បង្កើនសមត្ថភាពខួរក្បាល… និងការចងចាំល្អ ដោយទម្លាប់ប្រចាំថ្ងៃទាំងនេះ!

ទម្លាប់ប្រចាំថ្ងៃ គឺមានឥទ្ធិពលយ៉ាងខ្លាំងចំពោះសុខភាពផ្លូវកាយ ផ្លូវចិត្ត និងសមត្ថភាពនៃការគិតរបស់ខួរក្បាល។ ប្រសិនបើអ្នកទម្លាប់ខ្លួនបង្កើតអកប្បកិរិយា ឬការរស់នៅអវិជ្ជមាន នោះដំណើរជីវិតអ្នកប្រាកដជាជួបរឿងដែលមិនសមប្រកបយ៉ាងច្រើន បន្ថែមពីនោះវាថែមទាំងដាក់ទម្ងន់ធ្ងន់ទៅលើសមត្ថភាពខួរក្បាលរបស់អ្នកថែមទៀតផង។ មនុស្សមួយចំនួន ប្រហែលជាមិនសូវបានយកចិត្តទុកដាក់ទៅលើបញ្ហានេះ ប៉ុន្តែប្រសិនបើអ្នកនៅតែអនុវត្តទម្លាប់ដែលបង្កផលប៉ះពាល់ដល់ខួរក្បាលជារឿយៗ អ្នកនឹងមានការភ្លេចភ្លាំងច្រើន វង្វេងវង្វាន់ នៅពេលចាស់ទៅ។

ដូច្នេះ ឡេឌីស៍នឹងពាំនាំទម្លាប់ក្នុងការរស់នៅល្អ ដើម្បីពង្រឹងសមត្ថភាពខួរក្បាល និងការចងចាំបានប្រសើរដោយវិធីទាំងប៉ុន្មានខាងក្រោមនេះ ៖

ទទួលទានរបបអាហារល្អៗ
ជាការពិតណាស់ អាហារមានតួនាទីយ៉ាងសំខាន់ក្នុងការកសាង និងការពារសរីរាង្គកាយរបស់អ្នក សាកស្រមៃទៅមើល ប្រសិនបើអ្នកបរិភោគតែប្រភេទអាហារដែលបង្កផលប៉ះពាល់ដល់សុខភាព នោះវាពិតជាមានហានិភ័យខ្ពស់ដល់សមត្ថភាពខួរក្បាលរបស់អ្នក។ ប្រភេទអាហារដែលបង្កផលប៉ះពាល់ដល់សមត្ថភាពការចងចាំនៃខួរក្បាល គឺ អាហារដែលមានជាតិកាបូអ៊ីដ្រាត មិនត្រឹមតែប៉ុណ្ណោះវាអាចធ្វើឱ្យការយល់ដឹងរបស់អ្នកថយចុះ និងបំផ្លាញសុខភាពខួរក្បាលផងដែរ។ អ្នកគួរតែបរិភោគនូវអាហារដែលសម្បូរទៅដោយសារធាតុចិញ្ចឹម ដូចជាវីតាមីន ប្រូតេអ៊ីន រួមមាន បន្លែបៃតង ផ្លែឈើ គ្រាប់ធញ្ញជាតិ..។

ទទួលទានដំណេកឱ្យបានគ្រប់គ្រាន់
ការគេង មានសារសំខាន់ចំពោះខួរក្បាល ព្រោះអំឡុងពេលដែលយើងគេង ខួរក្បាលនឹងធ្វើការជួសជុល ស្តារចនាសម្ព័ន្ធ និងមុខងារសំខាន់ៗ។ ដូច្នេះ អ្នកគួរតែបង្កើតទម្លាប់ចូលគេងឱ្យបានគ្រប់គ្រាន់ និងទៀងម៉ោងជារៀងរាល់ថ្ងៃ នៅពេលដែលអ្នកគេងគ្រប់គ្រាន់ អ្នកនឹងឃើញអំពីសមត្ថភាពខួរក្បាលរបស់អ្នកកើនឡើងទ្វេដង។

ធ្វើលំហាត់ប្រាណ
ទម្លាប់ហាត់ប្រាណជាប្រចាំ អាចជួបង្កើនសមត្ថភាពខួរក្បាលរបស់អ្នក ព្រោះលំហាត់ប្រាណអាចជួយសម្រួលដល់លំហូរឈាមដើរស្រួល ជួយឱ្យខួរក្បាលទទួលបានអុកស៊ីសែនកាន់តែច្រើន និងសារធាតុចិញ្ចឹមពីអាហារ។ បន្ថែមទៀតនោះ លំហាត់ប្រាណបានជួយបញ្ចេញអ័រម៉ូន Endorphins នៅក្នុងចរន្តឈាម ជាអ័រម៉ូនអារម្មណ៍ល្អ និងបន្ថយការស្រ្តេស។

ធ្វើសមាធិ
ការរំងាប់អារម្មណ៍ និងការផ្តោតអារម្មណ៍ក៏ជួយកាត់បន្ថយស្រ្តេស និងការថប់បារម្ភផងដែរ។ កាលណាអ្នកស្រ្តេសខ្លាំងពេក វានឹងប៉ះពាល់ដល់សមត្ថភាពខួរក្បាលការគិតរបស់អ្នក។

 

កាត់បន្ថយការសេពគ្រឿងស្រវឹង និងជក់បារី
អ្នកប្រាកដជាដឹងហើយ សារធាតុទាំងពីរនេះពិតជាប៉ះពាល់យ៉ាងខ្លាំងដល់សុខភាព ថែមទាំងប៉ះពាល់ដល់ផ្នែកខួរក្បាលទៀតផង។ ដូច្នេះ បើអ្នកមានទម្លាប់ប្រព្រឹត្តវាជាប្រចាំថ្ងៃ សូមបញ្ឈប់ទង្វើទាំងនេះជាបន្ទាន់។