សមាគមសិល្បៈ នឹងធ្វើការបោះឆ្នោតជ្រើសរើសប្រធានថ្មីនៅក្រោយចូលឆ្នាំខ្មែរ

តាមការជូនដំណឹងរបស់ ក្រសួងវប្បធម៌និងវិចិត្រសិល្ប: បានឲ្យដឹងថា សមាគមសិល្បករខ្មែរ នឹងរៀបចំការបោះឆ្នោតជ្រើសរើសប្រធានដឹកនាំថ្មីនៅវេលាក្រោយបុណ្យចូលឆ្នាំប្រពៃណីជាតិបានបញ្ចប់ទៅ។

មុនឈានដល់ការរៀបចំការបោះឆ្នោតផ្លូវការមកដល់ កិច្ចប្រជុំមួយ ត្រូវបានរៀបចំឡើង ដើម្បីបង្កើតគណៈកម្មការសម្របសម្រួល ត្រៀមរៀបចំការបោះឆ្នោតជ្រើសរើសប្រធានសមាគមសិល្បករខ្មែរដែលគ្រោងនឹងប្រព្រឹត្តទៅនៅខែឧសភាខាងមុខនេះ។

កិច្ចប្រជុំដែលធ្វើឡើងក្រោមអធិបតីភាពឯកឧត្តម ទិត្យ ថាវរិទ្ធ រដ្ឋលេខាធិការ និងឯកឧត្តម គឹម ពីនន់ អនុរដ្ឋលេខាធិការ ក្រសួងវប្បធម៌ និងវិចិត្រសិល្បៈ រួមជាមួយលោកជំទាវ ចន ច័ន្ទលក្ខិណា ប្រធានសមាគមសិល្បករខ្មែរបច្ចុប្បន្ន បានពិភាក្សាផ្ដោតសំខាន់លើរបៀបវារៈចំនួន៣ គឺ៖

១-បង្កើតគណៈកម្មការរៀបចំការបោះឆ្នោត

២-ពិនិត្យខ្លឹមសារលក្ខន្តិកៈសម្រាប់ការឈរឈ្មោះបោះឆ្នោត និងនីតិវិធីនៃការបោះឆ្នោត។

៣-កំណត់ពេលវេលា ទីកន្លែង និងសមាសភាពនៃអង្គបោះឆ្នោត។

សមាគមសិល្បករខ្មែរ ត្រូវបានបង្កើតឡើងជាដំបូងនៅក្នុងឆ្នាំ២០០៦ ដោយមានការផ្ដួចផ្ដើមគំនិតរបស់អ្នកស្នេហាវិស័យសិល្បៈមួយចំនួន ក្នុងគោលបំណង អភិរក្ស អភិវឌ្ឍន៍ លើកស្ទួយវិស័យសិល្បៈជាតិ និងជួយដោះស្រាយរាល់បញ្ហារបស់អ្នកសិល្បៈ ជាពិសេសជួយដល់អ្នកសិល្បៈចាស់ជរា ពិការបាត់បង់សមត្ថភាព និងបាត់បង់ជីវិត និងរួមចំណែកជួយដល់សង្គមជាតិជាដើម ។

មួយរយៈកន្លងមកនេះ សមាគមសិល្បករខែ្មរ ក៏បានដើរតួនាទីដ៏សំខាន់មួយជាសេនាធិការឱ្យក្រសួងវប្បធម៌និងវិចិត្រសិល្បៈ ក្នុងការចូលរួមបង្កើតសកម្មភាពសិល្បៈនានាដើម្បីការលើកស្ទួយនូវវប្បធម៌ជាតិ ក៏ដូចជាការជួយសម្រួលនូវកិច្ចការលំបាកផ្សេងៗមួយចំនួនរបស់សិល្បករ សិល្បការិនីដែលបានជួបនូវបញ្ហាដូចអ្វីដែលជាគោលការណ៍របស់សមាគមផងដែរ។

នាពេលថ្មីៗនេះ លោកជំទាវ ចនចន្ទ័ លក្ខិណា ជាប្រធានសមាគមនៅក្នុងអាណត្តិក៏បានប្រកាសនឹងមិនឈរឈ្មោះជាបេក្ខភាពសំរាប់បោះឆ្នោតជ្រើសរើសជាប្រធានសមាគមនៅអាណត្តិបន្ទាប់ទៀតនោះទេ។

ក្នុងឆន្ទៈនេះ ជំទាវ បានធ្វើលិខិតទៅកាន់ក្រសួងវប្បធម៌និងវិចិត្រសិល្បៈដែលជាស្ថាប័នអាណាព្យាបាលនូវវិស័យសិល្បៈគ្រប់ទម្រង់ ដើម្បីជួយចាត់តាំងនូវមន្ត្រីជំនាញសម្រាប់ជួយសម្របសម្រួលនូវយន្តការរៀបចំការបោះឆ្នោតនៅពេលខាងមុខឆាប់ៗដើម្បីជ្រើសប្រធានដឹកនាំថ្មីបន្តដឹកនាំសមាគមបម្រើឲ្យប្រយោជន៍សិល្បៈបន្តទៀត។

អំពីតំណែងប្រធានសមាគមសិល្បៈអាណត្តិថ្មី នៅមុននេះ មានការរំជើបរំជួលមួយបានកើតឡើង ក្រោយដំណឹងអាណត្តិចាស់របស់ជំទាវ ចន ច័ន្ទលក្ខិណា បានចប់ ហើយសាធារណជន បានលើកឡើងបេក្ខភាពមួយចំនួនតាមការយល់ឃើញ និងពេញចិត្តរៀងខ្លួន។

អ្នកខ្លះ ជំរុញឲ្យ ខាត់ សុឃីម ឧកញ៉ា ឃ្លោក លោក ដួង សុខគា ម៉េង កែវពេជ្ជតា ជាដើមឲ្យឈរឈ្មោះ។ យ៉ាងណាបេក្ខភាពមួយដែលមានភាពលេចធ្លោ គឺអ្នកឧកញ៉ា ស្រីតូច ចំណាន ដែលជាបេក្ខភាពលើកទឹកចិត្តដោយអតីតនាយករដ្ឋមន្ត្រី សម្ដេចតេជោ ហ៊ុន សែន។

យ៉ាងណា រង់ចាំមើលការបោះឆ្នោតរបស់សមាគម ដែលនឹងរៀបចំឡើងនៅខែឧសភាខាងមុខទាំងអស់គ្នា៕