កំពង់ផែទេសចរណ៍ខេត្តកំពត តម្លៃជាង ៩លានដុល្លារ នឹងចាប់ផ្តើមដំណើរការនៅត្រីមាសទី៣ ឆ្នាំនេះ

កំពង់ផែទេសរណ៍​ខេត្ត​កំពត​ដែល​បាន​បញ្ចប់​ការ​សាងសង់​នៅ​ឆ្នាំ ២០២២ កំពុង​​ឈានទៅជ្រើសរើស​ក្រុមហ៊ុន​ប្រតិបត្តិករ និង​គ្រោង​ដាក់​ឲ្យ​ប្រើប្រាស់​ជាផ្លូវការ​នៅ​ចុង​ឆ្នាំ ២០២៤។ កំពង់ផែទេសចរណ៍អន្តរជាតិកំពតត្រូវបានសាងសង់ក្រោមជំនួយពីធនាគារអភិវឌ្ឍន៍អាស៊ី និងរាជរដ្ឋាភិបាលដែលមានតម្លៃប្រមាណ ៩,២៧លានដុល្លារអាមេរិក។ គម្រោងនេះនឹង​ចាប់ផ្តើម​ប្រតិបត្តិការ​នៅ​ត្រីមាស​ទី​៣​ ​ឆ្នាំ​២​០​២​៤​ ​ដែល​បម្រើ​ជា​ច្រក​សម្រាប់​នាវា​ទេសចរណ៍​ដែល​តភ្ជាប់​ប្រទេស​ថៃ​ ​និង​វៀតណាម​ជាមួយ​កម្ពុជា​។​

តាមរយៈកំពង់ផែទេសចរណ៍ខេត្តកំពត នឹងដើរតួនាទីសំខាន់សម្រាប់ជំរុញកំណើនសេដ្ឋកិច្ចជាតិ តាមរយៈសម្របសម្រួលពាណិជ្ជកម្មជាតិនិងអន្តជាតិ ការទាក់ទាញអ្នកទេសចរ ការបង្កើតការងារដល់ពលរដ្ឋនិងការតភ្ជាប់កំពង់ផែក្នុងប្រទេសទៅប្រទេសក្នុងតំបន់និងអន្តរជាតិ ។

បើតាមក្រសួងសាធារណការ និងដឹកជញ្ជូន បច្ចុប្បន្នមានកំពង់ផែនិងចំណតផែសរុប ១១៩ កន្លែង ក្នុងនោះកំពង់ផែអន្តរជាតិមានចំនួន ២ កន្លែង ដែលមានកំពង់ផែស្វយ័តភ្នំពេញ (កំពង់ផែទឹកសាប) និងកំពង់ផែស្វយ័តខេត្តព្រះសីហនុ (កំពង់ផែសមុទ្រ)។ កំពង់ផែនិងចំណតផែនៅតាមដងទន្លេមានចំនួន ៨៨ កន្លែង និងនៅតាមឆ្នេរសមុទ្រមានចំនួន ៣១ កន្លែង។

 យោងតាមកិច្ចព្រមព្រៀងហិរញ្ញប្បទានរវាងរាជរដ្ឋាភិបាលកម្ពុជា និងធនាគារអភិវឌ្ឍន៍អាស៊ី តម្រូវឲ្យមានការដេញថ្លៃជាសាធារណៈ ស្របតាមក្របខ័ណ្ឌភាពជាដៃគូររវាងរដ្ឋនិងឯកជន ដោយត្រូវជ្រើសរើសក្រុមហ៊ុនវិនិយោគឯកជនដែលមានទុនវិនិយោគ និងបទពិសោធគ្រប់គ្រាន់ធ្វើជាប្រតិបត្តិករកំពង់ផែនេះ។  បច្ចុប្បន្នរដ្ឋាភិបាលកំពុងបិទបញ្ចប់នីតិវិធីជ្រើសរើសក្រុមហ៊ុនប្រតិបត្តិករ គ្រោងនឹងចុះហត្ថលេខាលើកិច្ចព្រមព្រៀងជាមួយក្រុមហ៊ុនវិនិយោគក្នុងត្រីមាសទីពីរឆ្នាំ ២០២៤ និងដាក់ឲ្យដំណើរការបណ្ដោះអាសន្នក្នុងត្រីមាសទីបីឆ្នាំ ២០២៤ មុនឈានដាក់ឲ្យប្រើប្រាស់ជាផ្លូវការនៅចុងឆ្នាំ ២០២៤។

ដើម្បីធានាឲ្យកំពង់ផែមានសុវត្ថិភាពល្អមាននិរន្តរភាព សម្រាប់នាវាគ្រប់ប្រភេទធ្វើចរាចរណ៍ដោយរលូន រាជរដ្ឋាភិបាលតម្រូវឲ្យក្រុមហ៊ុនប្រតិបត្តិករកំពង់ផែអនុវត្តភារកិច្ចចាំបាច់មួយចំនួន ដូចជាការជីកបូមស្តារផ្លូវទឹកឲ្យបានធំទូលាយ ការសិក្សាបន្ថែមលើបច្ចេកទេសនាវាចរណ៍ ការបំពាក់ឧបករណ៍សញ្ញាជំនួយនាវាចរណ៍ និងការវិនិយោគមួយចំនួនលើហេដ្ឋារចនាសម្ព័ន្ធសុវត្ថិភាពកំពង់ផែ ដើម្បីធានាបានថាកំពង់ផែនេះក្លាយជាកំពង់ផែទេសចរណ៍អន្តរជាតិពេញលេញ ស្របតាមបទដ្ឋានបច្ចេកទេសជាតិនិងអន្តរជាតិ។

សូមជម្រាបផងដែរថា កំពង់ផែទេសរណ៍​ខេត្ត​កំពត បានបើកការសាងសង់កាលពីថ្ងៃទី ៨ ខែសីហា ឆ្នាំ ២០១៨ និងបានបញ្ចប់ការសាងសង់ជាស្ថាពរកាលពីថ្ងៃទី ៣០ ខែមិថុនា ឆ្នាំ ២០២២ ដែលស្ថិតនៅក្នុងស្រុកទឹកឈូ ខេត្តកំពត លើផ្ទៃដី ៤,២៥ ហិកតា។