ខ្មែរ
English
ថ្លែងនៅក្នុងកម្មវិធី “នារីរតនៈ” របស់ក្រសួងកិច្ចការនារី លើប្រធានបទ «ស្រ្តី និងក្មេងស្រី ក្រោមប្រធានបទ “បរិវត្តកម្មឌីជីថល” ស្រីនា បានបើកទូលាយប្រវត្តិនៃការចាប់ផ្ដើមរបស់នាងក្នុងនាមជាអ្នកផលិតមាតិកាវីដេអូលើបណ្ដាញសង្គមមួយរូប ថាដំបូងឡើយនាងកើតចេញពីការលួចគ្រឿងសម្អាងរបស់ម្ដាយមកថតប៉ុណ្ណោះ។
កញ្ញា ជា ស្រីនា ជាអ្នកបង្កើតមាតិកាលើបណ្តាញសង្គមដ៏ល្បីល្បាញសម្រាប់យុវវ័យសម័យសង្គមឌីជីថលនេះ។ មាតិកាដែលកញ្ញាបានផលិតក្នុងការផុសទៅលើប្រព័ន្ធបណ្តាញសង្គមអនឡាញ ទំនោរច្រើនទៅខាង ការចែករំលែកចំណេះដឹងល្អៗ មាតិកាទាក់ទងនឹងអាជីវកម្ម និងមាតិកាតុបតែងមុខ ខ្លួនប្រាណរួមទាំងស្ទីលសម្លៀកបំពាក់ស្រ្តីៗ។
ត្បិតថាបច្ចុប្បន្ន ស្រីនា ត្រូវបានគេស្គាល់ថាជាអ្នកផលិតមាតិកាវីដេអូលើបណ្ដាញសង្គម ឬហៅថា Influencer ល្បីមួយរូប ប៉ុន្តែត្រឡប់ទៅដល់ការចាប់ផ្ដើមរបស់នាង គឺនាងមិនបានត្រៀមអ្វីគ្រប់យ៉ាង ដឹងអ្វីគ្រប់យ៉ាងនោះទេ គឺនាងផ្ដើមដោយការលួចយកគ្រឿងសម្អាងម្ដាយនាងមកថតវីដេអូតែម្ដង។
កញ្ញាបានបន្តទៀតថា ដោយសារតែមានការចាប់ផ្តើមជំហានតូចតាចបែបនេះហើយទើបធ្វើឱ្យកញ្ញាជោគជ័យ និងក្លាយខ្លួនជាអ្នកចែករំលែកមាតិតានៅលើបណ្តាញសង្គមដល់សព្វថ្ងៃនេះ។
ដោយហេតុដែលកញ្ញាទទួលបានជោគជ័យនៅលើវិថីមួយនេះហើយ ទើបកញ្ញាមានការលើកទឹកចិត្តជូនដល់ស្ត្រីវ័យក្មេងស្រស់ស្អាតគ្រប់រូបឱ្យមានភាពក្លាហានក្នុងការសម្រេចនូវក្តីស្រមៃរបស់ខ្លួនដែលចង់ធ្វើវានៅក្នុងវិស័យនេះ។
នៅក្នុងសម័យសង្គមឌីជីថល គឺពិតជាបានផ្តល់ឱកាសយ៉ាងពេញលេញដល់យុវនារីក្នុងការក្លាយខ្លួនជាអ្នកបង្កើតមាតិកាផ្សេងៗ ការធ្វើអាជីវកម្ម ទេពកោសល្យផ្សេងៗ រួមទាំងការចែករំលែកប្រធានបទចំណេះដឹងល្អៗទៅកាន់ប្រជាជនដែលប្រើប្រាស់ណ្តាញសង្គម ជាពិសេសមិនមានការប៉ះពាល់ទៅដល់កិត្តិយសសង្គម និងឈរនៅលើគោលជំហរស្មើៗគ្នា។
កញ្ញាបានឡើងនិយាយបន្ត “ក្នុងនាមយើងជាស្រ្តីវ័យក្មេងស្រស់ស្អាត យើងតែងមានក្តីស្រមៃចង់ធ្វើរឿងជាច្រើន ដូច្នេះហើយនៅក្នុងសម័យបរិវត្តកម្មឌីជីថល គឺជាឱកាសល្អជូនដល់ស្រ្តីគ្រប់រូបក្នុងការប្រកបអាជីវកម្ម ឬអាចចែករំលែកនូវអ្វីដែលយើងមាន រួមទាំងបង្កើតមាតិកាល្អៗដល់អ្នកប្រើប្រាស់ផ្សេងទៀត”។
កញ្ញា ជា ស្រីនា បានជំរុញថា សូមកុំមានការខ្មាស់អៀន ភាពភ័យខ្លាច និងតែងគិតថាខ្លួនមិនទាន់ចេះអ្វីឱ្យសោះទើបមិនហ៊ានចាប់ផ្តើម។ នាងបានលើកបន្ថែមថា ចំណុចទាំងនោះគ្រាន់តែជាការបង្អាក់ដំណើរការអ្នកទាំងអស់គ្នានោះទេ នាងបន្តថា ឱ្យតែមានការខិតខំ និងចែករំលែកជាវារៀងរាល់ថ្ងៃ និងនៅតែស្រឡាញ់ ធ្វើវាចេញពីបេះដូង កញ្ញាជឿជាក់ថាអ្នករាល់គ្នាប្រាកដជាទទួលបានជោគជ័យនៅថ្ងៃណាមួយជាក់ជាមិនខាន៕
