តើអ្វីដែលគួរធ្វើ និងមិនគួរធ្វើ នារដូវក្តៅនេះទៅ?

កំណើនកម្តៅសីតុណ្ណភាពកើនឡើងខ្ពស់ អាចបង្កឱ្យមានបញ្ហាទៅលើសុខភាពរាងកាយ និងសម្រស់យ៉ាងខ្លាំងប្រសិនបើអ្នកមិនបានយកចិត្តក្នុងការមើលថែទាំខ្លួននៅក្នុងរដូវក្តៅ ជាពិសេសអ្នកមិនបានស្វែងយល់អំពីតិចនិចផ្សេងៗក្នុងការការពារ។​

ឡេឌីស៍សូមបង្ហាញជួននូវគន្លឹះខ្លះៗអំពីអ្វីដែលគួរធ្វើ និង អ្វីដែលមិនគួរធ្វើក្នុងរដូវក្តៅ ដើម្បីជៀសវាងការកើតមានបញ្ហាបង្កដោយកម្តៅថ្ងៃកើនឡើង។

សូមអានអត្ថបទខាងក្រោមនេះ ៖

អ្វីដែលអ្នកគួរធ្វើ

ផឹកទឹកឲ្យបានច្រើន
សូមទទួលទានទឹកឱ្យបានច្រើននារដូវក្តៅ ព្រោះកាលណាកម្តៅថ្ងៃកាន់តែកើនឡើង រាងកាយរបស់អ្នកខ្សោះជាតិទឹក ដែលបណ្តាលឱ្យអ្នកមានអាការអស់កម្លាំង ល្ហិតល្ហៃ ឈឺក្បាលខ្លាំង និងស្ងួតបបូរមាត់។ សូមកុំព្យាយាមទទួលទានភេសជ្ជៈដែលមានរសជាតិផ្អែម មានជាតិកាហ្វេអ៊ីន ឬជាតិអាល់កុលអាចត្រឹមតែធ្វើឱ្យអ្នកបាត់ស្រេកទឹកតែមួយភ្លេត ព្រោះបន្ទាប់មកអ្នកនឹងស្រេកទឹកលើសដើម បត់ជើងញឹកញាប់ ដែលជាហេតុធ្វើឲ្យអ្នកកាន់តែបាត់បង់ជាតិទឹកបន្ថែម ដូចនេះអ្វីដែលលោកអ្នកត្រូវការគឺមានតែទឹកតែមួយមុខគត់។ លើសពីនេះ អ្នកត្រូវដឹងថាប្រសិនបើអ្នកស្រេកទឹក ទើបអ្នកទទួលទានទឹក នោះមានន័យថាខ្លួនប្រាណរបស់អ្នកបានបាត់បង់ជាតិទឹកអស់ ១៥% បាត់ទៅហើយ។ ការរង់ចាំដល់ពេលអ្នកស្រេកទឹកទើបផឹក មិនមែនជាការល្អនោះទេ។

ងូតទឹកយ៉ាងហោចណាស់ឲ្យបានពីរដង
ប្រសិនជាអាច អ្នកគប្បីងូតទឹកយ៉ាងហោចណាស់ឲ្យបាន២ដងក្នុងមួយថ្ងៃ ព្រោះមិនត្រឹមតែធ្វើឲ្យស្បែកមានសភាពត្រជាក់ទេ តែក៏ជាការលាងជម្រះមេរោគផ្សេងៗពីស្បែកខាងក្រៅ ការពារការឆ្លងមេរោគដែលបង្កពីមកបរិយាកាសខាងក្រៅដ៏ក្តៅអាប់អួរផងដែរ។

លាបឡេការពារកម្តៅថ្ងៃ
សូមធ្វើការលាបឡេកម្តៅថ្ងៃទាំងស្បែកមុខ និងស្បែកខ្លួនដើម្បីជៀសវាងពីការដុតកម្លោចសាច់ដោយកម្តៅមាំរស្មីយូវីពីពន្លឺព្រះអាទិត្យ។ មិនថាអ្នកមិនទម្លាប់លាបយ៉ាងណានោះទេ ចូលដល់រដូវក្តៅបែបនេះត្រូវតែលាបឡេការពារកម្តៅថ្ងៃ ព្រោះកម្តៅខ្លាំងបែបនេះអាចបង្កជាផលវិបាកដល់ស្បែក ហើយបើធ្ងន់ធ្ងរអាចបង្កទៅជាមហារីកស្បែកថែមទៀតផង។

ប្រយ័ត្នប្រយែងចំពោះអាហារ
រដូវក្តៅ គឺជារដូវដែលអ្នកត្រូវតែមានការប្រយ័ត្នខ្ពស់ចំពោះចំណីអាហារព្រោះមេរោគងាយនឹងឆ្លងចូលអាហារ។  អ្នកត្រូវប្រាកដថាអាហារទាំងនោះចម្អិនឲ្យបានល្អ ទុកដាក់បានត្រឹមត្រូវ និងការចៀសវាងការបរិភោគអាហារតាមចិញ្ចើមថ្នល់ ហើយងាកមកបរិភោគបន្លែ ផ្លែឈើដែលសម្បូរសារធាតុទឹក ដើម្បីឲ្យខ្លួនប្រាណទទួលបានជាតិទឹកគ្រប់គ្រាន់។

អ្វីដែលអ្នកមិនគួរធ្វើ

កុំព្យាយាមនៅក្រោមកម្តៅថ្ងៃដោយផ្ទាល់
ធ្វើយ៉ាងណាកុំស្ថិតនៅក្រោមកម្តៅថ្ងៃយូរពេក  ព្រោះក្តៅផង  ត្រជាក់ផង អ្នកងាយប្រឈមនឹងការឈឺខ្លាំងណាស់  ប៉ុន្តែប្រសិនបើជាការចាំបាច់តម្រូវឱ្យអ្នកចេញទៅក្រៅ សូមព្យាយាមពាក់អាវដៃវែង មួក ឆ័ត្រ ឬវ៉ែនតាខ្មៅដើម្បីការពារខ្លួនអ្នកពីកម្តៅផ្ទាល់។

ខោអាវក្រាស់ៗ
ដាច់ខាត កុំព្យាយាមស្លៀកពាក់ខោអាវក្រាស់ៗ ព្រោះវាអាចធ្វើឲ្យអ្នកកាន់តែហប់ និងមិនសូវមានខ្យល់ចេញចូលតាមរន្ធរោមនៃស្បែក ជាបិសេសអ្នកអាចខ្សោយកម្លាំង អស់ថាមពលដោយសារតែការបែកញើសច្រើនហួសហេតុក្រោមអាកាសធាតុហប់ខ្យល់បែបនេះ ។

បន្ថយអាហារដែលសម្បូរជាតិខ្លាញ់
អាហារចៀន បំពង សុទ្ធតែជាប្រភេទអាហារប៉ះពាល់ដល់សុខភាពអ្នកយ៉ាងខ្លាំង និងធ្វើឱ្យរាងកាយរបស់អ្នកឡើងកម្តៅទ្វេដងដោយកំហាប់ជាតិខ្លាញ់ដែលមានក្នុងរាងកាយរបស់អ្នកបន្ទាប់ពីបរិភោគរួច។

មិនត្រូវញុំាអាហារដែលសេសសល់
ដោយសារតែអាកាសធាតុក្តៅ ស្អុះស្អាប់ អាហារងាយនឹងជូរ ផ្អូម ប្រសិនបើអ្នកមិនបានទុកដាក់អាហារបានត្រឹមត្រូវ ហើយងាយនឹងឆ្លងជំងឺនៅពេលបរិភោគរួចដូចជារាករូស  ឬបញ្ហាពោះវៀនជាដើម។