ការពិតគួរឱ្យចាប់អារម្មណ៍ទាំង ៦ យ៉ាង អំពីមហោស្រពភាពយន្តទីក្រុងកាន Cannes Film Festival

ជារៀងរាល់ឆ្នាំ ព្រឹត្តិការណ៍មហោស្រពភាពយន្តទីក្រុងកាន តែងតែប្រព្រឹត្តឡើងរយៈពេល ២ សប្តាហ៍។ ព្រឹត្តិការណ៍នេះ ប្រមូលផ្តុំទៅដោយផលិតករ សិល្បករ​ សិល្បការិនី ល្បីៗ មកពីជុំវិញពិភពលោក។ Cannes Film Festival ឆ្នាំ២០២៤នេះ​ ជាមហោស្រពភាពយន្តលើកទី ៧៧ គិតចាប់តាំងពីពេលដែលបានធ្វើឡើងដំបូងមក។

ខាងក្រោមនេះជាចំណុចគួរឱ្យចាប់អារម្មណ៍ទាំង ៧ អំពីមហាស្រពភាពយន្តទីក្រុងកាន ៖

កម្រាលព្រំក្រហម

Cannes Film Festival បានរៀបចំកម្រាលព្រំក្រហម សម្រាប់ទទួលភ្ញៀវកិត្តិយសរបស់ពួកគេដែលមកចូលរួម។ អ្នករៀបចំកម្មវិធី បានប្រើកម្រាលព្រំ​ក្រហមប្រវែងប្រហែល ២ គីឡូម៉ែត្រ ហើយផ្លាស់ប្តូរកម្រាល ៣​ដងក្នុងមួយថ្ងៃ ដើម្បីរក្សាកម្រាលឱ្យនៅស្អាត។

ប្រព័ន្ធផ្សព្វផ្សាយចម្រុះ

ជារៀងរាល់ឆ្នាំ មហាស្រពភាពយន្តកាន មានអ្នកកាសែតចូលរួមចន្លោះពី ៣០០០ ទៅ ៤០០០នាក់។ ក្រៅពីនោះ មានការចូលរួមពីផលិតករភាពយន្ត តារាសម្តែង និង អ្នកគាំទ្រ ច្រើនជាង ២សែននាក់ មកពីជុំវិញពិភពលោក ដែលធ្វើឱ្យ Cannes Film Festival ជាព្រឹត្តិការណ៍ media event ដែលមានអ្នកចូលរួមច្រើនបំផុតទី២​ បន្ទាប់ពីព្រឹត្តិការណ៍ អូឡាំពិក។

ពានរង្វាន់ Palme d’Or

ពានរង្វាន់ដែលខ្ពស់បំផុតនៅក្នុងមហោស្រពភាពយន្តទីក្រុងកាន គឺជាពាន Palme d’Or (Golden Palm)។ ពាននេះត្រូវបានបង្កើតឡើងនៅក្នុងឆ្នាំ ១៩៥៥ នៅពេលដែលអ្នករៀបចំកម្មវិធីបានស្នើឱ្យអ្នកច្នៃម៉ូតគ្រឿងអលង្ការ រចនាម៉ូតពាននេះឡើងមក។ ចាប់តាំងពីឆ្នាំ ១៩៩៧ ពាន Palme d’Or ត្រូវបានផលិតដោយក្រុមហ៊ុន Chopard របស់ស្វីស ដោយធ្វើឡើងពីមាស ១៨ការ៉ាត់ និងមានតម្លៃប្រហែល ២២០០០ ដុល្លារ។ ទោះបីជាពាននេះត្រូវបានធ្វើឡើងពីមាស និងមានតម្លៃដល់ខ្ទង់មុឺនដុល្លារក្តី ប៉ុន្តែសម្រាប់អ្នកដែលនៅក្នុងវិស័យភាពយន្តចាត់ទុកពាននេះ គឺមានន័យលើសពីតម្លៃរបស់វាទៅទៀត ពោលគឺមិនអាចកាត់ថ្លៃបាន។

ការរួមបញ្ចូលភាពយន្តអន្តរជាតិ

នៅក្នុងឆ្នាំ ២០១០ ភាពយន្តអន្តរជាតិ ដែលនិយាយ ៦ ភាសាផ្សេងគ្នា ត្រូវបានបន្ថែមចូលទៅក្នុងព្រឹត្តិការណ៍ភាពយន្តទីក្រុងកាន។

បញ្ហានយោបាយ

មហោស្រពភាពយន្តទីក្រុងកាន​ ដំបូងបង្អស់ ត្រូវបានរំសាយចោលវិញ ត្រឹមរយៈពេល ២ថ្ងៃ បន្ទាប់ពីបានចាប់ផ្តើម។ ដោយនៅក្នុងឆ្នាំ ១៩៣៩ ប្រទេសអាល្លឺម៉ង់ បានចូលឈ្លានពាន ប៉ូឡូញ នៅប៉ុន្មានថ្ងៃប៉ុណ្ណោះ ក្រោយមហោស្រពភាពយន្តទីក្រុងកាន បានចាប់ផ្តើមកម្មវិធីរបស់ខ្លួន។ Cannes Film Festival ត្រឡប់មកវិញជាថ្មីនៅក្នុងឆ្នាំ ១៩៤៦ ដោយបានប្រគល់ពាន Palm d’Or ចំនួន ១១ ទៅកាន់ផលិតករ និង តារាសម្តែងឆ្នើមនៅក្នុងវិស័យភាពយន្ត។

ព្រឹត្តិការណ៍ដែលចំណាយលុយច្រើន ដើម្បីរៀបចំ

បើទោះបីជាភាពយន្តជាច្រើន ដែលយកមកបញ្ចាំងនៅក្នុងមហោស្រពភាពយន្តទីក្រុងកាន ជាប្រភេទរឿងខ្នាតតូច ផលិតដោយផលិតករឯករាជ្យ ក៏ដោយ ប៉ុន្តែការចំណាយក្នុងការរៀបចំព្រឹត្តិការណ៍នេះ គឺមិនតូចនោះទេ។ Cannes Film Festival ចំណាយប្រាក់ប្រមាណ ២២លានដុល្លារ ដើម្បីដំណើរការរៀបចំកម្មវិធីមួយនេះ។ ពាក់កណ្តាលនៃលុយសម្រាប់រៀបចំ បានមកពីការមូលនិធិសាធារណៈ និង ពាក់កណ្តាលទៀត បានមកពីដៃគូសហការ ផ្លូវការ។ កាលពី​ឆ្នាំ ២០២២ កន្លងទៅ មហោស្រពភាពយន្តទីក្រុងកាន មានដៃគូសហការផ្លូវការធំៗ ដូចជា BMW Chopard និង TikTok៕