យកចិត្តទុកដាក់ទៅលើប្រព័ន្ធរំលាយអាហាររបស់អ្នក… ដោយផ្លែឈើប៉ុន្មានប្រភេទនេះ

ចំពោះមនុស្សមួយចំនួនអាចគិតថា “បញ្ហាប្រព័ន្ធរំលាយអាហារ” មិនជាបញ្ហាធំដុំ ប៉ុន្តែតើអ្នកដឹងទេ? នៅពេលអ្នកមិនបានបន្ទោរបង់ជាច្រើនថ្ងៃ រាងកាយរបស់អ្នកផ្ទុកកាកសំណល់ច្រើនលើសលប់ ដែលបណ្តាលឱ្យមានជាតិពុលខ្លាំងនៅក្នុងខ្លួន និងរួមទាំងរោគសញ្ញាជាច្រើនទៀតដូចជា ទល់លាមក ចុកឆ្អល់ក្នុងពោះវៀន ធ្វើទុក្ខក្រពះ ចង្អោររកក្អួត ឬអាចឈានដល់ការកើតមានបញ្ហាឬសដូងបាតជាដើម។

ចៀសវាងការកើតមានបញ្ហាប្រព័ន្ធរំលាយអាហារ អ្នកគួរតែទទួលទានរបបអាហារដែលមានសារធាតុប្រូតេអ៊ីន វីតាមីន និងមានផ្ទុកជាតិសរសៃ (Fiber) ច្រើន ដើម្បីជួយសម្រួលដល់ការបន្ទោរបង់ និងផ្តល់នូវវីតាមីនគ្រប់គ្រាន់ដល់ផ្នែកពោះវៀនធំរបស់អ្នក។

ឡេឌីស៍ សូមណែនាំដល់អ្នក ឱ្យទទួលទានផ្លែឈើ ព្រោះផ្លែឈើសម្បូរដោយអង់ស៊ីមរំលាយអាហារ ដែលជាជំនួយការដ៏ល្អបំផុតចំពោះពោះវៀនធំ ម្យ៉ាងបើទោះបីអ្នកបរិភោគច្រើនក៏មិនមានបង្កជាផលប៉ះពាល់ដល់សុខភាពឡើយ។ ការទទួលទានផ្លែឈើមិនត្រឹមតែជួយសម្រួលដល់ប្រព័ន្ធរំលាយអាហារទេ ថែមទាំងជួយដល់សុខភាពសរីរាង្គកាយ និងសុខភាពស្បែក ដោយសារតែផ្លែឈើមានផ្ទុកនូវសារជាតិវីតាមីន និងប្រូតេអ៊ីននៅក្នុងផ្លែរបស់វា។ ចំពោះផ្លែឈើទាំងនោះមានដូចជា ៖

ផ្លែល្ហុង

ប្រសិនបើអ្នកមានបញ្ហាប្រព័ន្ធរំលាយអាហារ ពិបាកក្នុងការបន្ទោរបង់ សូមទទួលទានផ្លែល្ហុង ព្រោះផ្លែល្ហុងអាចជួយរំលាយប្រូតេអ៊ីនទៅជាអាមីណូអាស៊ីតដោយសារវាមានផ្ទុកនូវអង់ស៊ីមរំលាយអាហារដូចជា papain ដែលមានតួនាទីសម្រួលដល់ប្រព័ន្ធរំលាយអាហារ កាត់បន្ថយការហើមពោះ និងទល់លាមក។

ផ្លែផាស់សិន

ផ្លែឈើប្រភេទនេះមានផ្ទុកជាតិសរសៃខ្ពស់ ដែលអាចជួយបញ្ចេញកាកសំណល់បានយ៉ាងងាយស្រួលសម្រួលដល់ប្រព័ន្ធរំលាយអាហារអ្នកបាន។

ផ្លែគីវី

ផ្លែគីវី ក៏ត្រូវបានគេចាត់ទុកជាផ្លែឈើមួយប្រភេទដែលល្អសម្រាប់ការរំលាយអាហារ ព្រោះវាមាននូវអង់ស៊ីម actinidin ជួយសម្រួល និងជំរុញដល់ដំណើរការនៃការរំលាយអាហារយើងឱ្យកាន់តែប្រសើរ។ មិនតែប៉ុណ្ណោះ ផ្លែគីវីក៏សម្បូរដោយសារធាតុប្រឆាំងអុកស៊ីតកម្ម ជាតិសរសៃដែលអាចជួយពង្រឹងប្រព័ន្ធភាពស៊ាំ និងកាត់បន្ថយបញ្ហាទល់លាមកថែមទៀតផង។

ផ្លែប័រ

ផ្លែឈើមួយប្រភេទនេះ សម្បូរដោយសារធាតុប្រឆាំងអុកស៊ីតកម្មខ្ពស់ ដែលជួយព្យាបាលការលាកក្រពះ និងពោះវៀនធំ។ បន្ថែមពីនេះ ជីវជាតិក្នុងផ្លែប៊ឺរ ក៏មានសមត្ថភាពជួយសម្លាប់បាក់តេរីក្នុងពោះវៀនបានផងដែរ។ ដូច្នេះហើយ ទើបផ្លែប័រជាជំនួយការកាត់បន្ថយបញ្ហាប្រព័ន្ធរំលាយអាហារដ៏ល្អបំផុត។