ដំណោះស្រាយបញ្ហារលាក រោល… ដែលបណ្តាលមកពីខោទឹកនោមទារក

ការសម្អាតខោទឹកនោមរបស់ទារកឱ្យបានស្អាត និងមានអនាម័យល្អអាចធ្វើឱ្យទារកមានភាពរីករាយ និងទទួលបានផាសុកភាពល្អ។ បញ្ហាការរលាករោលដែលបណ្តាលមកពីខោទឹកនោម គឺជាករណីដែលតែងមានឡើងជាទូទៅចំពោះទារកគ្រប់រូប ហើយបញ្ហានេះគឺបណ្តាលមកពីបញ្ហាជាច្រើនយ៉ាងផ្សេងគ្នា។

បើទោះបីជាអ្នកម្តាយមានការផ្លាស់ប្តូរខោទឹកនោមទារកញឹកញាប់ជាប្រចាំ រួមទាងប្រើប្រាស់នូវផលិតផលបែបធម្មជាតិយ៉ាងណាក៏ដោយ ក៏នៅតែមិនអាចចៀសផុតពីបញ្ហាទាំងអស់នេះឡើយ។ អ្នកប្រាកដជាឆ្ងល់ហើយថា តើគួរព្យាបាលបញ្ហារលាករោលនេះនៅផ្ទះដោយរបៀបណា?

មធ្យោបាយដែលល្អគឺ ចេះចាប់អារម្មណ៍ទៅលើរឿងអនាម័យចំពោះទារក និងព្យាយាមស្វែងរកមូលហេតុដែលបណ្តាលឱ្យកើតមានបញ្ហានេះ ហើយរកដំណោះស្រាយដោយវិធីងាយៗ កុំទុកឱ្យទារកទទួលរងបញ្ហានេះយូរ នោះកូនៗរបស់អ្នកប្រាកដជាទទួលបានផាសុកភាពល្អ។

សម្អាតកន្លែងរលាករោលឱ្យបានស្អាត និងប្រកបដោយអនាម័យខ្ពស់
ការព្យាបាល តម្រូវឱ្យមាតាយកចិត្តទុកដាក់ទៅលើការសម្អាតកន្លែងដែលកើតរលាក ដើម្បីទប់ស្កាត់ការរាលដាលរមាស់កាន់តែធំ ហើយអាចបណ្តាលឱ្យទារកឈឺក្រហល់ក្រហាយ។ នៅពេលដែលធ្វើការផ្លាស់ខោទឹកនោម ជម្រើសល្អបំផុតគឺត្រូវប្រើប្រាស់ក្រណាត់ទន់ស្អាតមួយ ជ្រលក់ទឹកក្តៅឧណ្ណៗរួចយកមកជូតត្រង់សាច់ដែលរលាកនោះឱ្យបានស្អាតល្អ និងទុកឱ្យស្ងួតសឹមធ្វើការស្លៀកខោទឹកនោមថ្មី ប៉ុន្តែមាតាគ្រប់រូបមិនត្រូវប្រើប្រាស់ផលិតផលណាដែលមានជាតិកាត់ខ្លាំងមកលើទារកទេ។

ព្យាបាលកន្លែងដែលរលាករោលឱ្យបានជាសះស្បើយ
ដាក់ទារកនៅកន្លែងណាមួយដែលស្អាត ដោយខ្លួនទទេចំនួន ១៥ ទៅ ៣០នាទី ពីរទៅបីដងក្នុងមួយថ្ងៃ។ ការធ្វើបែបនេះគឹអាចជួយឱ្យកន្លែងដែលរលាករោលអាចប៉ះត្រូវជាមួយខ្យល់បរិសុទ្ធ រួមទាំងជួយឱ្យស្បែកនៅត្រង់នោះអស់ជាតិសើម។ គួរផ្លាស់ប្តូរខោទឹកនោមឱ្យបានជាប្រចាំ អាចជួយធ្វើឱ្យកន្លែងដែលរលាករោលឆាប់ស្ងួត និងស្អាតពីមួយថ្ងៃទៅមួយថ្ងៃ។

ផលិតផលជួយធ្វើឱ្យឆាប់ជាសះស្បើយ
ជម្រើសនៃការប្រើប្រាស់ផលិតផលដែលផ្សំពីធម្មជាតិ គឺជាការល្អបំផុត។ ផលិតផលដែលមានសារធាតុ (Zinc Oxide) បន្ថែមពីនេះផលិតផលធម្មជាតិរួមមាន ផលិតផលដែលមិនផ្ទុកសារធាតុគីមី ផលិតផលដែលផ្សំឡើងពីម្ស៉ៅអូត (ម្ស៉ៅសាលី) ។ មាតាមួយចំនួនបានប្រើប្រាសវិធីសាស្រ្តធម្មជាំតិដូចជាការច្របាច់យកទកដោះស្រស់របស់ខ្លួនទៅលើកន្លែងរលាករោលរបស់ទារក មុនពេលយលទារកទៅសំដិលខ្យល់ នេះជាការពិតទឹកដោះម្តាយមានសារសំខាន់ជួយធ្វើឱ្យឆាប់ជាសះស្បើយ និងជួយទប់ស្កាត់ការឆ្លងរោគពីបញ្ហាផ្សេងៗជាដើម។

ពិនិត្យមើលទៅលើមូលហេតុផ្សេងៗ
ពេលខ្លះបញ្ហាតូចតាចក៏អាចបណ្តាលឱ្យទារកមានបញ្ហារលាករោល ឡើងកន្ទួលរមាស់ដែរ។ មាតាគួរតែពិនិត្យមើលទៅលើប្រភេទខោទឹកនោម ការស្លៀកពាក់សម្លៀកបំពាក់ រយៈពេលដែលត្រូវផ្លាស់ប្តូរខោទឹកនោម របបអាហារ និងកន្លែងដែលទារកគេង។ កង្វះអានាម័យក៏អាចជាមូលហេតុធ្វើឱ្យទារកកើតមានបញ្ញាទាំងអស់នោះ។