ខ្មែរ
English
កាហ្វេ គឺជាភេសជ្ជៈមួយប្រភេទដែលអាចជួយបញ្ចុះជាតិខ្លាញ់នៅក្នុងរាងកាយ និងអាចជួយសម្រកទម្ងន់បានយ៉ាងល្អក្រោមមុខងារសំខាន់ៗមួយចំនួន។ នៅក្នុងរយៈពេលខ្លី ជាតិកាហ្វេអ៊ីនមានសមត្ថភាពអាចជំរុញអត្រាមេតាបូលីស និងបង្កើនការដុតបំផ្លាញជាតិខ្លាញ់នៅក្នុងរាងកាយរបស់អ្នក ជាពិសេសវាអាចគ្រប់គ្រងចំណង់នៃការឃ្លានបានយ៉ាងល្អ។
តើកាហ្វេអ៊ីនមានឥទ្ធិពលយ៉ាងណាខ្លះចំពោះការសម្រកទម្ងន់?
ជាតិកាហ្វេអ៊ីនជួយបង្កើនមេតាប៉ូលិស
ការធ្វើមេតាប៉ូលីសបានលឿនល្អ ដំណើរការដុតជាតិខ្លាញ់ក្នុងរាងកាយកាន់តែលឿន ដូច្នេះប្រសិនបើអ្នកទទួលទានជាតិកាហ្វេអ៊ីន ហើយដំណើរការមេតាប៉ូលីសកាន់តែលឿន នោះអ្នកនឹងមិនមានការព្រួយបារម្ភចំពោះការទទួលទានអាហារច្រើននោះទេ។ ជាតិកាហ្វេអ៊ីន អាចជួយដុតជាតិខ្លាញ់នៅក្នុងរាងកាយបានរហូតទៅដល់ ២៩% នៃរាងកាយមនុស្សធម្មតា។ ដូច្នេះហើយ ទើបធ្វើឱ្យជាតិកាហ្វេអ៊ីន ត្រូវបានប្រើក្នុងថ្នាំសម្រកទម្ងន់។
ជួយបញ្ចុះជាតិខ្លាញ់
ជាតិកាហ្វេអ៊ីន អាចបង្កើនកម្រិតអ័រម៉ូន Epinephrine ក្នុងសរសៃឈាមទៅបំបែកកោសិកាខ្លាញ់ នៅក្នុងរាងកាយទាំងមូលនៃមនុស្ស។ ថ្វីត្បិតតែដំណើរនេះ មិនបានធ្វើឱ្យអ្នកស្រកគីឡូទាំងស្រុងនោះទេ ប៉ុន្តែវាអាចគ្រប់គ្រងជាតិខ្លាញ់បានយ៉ាងល្អ។
កាហ្វេអាចរក្សាការរំញោចប្រព័ន្ធប្រសាទ
កាហ្វេ គឺផលិតចេញពីគ្រាប់ធញ្ញជាតិធម្មជាតិ ដែលផ្តល់នូវសារធាតុកាហ្វេអ៊ីនជួយរំញោចដល់ប្រព័ន្ធប្រសាទឱ្យមានការដំណើរការបានល្អ។ លើសពីនេះ កាហ្វេក៏មានមុខងារធ្វើឱ្យអារម្មណ៍ស្រស់ស្រាយ កាត់បន្ថយភាពតានតឹង កាត់បន្ថយការនឿយហត់ និងនៅពេលដែលអ្នកទទួលទានកាហ្វេហើយ អ្នកធ្វើលំហាត់ប្រាណ នោះវាកាន់តែមានប្រសិទ្ធិភាពពី ១២ ទៅ ១៥% ចំពោះសុខភាពរបស់អ្នក។
កាត់បន្ថយចំណង់អាហារ
ក្រៅពីបង្កើនល្បឿននៃការធ្វើមេតាប៉ូលីស កាហ្វេអ៊ីន ក៏ជាផ្នែកមួយ ជួយកាត់បន្ថយការឃ្លាន និងគ្រប់គ្រងចំណង់អាហារបានដែរ។ ការទទួលទានកាហ្វេ អាចធ្វើឱ្យអ្នកអារម្មណ៍ឆ្អែត មិនសូវឃ្លានបាយ ប៉ុន្តែមានកម្លាំង។ បទពិសោធន៍មួយនេះ មានអ្នកចែករំលែកច្រើន ដែលការញ៉ាំកាហ្វេ អាចធ្វើឲ្យពួកគេមានកម្លាំង បើទោះបីមិនបានញ៉ាំអាហារត្រឹមមួយពេលក៏ដោយ។
