តើមានអ្វីកើតឡើងចំពោះរូបរាងកាយម្តាយ… ក្រោយពេលទើបឆ្លងទន្លេរួច?

មានបម្លាស់ប្តូរជាច្រើនដែលអាចនឹងកើតឡើង បន្ទាប់ពីរយៈពេល ២ ទៅ ៣ថ្ងៃក្រោយពេលផ្តល់កំណើតនៃកូនរបស់អ្នក បម្លាស់ប្តូរទាំងនោះរួមមាន ៖ ការផ្លាស់ប្តូររូបរាងកាយ និងការផ្លាស់ប្តូរអារម្មណ៍ ការគិត និងអាចកើតមានជាបញ្ហាផ្លូវចិត្តបន្តិចបន្តួច។

តើនឹងមានអ្វីកើតឡើងចំពោះរូបរាងកាយស្រ្តី?

ក្នុងអំឡុងរយៈពេលមួយសប្តាហ៍ក្រោយពេលផ្តល់កំណើត ស្រ្តីអាចនឹងមានការធ្លាក់ឈាមចេញពីទ្វារមាសបន្តិចបន្តួច។ ឈាមនោះត្រូវបានគេហៅថា “Lochia” ហើយវាមានពណ៌ក្រហមរាងដិត រួមទាំងកំណកឈាមដុំខ្លះៗ។ ការធ្លាក់ឈាម “Lochia” គឺជារឿងធម្មតាចំពោះស្រ្តីដែលទើបនឹងផ្តល់កំណើតដល់ទារក ប៉ុន្តែក្នុងករណីដែលការធ្លាក់ឈាមនោះមានសភាពខុសពីធម្មតា ដូចជា ធ្លាក់ឈាមមកច្រើនពេក មានក្លិនមិនល្អខ្លាំង (ឆ្អាប) និងមានកំណកដុំៗច្រើន សូមទៅពិគ្រោះជាមួយគ្រូពេទ្យនិងទទួលការណែនាំបន្ថែម ក្នុងរយៈពេល ៤ ទៅ ៦សប្តាហ៍ អ្នកប្រាកដជាប្រែមកសភាពធម្មតាវិញ ការធ្លាក់ឈាម “Lochia” ប្រែមកជាពណ៌ស្រាលជាងមុន (ពណ៌ឈូក)។

ស្ត្រីមួយចំនួនខ្លះទៀត អាចមានការឈឺចាប់ក្នុងរយៈពេល ២ ទៅ ៣ ថ្ងៃក្រោយបន្ទាប់ពីការផ្តល់កំណើត។ ការឈឺចាប់ទាំងនោះអាចរួមមាន ការឈឺពោះ ឬការឈឺចាប់នៅពេលមកវដ្តរដូវពីកម្រិតស្រាលទៅកម្រិតមធ្យម។ គួរបញ្ជាក់ផងដែរ ការឈឺចាប់បែបនេះគឺកើតចេញពីតំបន់ខាងក្នុងស្បូនរបស់អ្នករហូតមកដល់ផ្នែកពោះខាងលើ។

ការឈឺចាប់ក្នុងអំឡុងពេលអ្នកកំពុងបំបៅកូនទារកតូច ព្រោះនៅពេលដែលកូនរបស់អ្នកបៅ រាងកាយរបស់អ្នកផលិតអរម៉ូនដែលចូលរួមបង្រួញផ្នែកស្បូនរបស់អ្នក។ អ្នកអាចធ្វើការស្អំទឹកក្តៅឧណ្ណៗនៅផ្នែកខ្នង ឬនៅលើក្បាលពោះបាន។

ប្រសិនបើស្រ្តីផ្តល់កំណើតដល់ទារកដោយការវះកាត់ អ្នកអាចនឹងមានការឈឺចាប់នៅត្រង់កន្លែងស្នាមដេរ ដើម្បីកាត់បន្ថយការឈឺចាប់ សូមងូតទឹកក្តៅឧណ្ណៗនៅតំបន់នោះ ជាជំនួយក្នុងការជាសះស្បើយ ហើយបន្ទាប់ពីងូតទឹករួច ត្រូវមានការប្រុងប្រយ័ត្នខ្ពស់នៅពេលជូតខ្លួនអ្នក ដើម្បីចៀសវាងការដាច់រលាត់បន្ថែមទៀត។

សូមទទួលទានទឹកញឹកញាប់ និងបរិភោគជាតិសរសៃឱ្យបានច្រើន ដើម្បីចូលរួមសម្រួលដល់ចលនាពោះវៀនរបស់អ្នកឱ្យដំណើរការល្អ។ ពោះវៀនគួរតែមានការធ្វើចលនានៅក្នុងរយៈពេល ២ ទៅ ៣ ថ្ងៃបន្ទាប់ពីការផ្តល់កំណើត។

មិនថាស្ត្រីជ្រើសរើសយកការសម្រាលកូនតាមធម្មជាតិ ឬសម្រាលដោយការវះកាត់សង្គ្រោះបន្ទាន់ (C-section) នោះទេ ជាធម្មតាការសម្រាលកូនដោយការវះកាត់អាចចំណាយពេលក្នុងការជាសះស្បើយយូរជាងសម្រាលដោយធម្មជាតិ។ ដូច្នេះហើយ ការលើកទឹកចិត្ត និងការគាំទ្រពីញាតិជុំវិញខ្លួនគឺជារឿងសំខាន់ ជាពិសេសក្នុងនាមជាស្វាមី និងជាឱពុករបស់ទារក សូមចំណាយពេលនៅក្បែរភរិយា និងផ្តល់នូវកម្លាំងចិត្តដល់គាត់តាមដែរអាចធ្វើបាន។

បន្ថែមពីលើនេះ ប្រសិនបើស្រ្តីមានអាការឈឺក្បាលធ្ងន់ធ្ងរ ភ្នែកស្រវាំងមើលមិនច្បាស់ ហើមជើង ធ្លាក់ឈាមច្រើនពេកតាមទ្វារមាស ឈឺរបួស(ថ្នេរវះ) ខ្លាំង គ្រុនក្តៅ ឬរោគសញ្ញាផ្សេងទៀត សូធ្វើការពិគ្រោះជាមួយវិជ្ជបណ្ឌិតផ្នែកសុខភាពស្រ្តីជាប្រញាប់។