ញ៉ាំទឹកក្តៅឧណ្ណៗរាល់ថ្ងៃ… តើនឹងមានអ្វីកើតឡើងចំពោះរាងកាយ?

ទឹកក្ដៅឧណ្ហៗ ពិតជាផ្ដល់អត្ថប្រយោជន៍ដ៏អស្ចារ្យចំពោះសុខភាព។ ការទទួលទានទឹកក្ដៅឧណ្ហៗជាប្រចាំ មានគុណសម្បត្តិជាច្រើន ដោយអ្នកមិនចាំបាច់ព្រួយឡើងទម្ងន់ និងដុះក្បាលពោះ ជាពិសេសការញ៉ាំទឹកក្ដៅអាចជួយសម្រួលដល់ប្រព័ន្ធរំលាយអាហារដំណើរការបានល្អ កិនអាហារបានលឿន បញ្ចេញកាកសំណល់ និងលាងសម្អាតកាកសំណល់ចាស់ៗដែលជាប់ស្អិតនឹងពោះវៀន។

ប៉ុន្តែបើទោះជាទទួលទានទឹកក្តៅ មានគុណប្រយោជន៍ច្រើនក៏ពិតមែន អ្នកក៏គួរកំណត់ស្ថានភាព បរិមាណ និងពេលវេលាក្នុងការទទួលទានឱ្យបានសមស្រប និងត្រឹមត្រូវ ខណៈផឹកទឹកក្តៅពេក អាចបំផ្លាញកោសិកាក្នុងបំពង់អាហារយើងបាន ធ្វើឲ្យរលាកអណ្តាត បង្កជារបួសថែមទៀត។ អ្នកគួរបង្កើនការប្រុងប្រយ័ត្នឲ្យបានខ្ពស់ពេលផឹកទឹកក្តៅ ជាពិសេសសូមពិនិត្យទៅលើសីតុណ្ហភាពនៃទឹកឲ្យបានត្រឹមត្រូវ។

ខាងក្រោមនេះ ជាបណ្តុំគុណប្រយោជន៍នៃការទទួលទានទឹកក្តៅឧណ្ណៗចំពោះសុខភាពរាងកាយ ៖

ជួយសម្រួលប្រព័ន្ធរំលាយអាហារ

ផឹកទឹកក្តៅ ជួយសម្រួលដល់ការបន្ទោបង់ និងដំណើរការប្រព័ន្ធរំលាយអាហារបានល្អ។ សារធាតុទឹកគ្រប់ប្រភេទ អាចបង្កើនជាតិរំអិល ជួយឲ្យដំណើរការរំលាយអាហារប្រសើរឡើង ដោយសារទឹក នឹងហូរតាមរយៈក្រពះ និងពោះវៀន ក៏ដូចជាសរីរាង្គរំលាយអាហារផ្សេងទៀត។

ជួយសម្រកទម្ងន់

ផឹកទឹកក្តៅ អាចជួយធ្វើឱ្យប្រព័ន្ធគ្រប់គ្រងកម្តៅក្នុងរាងកាយធ្វើការបានល្អ។ នៅពេលដែលរាងកាយបញ្ចេញសកម្មភាពដើម្បីស្របទៅជាមួយកម្ដៅទឹក នាំឲ្យសីតុណ្ហភាពខាងក្នុងធ្លាក់ចុះ អាចជួយដាស់ប្រព័ន្ធមេតាបូលីសដំណើរបានការតែខ្លាំង ដែលជាហេតុធ្វើឱ្យអ្នកស្រកទម្ងន់ដោយសុវត្ថភាព។

កាត់បន្ថយជាតិពុល

នៅពេលដែលអ្នកផឹកទឹកក្តៅ រាងកាយរបស់អ្នកនឹងធ្វើសកម្មភាព ដោយចាប់ផ្តើមបែកញើស ដែលបញ្ចេញជាតិពុលមកខាងក្រៅអស់ មិនកកស្ទះនៅក្នុងរាងកាយ បណ្តាលឱ្យកើតជំងឺផ្សេងៗ។

ចរន្តឈាមដើរបានល្អ

ផឹកទឹកក្តៅ អាចជួយឲ្យចរន្តឈាមរត់បានស្រួល និងជំនួយឱ្យពង្រីកលំហូរឈាម ទៅចិញ្ចឹមគ្រប់សាពាង្គកាយ។ បន្ថែមពីនេះ ទទួលទានទឹកក្តៅអាចធ្វើរាងកាយឡើងកំដៅ ជួយទប់ទល់នឹងអាកាសធាតុត្រជាក់ក្នុងរដូវរងារទៀតផង។

ប្រឆាំងជំងឺផ្តាសាយ

ផឹកទឹកក្តៅ ក៏អាចគឺជួយបន្ធូរបន្ថយអាការតឹងច្រមុះ ការពារអ្នកពីគ្រុនផ្ដាសាយ និងកម្ចាត់មូលហេតុដែលបង្កឱ្យមានស្លេស្មក្នុងរន្ធច្រមុះ (សម្បោរ) រួមទាំងស្លេស្ម និងកំហាកចេញពីផ្លូវដង្ហើមផងដែរ។