តើអ្នកដឹងទេ? បញ្ហាទាំងនេះ… ក៏ជាចំណែកធ្វើឱ្យស្បែកអ្នកស្ងួតខ្លាំង និងរបក

ស្បែកស្ងួត អាចជាប្រភេទស្បែកមិនសូវជាមានមានបញ្ហាកើតមុន ឬឆាប់រងការអាលែកហ្ស៊ីពីកត្តាផ្សេងៗ ប៉ុន្តែស្បែកប្រភេទនេះអាចនឹងងាយរបក រមាស់ បែកស្រកា និងឆាប់ឡើងស្នាមជ្រីវជ្រួញខ្លាំង ជាពិសេសនៅក្នុងរដូវរងា។

ស្បែកអ្នកនឹងកាន់តែមានសភាពស្ងួតខ្លាំងទ្វេដង ប្រសិនបើអ្នកមិនបានស្វែងយល់អំពីវិធីថែទាំឱ្យបានត្រឹមត្រូវទៅតាមប្រភេទស្បែក ក៏ដូចជាចៀសវាងកំហុសខុសឆ្គងមួយចំនួន។

មិនទទួលទានសាច់ត្រី
សាច់ត្រី គឺជាប្រភពនៃវីតាមីន និងប្រូតេអ៊ីនខ្ពស់ ក៏ដូចជាខ្លាញ់ធម្មជាតិ ដែលផ្តល់អត្ថប្រយោជន៍ជាច្រើនដល់សុខភាពរាងកាយ និងសុខភាពស្បែក។ កាលណាអ្នកទទួលទានប្រភេទសាច់ត្រីដែលសម្បូរទៅដោយខ្លាញ់ធម្មជាតិច្រើន នោះស្បែករបស់អ្នកនឹងទទួលបានកូឡាជែនគ្រប់គ្រាន់ ដែលមើលទៅភ្លឺថ្លា និងរក្សាជាតិសំណើមជាប់ជានិច្ច។

មើលរំលងស៊ុតផ្នែកពណ៌លឿង
ស៊ុតផ្នែកពណ៌លឿងមានផ្ទុកទៅដោយវីតាមីន D ច្រើន ហើយវីតាមីនប្រភេទនេះអាចជួយក្នុងការដោះស្រាយបញ្ហាខ្សោះជាតិទឹកក្នុងរាងកាយបានយ៉ាងមានប្រសិទ្ធិភាព។ ដូច្នេះ សូមកុំមើលរំលងផ្នែកស៊ុតនេះ ប៉ុន្តែក៏គួរបរិភោគក្នុងបរិមាណមួយដែលសមស្របផងដែរ។

ទទួលទានទឹកមិនគ្រប់គ្រាន់
កំហុសដ៏ធំរបស់អ្នកដែលមានប្រភេទស្បែកស្ងួត នោះគឺការមិនទទួទានទឹកឱ្យបានគ្រប់គ្រាន់ វានឹងធ្វើឱ្យស្បែករបស់អ្នកមានសភាពស្ងួតទ្វេដង និងបង្កទៅជាបញ្ហាជាច្រើនដូចជា ប្រេះ របក និងមានស្នាមផ្នត់ ជ្រីវជ្រួញ…។ សូមកុំទុកឱ្យស្បែកអ្នកដល់ដំណាក់កាលនេះ ត្រូវទទួលទានទឹកជាប្រចាំថ្ងៃឱ្យបានគ្រប់គ្រាន់។

ទទួលទានសុរាលើសកម្រិត
កាលណាអ្នកញុំាំស្រាលើសកម្រិត នោះរាងកាយរបស់អ្នកនឹងខ្សោះជាតិទឹកខ្លាំង ព្រោះនៅក្នុងស្រាមានផ្ទុកជាតិអាល់កុលដែលធ្វើឱ្យរាងកាយរបស់អ្នកមានការរំហួតជាតិទឹក ក៏ដូចជាជាតិសំណើម។