ក្រសួងកិច្ចការនារី ផ្ញើសារ​អបអរសាទរ ល្អហួស ក្រោយ​សម្រេច​បាន​លទ្ធផលល្អជូនជាតិមាតុភូមិ

មិនមែនជារឿងសាមញ្ញពេកទេ ដែល​ព្រឹក​នេះ ក្រសួង​កិច្ចការនារី បាន​ផ្ញើសារ​ដោយ​ត្រង់​មក​កាន់​សិល្បការិនី​ម្នាក់ គឺ​កុមារី ល្អហួស ក្រោយ​ពី​នាង​បង្កើត​មោទកភាពថ្មី​អោយ​ពលរដ្ឋកម្ពុជា​ដោយ​ការ​ឈ្នះ​មកុដ​ក្នុង​កម្មវិធីកម្រិតអន្តរជាតិ។

ក្រសួងកិច្ចការនារី បង្ហោះសារ​ប្រមាណ១ម៉ោងមុន​នៅ​ព្រឹកថ្ងៃ​ទី ០២ មេសា ២០២៤ ពោល​គឺ​ក្រោយ ១ថ្ងៃ បន្ទាប់​ពីកុមារី ជូរី ល្អហួស ឈ្នះមកុដក្នុងកម្មវិធី Miss Pre Teen Junior Idol World 2024។

 

ដោយ​ភ្ជាប់ជាមួយ​រូប​ភាព​មួយ​សន្លឹក ដែល​ត្រូវ​បាន​រចនាជាពិសេស​មាន​រួម​បញ្ចូល​រូប​ ល្អហួស ឈ្នះជ័យលាភី និង​រូបកុមារី​គ្រងឈុត “​អធិរាជិនីហង្សាវតីស្រីកម្ពុជា” និង​រំលេច​ដោយ​ផ្កា​រំដួល​ជា​គ្រឿង​លម្អផង ក្រសួងបានសរសេរថា “អបអរសាទរ Laor Hours ល្អហួស ដែលបានក្លាយជាម្ចាស់ជ័យលាភី Miss Preteen Junior Idol World 2024”។

ជាមួយគ្នា មាន​ប្រិយមិត្តជាច្រើន​បាន​ចូល​ទៅ​សរសេរ​បន្ទរ​ ដោយ​ម្នាក់​ៗថ្លែង​ពី​មោទកភាពជាតិ សម្រាប់​កុមារី​ ល្អហួស ដែល​ទើប​មាន​វ័យ​ក្មេង​ខ្ចីសោះតែ អាច​សម្រេច​ស្នាដៃលើកមុខមាត់ជាតិ​លើ​ឆាក​អន្តរជាតិ​យ៉ាង​ដូច្នេះសោះ។

 

ក្រោយ​ឈ្នះ​ជ័យលាភី​នៅ​លើ​ទឹក​ដីថៃ កុមារី ជូរី ល្អហួស គ្រោង​នឹង​វិល​ត្រឡប់​មក​ដល់​ប្រទេស​កំណើត​វិញ​នៅ​រសៀល​ថ្ងៃ​ទី ០២ មេសា​នេះ៕