ពណ៌ក្រហម… តំណាងឱ្យសំណាងល្អ និងភាពអង់អាចមោះមុតយ៉ាងខ្លាំងក្លា!

ពណ៌ក្រហម ត្រូវបានគេឱ្យឈ្មោះថាជាពណ៌ដែលមានអំណាចខ្លាំងបំផុត មិនត្រឹមប៉ុណ្ណោះវាក៏ត្រូវបានប្រជាជននៅតំបន់អាស៊ីហៅថា ពណ៌សំណាងល្អដែលឈរតំណាងឱ្យសុភមង្គល ភាពស្មោះត្រង់ ភាពជោគជ័យ និងភាពរុងរឿងដល់មនុស្ស។ គំនិតនេះ គឺបំផុសចេញមកពីអរិយធម៌ប្រទេសចិន ព្រោះប្រទេសចិនមានជំនឿយ៉ាងខ្លាំងទៅលើពណ៌ក្រហម ថាជាពណ៌មានហុងស៊ុយ ទើបរៀងរាល់ចូលឆ្នាំថ្មីពួកគេតែងតុបតែងខ្លួន ឬតុបតែងផ្ទះជាមួយនឹងពណ៌ក្រហមជានិច្ច។

 

ដោយឡែក នៅក្នុងយុគសម័យថ្មីក្រោយៗមកនេះ គេឃើញថាប្រជាជនប៉ែកខាងអឺរ៉ុបក៏មានការពេញនិយមជាខ្លាំងជាមួយហ្វេសិនពណ៌ក្រហមដើម្បីតុបតែងខ្លួន និងផ្លាស់ប្តូរស្ទីលសម្លៀកបំពាក់ជាពណ៌ក្រហម ក្រោមមូលហេតុមួយចំនួនដូចជា ផ្តល់នូវសោភ័ណភាពស្ទីលហ្វេសិនកាន់តែស្រស់ស្អាតបន្ថែម.. រំលេចឆ្លុះសាច់ថ្លាឆ្វង់ ជាពិសេសជំនឿនៃពណ៌ក្រហមត្រូវបានគ្រប់ដណ្តប់ចិត្តរបស់ពួកគេដូចគ្នា។

ប្រសិនបើអ្នកបណ្តុះគំនិតទៅលើពណ៌ក្រហម ថាពិតជាបានផ្តល់នូវសំណាងល្អដល់អ្នក អ្នកគួរតែស្វែងយល់អំពីរបៀបក្នុងការរស់នៅជាមួយពណ៌ក្រហម.. នៅទីនេះ ឡេឌីស៍ចង់បានន័យថា អ្នកអាចជ្រើសរើសអំពីរបៀបក្នុងការស្លៀកម៉ូតសម្លៀកបំពាក់អមដោយពណ៌ក្រហមដណ្តប់ខ្លួន និងប្រើប្រាស់គ្រឿងមួយចំនួនដែលមានពណ៌ក្រហម ដូចជា “គ្រឿងសម្អាង គ្រឿងអលង្ការ កាបូប កន្សែង និងមួកជាដើម”។

 

របៀបក្នុងការតុបតែងខ្លួនតាមបែបពណ៌ក្រហមឱ្យមើលទៅស្រស់ស្អាតបំផុតអាចមានច្រើនទម្រង់ ប៉ុន្តែអ្នកគួរតែចាប់ផ្តើមជាមួយនឹងសម្លៀកបំពាក់ជាមុនសិន។ អ្នកអាចជ្រើសការលេងស្ទីលជាខោអាវឈុត ឬជារ៉ូប បន្ថែមពីនេះអ្នកអាចពាក់តែអាវពណ៌ក្រហម ផ្គួបផ្សំជាមួយនឹងខោពណ៌ផ្សេងក៏បានដូចគ្នា.. នេះក៏បានបំផុសនូវពណ៌សំណាងឱ្យឃើញចែងចាំងផងដែរ។ ម្យ៉ាងប្រសិនបើសម្លៀកបំពាក់ខាងក្នុងបង្កប់ពណ៌ផ្សេង អ្នកក៏អាចជ្រើសជាប្រភេទអាវខាងក្រៅ អមជាមួយផងដែរ។

បន្ថែមការលម្អសម្រស់នៃរង្វង់ផ្ទៃមុខរបស់អ្នក ដោយការតុបតែងមុខជាមួយគ្រឿងសម្អាងបែបពណ៌ក្រហម។ អ្នកអាចប្រើប្រាស់ជាប្រភេទ ក្រេមពណ៌ក្រហម ឬផាត់ភ្នែក និងថ្ពាល់របស់អ្នកក្រហមព្រឿងៗ គឺកាន់តែលើកសម្រស់ដ៏ស្រស់ស្អាត ព្រមទាំងសំណាងល្អពេញមួយថ្ងៃ។

 

ចំណែកឯគ្រឿងលម្អប្រាណខាងក្រៅដូចជាកាបូប និងគ្រឿងអលង្ការផ្សេងៗរួមមាន “ក្រវិល ខ្សែក ចិញ្ចៀន.. ជាដើម” អ្នកក៏អាចជ្រើសពណ៌ក្រហមដូចគ្នា។