ក្រុមហ៊ុនវិនិយោគបរទេសជាង ៧០% មានសុទិដ្ឋិនិយមចំពោះឱកាសទីផ្សារនៅប្រទេសចិន

ក្រុមប្រឹក្សាចិនសម្រាប់ការលើកកម្ពស់ពាណិជ្ជកម្មអន្តរជាតិ (CCPIT) បាននិយាយកាលពីថ្ងៃ អាទិត្យ ទី២៨ ខែមេសា ឆ្នាំ២០២៤ ថា ជាង ៧០% នៃក្រុមហ៊ុនវិនិយោគបរទេសនៅក្នុងប្រទេសចិនមានសុទិដ្ឋិនិយមចំពោះកំណើនទីផ្សារចិនក្នុងរយៈពេល ៥ ឆ្នាំខាងមុខ ហើយបានកើនឡើងចំនួន ៣,៨% ធៀបនឹងឆ្នាំមុន។

ទោះបីជាសហរដ្ឋអាមេរិក និងសហភាពអឺរ៉ុប ដាក់សម្ពាធជាបន្តបន្ទាប់លើប្រទេសចិនក៏ដោយ ក៏អ្នកវិនិយោគនៅតែរក្សាទំនុកចិត្តរបស់ពួកគេចំពោះឱកាសដែលបង្ហាញដោយសេដ្ឋកិច្ចធំទីពីររបស់ពិភពលោកនេះ។ ទីផ្សារ​របស់​ប្រទេស​ចិន​បាន​មើល​ឃើញ​ពីការ​កើនឡើង​នៃ​ការ​វិនិយោគ​បរទេស​ចាប់​តាំង​ពី​ត្រីមាស​ទីមួយ​នៃ​ឆ្នាំ ២០២៤។

ក្រុមហ៊ុនវិនិយោគបរទេសជាង ១២.០០០ ត្រូវបានបង្កើតថ្មីក្នុងត្រីមាសទី១ នៃឆ្នាំ២០២៤ នេះ ដោយមានការកើនឡើងចំនួន ២០,៧% ធៀបនឹងឆ្នាំមុន ជាមួយនឹងការដាក់ វិនិយោគ ៣០១,៦៧ ប៊ីលានយន់ (៤២,៥ ប៊ីលានដុល្លារ) កើនឡើង ៤១,៧% ធៀបនឹងត្រីមាសទី៤ នៃឆ្នាំ២០២៣  នេះជាការបញ្ជាក់របស់ ក្រសួងពាណិជ្ជកម្ម។ ក្នុងនោះក្រសួងក៏បានលើកឡើងផងដែរថា ភាពទាក់ទាញនៃវិស័យផលិតកម្មរបស់ប្រទេសចិន ចំពោះអ្នកវិនិយោគបរទេសក៏កំពុងកើនឡើងផងដែរ៕