ព្រែកជីកហ្វូណនតេជោ ជាផ្លូវទឹកដ៏សំខាន់សម្រាប់សេដ្ឋកិច្ចកម្ពុជា

គម្រោងព្រែកជីកហ្វូណន-តេជោ ពិតជាមានសារសំខាន់ណាស់ និងជាសសៃឈាមសេដ្ឋកិច្ចរបស់កម្ពុជា ដែលជាផ្លូវទឹកមួយដ៏សំខាន់ក្នុងការតភ្ជាប់ផ្លូវទឹករវាងទន្លេទៅកាន់សមុទ្រ របស់កម្ពុជា ហើយធ្វើការឆ្លងកាត់ខេត្តចំនួន៤ រួមមាន ខេត្តកណ្តាល តាកែវ កំពត និង ខេត្តកែប ដែលមានប្រវែងប្រមាណ ១៨០គីឡូម៉ែ។ គម្រោងនេះ នឹងត្រូវចំណាយទឹកប្រាក់ប្រមាណ ១,៧០០ លានដុល្លារអាមេរិក ដោយត្រូវប្រើពេលវេលា៤ឆ្នាំ ដើម្បីសាងសង់បញ្ចប់គម្រោង។

 ចំពោះអត្ថប្រយោជន៍នៃគម្រោងព្រែកជីកហ្វូណន-តេជោ រួមមាន​ ៖ ការបង្កើតតំបន់ពាណិជ្ជកម្ម និងមជ្ឃមណ្ឌលភស្ដុភារកម្ម ,ការអភិវឌ្ឍផែរណបថ្មីៗ ការពង្រីកតំបន់អភិវឌ្ឍសម្រាប់កសិកម្ម ធារាសាស្ត្រ វារីវប្បកម្ម និងចិញ្ចឹមសត្វ ជួយគាំទ្រប៉ូលសេដ្ឋកិច្ចទី៤ របស់កម្ពុជា បង្កើតការងារបន្ថែមជូនដល់ប្រជាពលរដ្ឋ ជំរុញការអភិវឌ្ឍ ទីក្រុង និងនគរូបនីយកម្ម ជំរុញការរីកចម្រើន ផ្នែកអលនទ្រព្យ កំណើននៃវិស័យទេសចរណ៍ និងជាពិសេស បងប្អូនប្រជាពលរដ្ឋដែលនៅតំបន់នោះ នឹងទទួលបានប្រភពទឹកដែលមិនចេះរីងស្ងួត សម្រាប់ប្រើប្រាស់ប្រចាំថ្ងៃ ក៏ដូចជាប្រើប្រាស់លើផលដំណាំផ្សេងៗ ដែលនឹងធ្វើអោយសេដ្ឋកិច្ចគ្រួសារមានភាពល្អប្រសើរជាបន្តបន្ទាប់ពីតំបន់ព្រែកជីកនេះ។

 នៅក្នុងគម្រោងព្រែកជីកហ្វូណន-តេជោ កម្ពុជារំពឹងថា ចំណេញ ៨៨ លានដុល្លារក្នុងមួយឆ្នាំពីការដឹកជញ្ជូនតាមព្រែកជីកហ្វូណន-តេជោ ហើយនឹងអាចកើនឡើងដល់ ៥៧០លានដុល្លារ ក្នុងមួយឆ្នាំ នៅឆ្នាំ២០៥០។ នេះជាការលើកឡើងរបស់ឯកឧត្តមឧបនាយករដ្ឋមន្ត្រី ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បង្ហាញពីគម្រោងព្រែកជីកហ្វូណន-តេជោ កាលពីព្រឹកថ្ងៃទី៣ ខែមេសា ឆ្នាំ២០២៤។

តាមការសិក្សាផ្នែកសេដ្ឋកិច្ច  ដោយយោងតាមមូលដ្ឋាននៃការគណនា EIRR គម្រោងនេះរំពឹងថា នឹងនាំអត្ថប្រយោជន៍ជាច្រើនមកកាន់សេដ្ឋកិច្ចកម្ពុជាដូចជា អត្រានៃការផ្ដល់ការងារធ្វើជូនពលរដ្ឋ ផលចំណូលថវិកាជាតិពីពន្ធដារ និងចំណូលបានពីវិស័យនគរូបនីយកម្ម សំណង់ និងអចលនទ្រព្យ។

ចំពោះគម្រោងផ្សេងៗទាំងអស់ បើសិក្សាទៅមានអត្រាទាបជាង ១២% ក្រសួងសេដ្ឋកិច្ច និងហិរញ្ញវត្ថុ ឬធនាគារពិភពលោក មិនអោយថវិកាដើម្បីសាងសង់នោះទេ លុះត្រាតែ EIRR យ៉ាងតិចអោយបាន ១២% ទើបទទួលបានថវិកាមកធ្វើគម្រោង​។ ដោយនៅក្នុងគម្រោងព្រែកជីកហ្វូណននេះ គឺបានផ្តល់ផលត្រឡប់មកវិញដ៏ខ្ពស់មួយ​ គឺមានចំនួនរហូតដល់ ២០% ទៅ ៣១% ដែលមិនធ្លាប់មានគ្រោងនានាពីមុនមក។

គួរជម្រាបជូនផងដែរថា គម្រោងព្រែកជីកហ្វូណន-តេជោ បានសិក្សាដោយប្រើរយៈពេលប្រមាណ ២៦ខែ ដែលត្រូវបានសិក្សាយ៉ាងល្អិតល្អន់ពីក្រុមអ្នកជំនាញបច្ចេកទេសជាតិ និងអន្តរជាតិចំនួន៤២រូប ទាំងនៅលើដីផ្ទាល់ និងប្រើឧបករណ៍សិក្សាពីលើអាកាស។

គម្រោងនេះ គឺមានប្រជាជនសរុបប្រមាណ ១,៦លាននាក់ រស់នៅអមសងខាងផ្លូវទឹកព្រែកជីកហ្វូណនតេជោ។ ចំពោះផ្លូវទឹក មានទទឹងមុខកាត់ផ្នែកខាងលើ ប្រវែង ១០០ម៉ែត្រ និងមុខកាត់ផ្នែកខាងក្រោម ប្រមាណ៨០ម៉ែត្រ និងជម្រៅទឹកប្រមាណ ៥,៤ម៉ែត្រ ( ជម្រៅនាវាចរណ៍ ៤,៧ម៉ែត្រ និងគម្លាតសុវត្ថិភាព ០,៧ម៉ែត្រ ) មានគន្លងនាវាចរណ៍ ចំនួន២គន្លង អាចចេញ-ចូល និងចៀសគ្នាបានដោយសុវត្ថិភាពផងដែរ៕