តារាសម្តែង រ៉ូហ្សា ចង់ឃើញមានកម្មវិធីប្រគល់ពានរង្វាន់ ដល់ ផលិតករ និង សិល្បករឆ្នើម ក្នុងវិស័យភាពយន្តខ្មែរ

កញ្ញា រ៉ូហ្សា ជាតារាសម្តែងស្រី ដែលកំពុងកើនឡើងប្រជាប្រិយភាពយ៉ាងខ្លាំងនៅក្នុងវិស័យភាពយន្ត។ រ៉ូស្សា ក្តាប់បានតំណែងជាតួឯក នៅក្នុងរឿងភាគល្បីៗរបស់ស្ថានីយ៍ទូរទស្សន៍ក្នុងស្រុក ហើយថ្មីៗនេះ កញ្ញា បានចូលរួមសម្តែងនៅក្នុងភាពយន្ត រឿង “ផ្ទះព្រាយកន្លង” របស់ផលិតកម្ម LD Picture។

រ៉ូហ្សា បានផ្តល់បទសម្ភាសន៍ដល់ ឡេឌីស៍ ថា សព្វថ្ងៃ កញ្ញាមានភាពមមាញឹក នៅក្នុងអាជីពសិល្បៈ ដោយសារតែត្រូវថត ភាពយន្តជាច្រើនរឿង ជាបន្តបន្ទាប់។ ក្នុងនាម ជាតារាសម្តែងស្រីជួរមុខ នៅក្នុងប្រទេស រ៉ូហ្សា ថ្លែងថា វិស័យភាពយន្ត កុនខ្មែរ មានការរីកចម្រើនច្រើន ដោយមានផលិតករឯករាជ្យ និង ផលិតកម្ម បានផលិតរឿងល្អៗ មានគុណភាព យកទៅចាក់ផ្សាយនៅក្រៅប្រទេស និង នៅក្នុងមហោស្រពភាពយន្តអន្តរជាតិជាច្រើន។ តារាសម្តែងស្រី រូបស្រស់ សង្ឃឹមថាភាពយន្តដែលយកទៅចាក់នៅក្រៅប្រទេស ទទួលបានជោគជ័យ។

ទន្ទឹមនឹងនេះ រ៉ូហ្សា ចង់ឃើញមានកម្មវិធីប្រកួតប្រជែង និងការប្រគល់ពានរង្វាន់ទៅកាន់តារាឆ្នើម ឫ ផលិតករឆ្នើម នៅក្នុងប្រទេសឱ្យបានច្រើន ដោយ កញ្ញា បញ្ជាក់ថា កម្មវិធីប្រកួតប្រជែង ការប្រគល់ពានរង្វាន់នេះហើយ ជាកម្លាំងចិត្តមួយដែលជម្រុញចិត្ត សិល្បករ សិល្បការិនី និង ផលិតករ មានទឹកចិត្តក្នុងការបន្តនិងលើកស្ទួយវិស័យភាពយន្តខ្មែរ ឱ្យកាន់តែល្បីល្បាញខ្លាំងឡើងថែមទៀត។

រ៉ូហ្សា ត្រូវបានមហាជនចាត់ទុកថាជាតារាសម្តែងដ៏មានទេពកោសល្យ បូករួមជាមួយសម្រស់ពីធម្មជាតិផងនោះ ធ្វើឱ្យនាងឆក់យកបេះដូងទស្សនិកជនដែលនិយមចូលចិត្តតាមដានរឿងភាគ ក៏ដូចជាភាពយន្តកុន ធំៗ នៅក្នុងស្រុក៕