នៅពេលដែលអ្នកអនុវត្តវិធីនេះហាមចេញទៅក្រៅក្រោមកម្តៅថ្ងៃដាច់ខាត។

         5. ម្សៅសម្បកក្រូច

យកម្សៅសម្បកក្រូច ២ស្លាបព្រា​បាយផ្សំជាមួយទឹកដោះគោជូរ ឬទឹកដោះគោស្រស់ កូរឱ្យសព្វល្បាយ រួចយកមកលាបលើស្បែកដែលមានបញ្ហាអុចខ្មៅៗ និងទុករយៈពេល ២០នាទី។ សូមអនុវត្តវិធីនេះ ១ ទៅ ២ដងក្នុងមួយសប្តាហ៍។

         6.ប៉េងប៉ោះ

ពុះប៉េងប៉ោះជាពីរ រួចយកមកត្រដុះម្រាមដៃ និងម្រាមជើង រួចផ្អាប់ទុករយៈពេល ២ ទៅ ៣នាទី ហើយវិធីនេះអ្នកអាចធ្វើជារៀងរាល់ថ្ងៃនៅមុនពេលអ្នកងូតទឹកនាពេលយប់។