ប្រសិនបើអ្នកមានអាជីពការងារធ្វើនៅកណ្តាលកម្តៅថ្ងៃ ចាំបាច់ណាស់ គួរដឹងអំពីតិចនិកនៅក្នុងការការពារខ្លួននារដូវក្តៅនេះ

កម្តៅសីតុណ្ហាភាពនារដូវក្តៅនេះ មានការកើនឡើងរហូតដល់ 4០អង្សា សាកស្រមៃទៅមើល ប្រសិនបើអ្នកមានមុខរបរជាបុគ្គលិកធ្វើការក្រោមកម្តៅដោយផ្ទាល់ តើអ្នកនឹងទទួលរងការរលាកកម្តៅកម្រិតណាទៅ? មិនត្រឹមតែមានការរលាកខ្លាំងទៅលើរូបរាងកាយនោះទេ កម្តៅថ្ងៃក្តៅខ្លាំងក៏អាចបង្កទៅជាហានិភ័យដល់សុខភាពអ្នកយ៉ាងធ្ងន់ធ្ងរផងដែរ គឺបណ្តាលឱ្យដាច់សរសៃរឈាមខួរក្បាលហូតដល់បាត់បង់ជីវិត។ នៅពេលដែលអ្នកស្ថិតនៅក្រោមកម្តៅថ្ងៃដោយផ្ទាល់ក្នុងរយៈពេលយូរពេក ខ្លួនប្រាណមិនអាចទប់ទល់នឹងភាពក្តៅខ្លាំងបាន វានឹងបញ្ចេញរោគសញ្ញាដូចជា សីតុណ្ហភាពរាងកាយខ្ពស់ខ្លាំង បែកញើសខ្លាំង មានភាពស្លេកស្លាំង រមួលសាច់ដុំ អស់កម្លាំង ស្បែកក្រហម ជីពចរដើរលឿន ឈឺក្បាលវិលមុខ ច្របូកច្របល់ និងពេលខ្លះអាចឈានដល់សន្លប់បាត់បង់ស្មារតី) ។

ដូច្នេះ ប្រសិនបើអ្នកគឺជាបុគ្គលិកមានការងារនៅផ្នែកខាងក្រៅក្រោមកម្តៅថ្ងៃដោយផ្ទាល់ ប្រាកដណាស់អ្នកត្រូវមានការការពារខ្ពស់បំផុត ដើម្បីចៀសវាងពីផលវិបាកចំពោះសុខភាពទាំងឡាយ។

នេះជាដំណឹងល្អដែល ឡេឌីស៍នឹងពាំនាំវិធីសាស្រ្តដ៏មានប្រសិទ្ធភាពជូនលោកអ្នកក្នុងការអនុវត្តន៍នារដូវក្តៅនេះ ៖

១.ប្រើប្រាស់កន្សែងត្រជាក់

បើអាច អ្នកគួរតែមានធុងទឹកកកតូចមួយក្បែរខ្លួន និងកូនកន្សែងដើម្បីជ្រលក់យកមកស្អំនៅលើផ្នែកក្បាលរបស់អ្នកនៅពេលដែលអ្នកគិតថាអ្នកឡើងកម្តៅក្នុងខ្លួនខ្លាំងពេក។ ការធ្វើបែបនេះអាចបញ្ចុះកម្តៅបាន និងធ្វើឱ្យអ្នកមានអារម្មណ៍ស្រស់ស្រាយ។

២.ទទួលទានអាហារសុខភាព

អ្នកគួរតែជ្រើសរើសប្រភេទអាហារណាដែលផ្ទុកជាតិទឹកបានខ្ពស់ និងផ្តល់សីតុណ្ហភាពត្រជាក់ដល់រាងកាយដូចជា ផ្លែឈើស្រស់ បន្លែបៃតង ត្រសក់ សាឡាត់ និងឪឡឹកជាដើម ដើម្បីបំពេញជាតិអេឡិចត្រូលីតរបស់អ្នក។ សូមចៀសវាងអាហារមានជាតិខ្លាញ់ និងអាហារបំពង ព្រោះវានឹងធ្វើឱ្យអ្នកកាន់តែកើនកម្តៅក្នុងខ្លួនទ្វេដង។

 

៣.ផ្តល់ពេលសម្រាកដល់ខ្លួនឯង

ប្រសិនបើអ្នកមានអារម្មណ៍ថាក្តៅខ្លាំងពេក ឬអស់កម្លាំងខ្លាំង សូមផ្តល់ពេលសម្រាកបន្តិចចំពោះខ្លួនឯង ហើយដកដង្ហើមមួយៗ កុំព្យាយាមបង្ខំខ្លួនរហូតដល់កម្រិតមួយដែលអាចធ្វើអោយអ្នកអស់ថាមពលតែម្តងរហូតដល់សន្លប់។

 

៤.ពាក់មួកឱ្យបានជាប់លាប់

សូមធ្វើការពាក់មួកឱ្យបានជាប់លាប់ ដើម្បីការពារក្បាលរបស់អ្នកពីកម្តៅថ្ងៃក្តៅ។ កាលណាក្បាលរបស់អ្នករងកម្តៅថ្ងៃខ្លាំងពេក វានឹងបណ្តាលឱ្យអ្នកវិលមុខ ឈឺក្បាល ប្រកាំង និងអស់កម្លាំងជាដើម។

 

៥.ផឹកទឹកឲ្យបានច្រើន

សូមទទួលទានទឹកឱ្យបានច្រើន ព្រោះកាលណាកម្តៅថ្ងៃកាន់តែកើនឡើង រាងកាយរបស់អ្នកខ្សោះជាតិទឹក ដែលបណ្តាលឱ្យអ្នកមានអាការអស់កម្លាំង ល្ហិតល្ហៃ ឈឺក្បាលខ្លាំង និងស្ងួតបបូរមាត់។ សូមកុំព្យាយាមទទួលទានភេសជ្ជៈដែលមានរសជាតិផ្អែម មានជាតិកាហ្វេអ៊ីន ឬជាតិអាល់កុល អាចត្រឹមតែធ្វើឱ្យអ្នកបាត់ស្រេកទឹកតែមួយភ្លេត ព្រោះបន្ទាប់មកអ្នកនឹងស្រេកទឹកលើសដើម បត់ជើងញឹកញាប់ ដែលជាហេតុធ្វើឲ្យអ្នកកាន់តែបាត់បង់ជាតិទឹកបន្ថែម ដូចនេះអ្វីដែលលោកអ្នកត្រូវការ គឺមានតែទឹកតែមួយមុខគត់។

៦.លាបឡេការពារកម្តៅថ្ងៃ

សូមធ្វើការលាបឡេកម្តៅថ្ងៃទាំងស្បែកមុខ និងស្បែកខ្លួនដើម្បីជៀសវាងពីការដុតកម្លោចសាច់ដោយកម្តៅកាំរស្មីយូវីពីពន្លឺព្រះអាទិត្យ។ មិនថាអ្នកមិនទម្លាប់លាបយ៉ាងណានោះទេ ចូលដល់រដូវក្តៅបែបនេះ ត្រូវតែលាបឡេការពារកម្តៅថ្ងៃ ព្រោះកម្តៅខ្លាំងបែបនេះ អាចបង្កជាផលវិបាកដល់ស្បែក ហើយបើធ្ងន់ធ្ងរអាចបង្កទៅជាមហារីកស្បែកថែមទៀតផង។