ម៉ូត Streetwear កំពុងឆក់យកបេះដូងយុវវ័យនៅថៃ ជាការវិវឌ្ឍន៍នៃការលេងស្តាយខ្លួនបែបជំនាន់ថ្មី

ថៃ ជាប្រទេសមួយដែលយុវវ័យក្មេងៗ ជំទង់ និយមចូលចិត្តស្លៀកពាក់ លេងស្តាយតាមបែប Streetwear។ នៅទីប្រជុំជន ក្នុងទីក្រុងបាងកក គេសង្កេតឃើញប្រជាជនថៃ ជាពិសេសយុវវ័យគឺលេងខ្លួន តាមបែបបច្ចិមប្រទេស។ ថ្វីត្បិតតែការស្លៀកពាក់ តុបតែងខ្លួន បានផ្លាស់ប្តូរក្តី ប៉ុន្តែការរក្សានូវអត្តសញ្ញាណសម្លៀកបំពាក់ប្រពៃណីជាតិ នៅតែមាន។ ជាក់ស្តែង នៅរៀងរាល់ពិធីបុណ្យប្រពៃណីជាតិធំៗរបស់ថៃ ប្រជាជន មិនថាចាស់ មិនថាក្មេង បានស្លៀកសម្លៀកបំពាក់ប្រពៃណី ដែលជាកត្តាថែរក្សាសម្បត្តិវប្បធម៌របស់ដូនតា មិនឱ្យបាត់បង់។

និយាយទៅដល់ Streetwear ជាស្តាយតុបតែងខ្លួន សម័យថ្មី ដែលទទួលឥទ្ធិពលពី អឺរ៉ុប និង ពួកអាគាំង។ ការទទួលឥទ្ធិពលនេះ បានជំរុញឱ្យហាងលក់សម្លៀកបំពាក់ជាច្រើន នៅក្នុងប្រទេសថៃ នាំយកម៉ូតបែប Streetwear ដើម្បីតម្រូវតាមទីផ្សារយុវវ័យ។ ពិតណាស់ ការលេងខ្លួនបែបនេះជាការវិវឌ្ឍន៍ទៅតាមសម័យកាល ដែលពេលនេះអាចនិយាយបានថា ឈានដល់ជំនាន់ Gen Z។

ចំពោះកត្តាធំៗ ដែលបានជះឥទ្ធិពល និង ជំរុញចិត្តយុវវ័យឱ្យចូលចិត្តម៉ូតខោអាវទាន់សម័យនេះ ត្រូវបានគេសន្និដ្ឋានថា អាចមកពីកត្តា social media, អ្នកសិល្បៈ និង brand មួយចំនួនដែលលក់ក្នុងតម្លៃសមស្រប។ ចំពោះកត្តាចំណង នោះ គឺប្រព័ន្ធ social media ដោយសារតែ បណ្តាញសង្គម Facebook និង Instagram បានក្លាយជា platform មួយដែលប្រជាជនថៃ តែងថតរូបបង្ហោះ ជាមួយនឹងម៉ូតសម្លៀកបំពាក់សម័យថ្មី របស់ពួកគេ ហើយមនុស្សជាច្រើនបានឃើញ និង បានចែករំលែក trend ទាំងនោះពាសពេញប្រទេស។

ចំណែក កត្តាធំមួយទៀតនោះ គឺ សម្លៀកបំពាក់ Streetwear ត្រូវបានគេដាក់លក់ស្ទើរតែគ្រប់ទីកន្លែងនៅក្នុងប្រទេសថៃ ដែលប្រជាជន ងាយស្រួលរកទិញ ជាពិសេសនោះ តម្លៃវិញ គឺធូរថ្លៃ សមស្របជាមួយជីវភាពពលរដ្ឋនៅទីនោះ។ Trend នេះ នឹងបន្តរីកសាយភាយកាន់តែច្រើនឡើងថែមទៀត នៅថ្ងៃអនាគត ដោយសារតែយុវវ័យជាច្រើនរបស់ថៃ ពេញចិត្តនឹងស្តាយស្លៀកពាក់បែបនេះ​ ហើយនៅក្នុងបរិបទសង្គម ម៉ូត Streetwear នេះ ក៏មិនមានជាអ្វីខុសទាស់ ប្រាស់ចាក ប្រពៃណី ដែរ៕