ទម្លាប់ធ្វើរឿងទាំងនេះជាញឹកញយ អ្នកនឹងឆាប់ចាស់មុនអាយុមិនខាន

ភាពចាស់គឺជៀសមិនរួចឡើយ។ មនុស្សគ្រប់គ្នាតែងតែមានទម្លាប់នៃរស់នៅប្រចាំថ្ងៃរៀងៗខ្លួន ទម្លាប់ទាំងនោះអាចជាទម្លាប់អាក្រក់ ឬ ទម្លាប់ល្អ ហើយជះឥទ្ឋិពលទៅលើសុខភាព និងសម្រស់អាស្រ័យលើការសម្រេចចិត្តជ្រើសរើសរបស់ពួកគេ។

ប៉ុន្តែ តើអ្នកដឹងទេថាមានទម្លាប់មួយចំនួនដែលធ្វើឲអ្នកមើលទៅចាស់ជាងវ័យ?

ទម្លាប់ប្រចាំថ្ងៃជាច្រើនរបស់អ្នកអាចជាមូលហេតុបង្កឲមានស្នាមជ្រីវជ្រួញ​នៅលើរង្វង់ផ្ទៃមុខដ៏ស្អាតផូរផង់ និងស្បែកដងខ្លួនមានសភាពស្រអាប់ បង្កស្នាមអ៊ុចខ្មៅ និងប្រេះស្រកាជាខ្លាំង ដែលប្រហែលជាអ្នកពុំសូវបានស្វែងយល់អំពីវា។

ខាងក្រោមនេះជាទម្លាប់ប្រចាំថ្ងៃ ដែលធ្វើឲអ្នកឆាប់ចាស់មុនអាយុ ៖

1.     របបអាហារមិន​ល្អ​ 

អាហារដែលមានផ្ទុកសារជាតិជាតិខ្លាញ់ ជាតិកាហ្វេអ៊ីន និងភេសជ្ជៈដែលមានជាតិស្ករខ្ពស់ មិនមែនជាជម្រើសអាហារល្អចំពោះសុខភាពរបស់អ្នកនោះទេ។ អាហារទាំងនេះ ជាមេរោគដ៏អាក្រក់​ដែលពន្លឿនដំណើរការនៃភាពចាស់។

2.     ការទទួលទានជាតិស្ករច្រើនពេក

ការ​ទទួលទានជាតិ​ស្ករ​ច្រើន​អាច​ធ្វើ​ឱ្យ​អ្នក​មើលទៅ​ចាស់ជាងវ័យ ក្រោមមូលហេតុជាច្រើនដូចជា  ម៉ូលេគុលស្ករបណ្តាលឱ្យ Glycation នៃកូឡាជែនក្នុងកោសិកាសិរីរាង្គស្បែកថយចុះ ហើយដំណើរការមួយនេះនាំឱ្យមានការបំផ្លាញកូឡាជែនស្ទើរតែទាំងស្រុងនៅក្នុងសាពារង្គកាយរបស់អ្នក។

3.     ទទួលទានដំណេកមិនគ្រប់គ្រាន់

ការគេងមិនគ្រប់គ្រាន់ប៉ះពាល់ស្បែកមុខ និងរូបរាយកាយយ៉ាងខ្លាំង វាបានបំផ្លាញកម្រិត pH នៃស្បែកដែលបណ្តាលឱ្យមុខងាររបាំងស្បែករបស់អ្នកត្រូវបានថយចុះ ខ្វះជាតិទឹក ខ្មៅស្រអាប់ និងចាស់ជាងវ័យ លើសពីនេះវាអាចឈានដល់ការបង្កឱ្យមានស្នាមក្រហមអ៊ុចៗនៅលើស្បែកផងដែរ។

4.     សេពគ្រឿងស្រវឹង

ជាតិអាល់កុលដែលមានផ្ទុកនៅក្នុង​ ស្រា និងស្រាបៀរអាចបំផ្លិចបំផ្លាញ នូវវីតាមីនក្នុងសារពាង្គកាយរបស់អ្នក និងសារធាតុចិញ្ចឹមផ្សេងៗទៀត។ការសេពគ្រៀងស្រវឹង​បានជះឥទ្ធិពលអាក្រក់ចំពោះស្បែកយ៉ាងខ្លាំង  វាអាចធ្វើឱ្យស្បែករបស់អ្នកមាន​សភាពស្នាមជ្រីវជ្រួញ ហើមសាច់ និងខ្វះជាតិទឹកក្នុងស្បែក ដែលបង្កទៅជាស្បែកស្ងួត។ ប្រសិនបើអ្នកទទួលទានជារៀងរាល់ថ្ងៃរបស់អ្នក នោះវាកាន់តែបង្កហានិភ័យខ្ពស់ដល់សុខភាព។

ការជ្រើសរើស របបអាហារល្អ ធ្វើលំហាត់ប្រាណជាប្រចាំ ទទួលដំណេកគ្រប់គ្រាន់ និងចៀសវាងការទទួលភេសជ្ជៈដែលផ្ទុកសារជាតិស្ករច្រើន រួមទាំង​កត្តា​ផ្សេងៗមួយចំនួន​ទៀត​អាច ធ្វើឱ្យ​យើងទទួលបានសុខភាពរាងកាយ ក៏ដូចជាសុខភាពស្បែកល្អប្រសើរ​ ដែលប្រាក់កាសមិនអាចទិញដូរបាន។

ដូច្នេះហើយ វាជារឿងសំខាន់សម្រាប់អ្នកក្នុងបង្កើតទម្លាប់ប្រចាំថ្ងៃឱ្យបានត្រឹមត្រូវតាមក្បួនខ្នាត ចៀសវាងការបំផ្លាញសុខភាពស្បែករបស់អ្នកដោយពុំដឹងខ្លួន៕