គន្លឹះទាំងនេះ អាចជួយកាត់បន្ថយចំណង់.. បរិភោគអាហារដែលមិនល្អចំពោះសុខភាព (JUNK FOODS)

Junk Food គឺជាពាក្យដែលប្រើជាទូទៅសំដៅទៅលើប្រភេទអាហារ និងភេសជ្ជៈសម្រន់កៃច្នៃ រួមមាន អាហារបំពង Fast Food (មាន់បំពង បឺហ្គឺ ភីស្សា…) ភេសជ្ជៈកំប៉ុង (សូដា ទឹកក្រូច ស្រាបៀរ) ស្ករគ្រាប់ នំផ្អែមខូគី ការ៉េម ដំឡូងបារាំងកញ្ចប់ និងអាហារសម្រន់ដែលមានជាតិប្រៃខ្លាំង… ។ អាហារទាំងអស់នេះ បានចូលរួមជាផ្នែកមួយនៃរបបអាហារប្រចាំថ្ងៃរបស់មនុស្សគ្រប់ៗគ្នាទៅហើយ ហើយនេះជារឿងមិនល្អ វាពិតបង្កផលប៉ះពាល់ដល់សុខភាពយ៉ាងខ្លាំង។

ការស្រាវជ្រាវជាច្រើនបានលើកបង្ហាញថា អាហារឥតបានការ (អាហារមិនល្អចំពោះសុខភាព) មានប្រមាណជិត 50% នៃបរិមាណកាឡូរីប្រចាំថ្ងៃនៅក្នុងរាងកាយមនុស្សយើង។

កាលណាអ្នកទទួលទានរបបអាហារឥតបានការចំពោះសុខភាពច្រើន វាអាចបង្កជាផលប៉ះពាល់ដល់សុខភាពរួមមាន ៖ ជំងឺធាត់ជ ជំងឺបេះដូង និងជំងឺមហារីក ជំងឺធ្លាក់ទឹកចិត្ត ឡើងជាតិខ្លាញ់នៅក្នុងសរសៃឈាម និងជាតិស្ករក្នុងឈាមខ្ពស់។

សូមក្រឡេកមើលគន្លឺះមួយចំនួនខាងក្រោម អាចជួយឱ្យអ្នកកាត់បន្ថយការទទួលទានរបបអាហារ JUNK FOOD បាន ៖

ចំអិនអាហារនៅផ្ទះ
ការខិតខំប្រឹងប្រែងចម្អិនម្ហូបដោយផ្ទាល់ខ្លួននៅផ្ទះគឺជាវិធីដ៏ល្អបំផុតមួយដើម្បីកាត់បន្ថយអាហារឥតប្រយោជន៍។ ការចម្អិនកាន់តែច្រើននៅផ្ទះ រួមទាំងការរៀបចំអាហារ អាចជួយបន្ថយការកុម្ម៉ង់អាហារពីខាងក្រៅ និងធានាបានថាអ្នកតែងតែទទួលទាននូវរបបអាហារដែលមានសុខភាពល្អ។ ការសិក្សាជាច្រើនបានរកឃើញថា អ្នកដែលចំអិនអាហារដោយផ្ទាល់ខ្លួនឯងច្រើនទទួលបានរបបអាហារមានគុណភាពល្អ បូកផ្សំទាំងការទទួលទានបន្លែ ផ្លែឈើកាន់តែច្រើនបានកាត់បន្ថយអត្រានៃជំងឺធាត់។

ទទួលទានប្រូតេអ៊ីនបន្ថែម
ប្រូតេអ៊ីនគឺជាសារធាតុចិញ្ចឹមដែលផ្តល់ថាមពលឆ្អែតបំផុត និងមានឥទ្ធិពលខ្លាំងទៅលើជម្រើសរបបអាហាររបស់អ្នក។ ការបង្កើនការទទួលទានប្រូតេអ៊ីន គឺជាមធ្យោបាយដ៏មានប្រសិទ្ធភាពមួយដើម្បីចូលរួមកាត់បន្ថយចំណង់បរិភោគអាហារសម្រន់ដែលមានជាតិខ្លាញ់ និងជាតិផ្អែមច្រើន។

ទទួលទានដំណេកឱ្យបានគ្រប់គ្រាន់
ការគេង គឺចាំបាច់បំផុតសម្រាប់សុខភាពខួរក្បាល និងរាងកាយហើយការបង្អត់ខ្លួនឯងមិនឱ្យទទួលទានដំណេកប្រកបដោយគុណភាពអាចជះឥទ្ធិពលអវិជ្ជមានដល់ការជ្រើសរើសរបបអាហាររបស់អ្នក និងបង្កើនចំណង់អាហារមិនល្អប៉ះពាល់ដល់សុខភាព។

កុំព្យាយាមបង្អត់អាហារភ្លាមៗ
បើទោះបីជាអ្នកមានគម្រោងក្នុងការសម្រកគីឡូក៏ដោយ សូមកុំធ្វើការបង្អត់អាហារចំពោះខ្លួនឯងភ្លាមៗ ព្រោះប្រសិនបើអ្នកធ្វើបែបនេះក្រពះអ្នកនឹងរងការឃ្លានខ្លាំងមិនអាចទ្រាំបាន ជាហេតុបណ្តាលឱ្យអ្នកឃ្លាននេះឃ្លាននោះ។ សូមកំណត់របបអាហារ Diet ឱ្យបានត្រឹមត្រូវតាមក្បួនខ្នាត និងធ្វើវាម្តងបន្តិចៗកុំបង្ខំខ្លាំងពេក។