កាត់បន្ថយហានិភ័យនៃជំងឺមហារីក ដោយគ្រាន់តែបរិភោគផ្លែស្រកានាគ

ផ្លែស្រកានាគ សម្បូរទៅដោយសារធាតុចិញ្ចឹមខ្ពស់ និងសារធាតុប្រឆាំងអុកស៊ីតកម្ម ដែលអាចផ្តល់អត្ថប្រយោជន៍ជាច្រើនដល់សុខភាព។ ការស្រាវជ្រាវមួយចំនួនបង្ហាញថា ការទទួលទានផ្លែស្រកានាគ អាចចូលរួមកាត់បន្ថយហានិភ័យនៃជំងឺមហារីក ជំងឺសរសៃឈាមបេះដូង និងជំងឺទឹកនោមផ្អែម។

បន្ថែមពីនេះ ផ្លែស្រកានាគមានផ្ទុកទៅដោយជាតិសរសៃខ្ពស់ ដែលអាចជួយទ្រទ្រង់ដល់សុខភាពប្រព័ន្ធរំលាយអាហារ ប្រៀបដូចជាផ្លែល្ហុងផងដែរ។

ខាងក្រោមនេះជាហេតុផលមួយចំនួនដែលធ្វើឱ្យផ្លែស្រកានាគជាប់ឈ្មោះជាស្តេចផ្លែឈើ បង្ការហានិភ័យនៃជំងឺមហារីក ៖

សម្បូរទៅដោយសារធាតុប្រឆាំងអុកស៊ីតកម្ម ៖ ផ្លែស្រកានាគមានសារធាតុប្រឆាំងអុកស៊ីតកម្មខ្ពស់ដូចជា វីតាមីន C ដែលដើរតួនាទីយ៉ាងសំខាន់ក្នុងការការពារកោសិកាពីការខូចខាតដែលបណ្តាលមកពីរ៉ាឌីកាល់សេរី ក្នុងការវិវត្តនៃជំងឺមហារីក។

បង្កើនប្រព័ន្ធភាពស៊ាំ ៖ ផ្លែស្រកានាគសម្បូរទៅដោយវីតាមីន និងសារធាតុចិញ្ចឹមផ្សេងៗទៀតដែលអាចជួយទ្រទ្រង់ប្រព័ន្ធការពាររាងកាយឱ្យមានសុខភាពល្អ ហើយមានសារសំខាន់ជាពិសេសចំពោះអ្នកជំងឺមហារីកផងដែរ។

មានលក្ខណៈសម្បត្តិប្រឆាំងនឹងការរលាក ៖ ផ្លែស្រកានាគមានសមាសធាតុដែលមានលក្ខណៈសម្បត្តិប្រឆាំងនឹងការរលាក អាចជួយកាត់បន្ថយការរលាកបង្កជារបួសទាំងផ្នែកខាងក្នុង និងផ្នែកខាងក្រៅពាសពេញរាងកាយ។ ការរលាករ៉ាំរ៉ៃត្រូវបានគេគិតថានឹងរួមចំណែកដល់ការវិវត្តនៃជំងឺមហារីក និងជំងឺរ៉ាំរ៉ៃផ្សេងៗទៀត។

សម្បូរជាតិសរសៃ ៖ ផ្លែស្រកានាគមានជាតិសរសៃខ្ពស់ ដែលអាចជួយជំរុញចលនាពោះវៀនទៀងទាត់ និងជួយដល់សុខភាពប្រព័ន្ធរំលាយអាហារ។ ទាំងនេះអាចបង្ការអ្នកពីមេរោគពោះវៀន ដែលយូរៗទៅអាចឈានដល់ការបង្កឱ្យកើតជាជំងឺមហារីកពោះវៀន។

មានកាឡូរីទាប ៖ ផ្ទុកកាឡូរីទាប ហើយវាក៏ជាអាចជាជម្រើសដ៏ល្អសម្រាប់អ្នកជំងឺមហារីក ដែលប្រហែលជាកំពុងព្យាយាមរក្សាទម្ងន់ឱ្យមានសុខភាពល្អ។

ខណៈពេលដែលការទទួលទានផ្លែស្រកានាគតែមួយមុខ ប្រហែលជាមិនគ្រប់គ្រាន់ក្នុងការបង្ការ ឬព្យាបាលជំងឺមហារីកនោះទេ អ្នកអាចទទួលទានផ្លែស្រកានាគជាមួយរបបអាហារដែលមានតុល្យភាពល្អ និងសម្បូរសារធាតុចិញ្ចឹម នោះទើបផ្លែឈើដ៏អស្ចារ្យនេះក្លាយខ្លួន ផ្នែកមួយនៃផែនការគ្រប់គ្រងជំងឺមហារីកទាំងមូល៕