រក្សារាងឱ្យនៅស្វែល ជាមួយលំហាត់ប្រាណយូហ្គា

ជាមួយនឹងកាយវិការយូហ្គាអ្នកអាចរក្សាទម្ងន់រាងកាយរបស់អ្នកបានតាមបំណងប្រាថ្នា ដោយគ្រាន់តែចំណាយពេលពីរទៅបីដងក្នុងមួយសប្តាហ៍ យូហ្គាអាចបង្កើនថាមពលកម្លាំង យឺតសរសៃ រក្សាជំហរ។ អមដោយរបបអាហារប្រកបដោយសុខភាពនិងបរិភោគអាហារក្នុងកម្រិតទាបបំផុត អ្នកប្រាកដជារក្សាទម្ងន់បាន។ អ្នកអាចជ្រើសយកលំហាត់ប្រាណយូហ្គា ដើម្បីធ្វើឱ្យសាច់ត្រង់ជើង ដៃ និងគូទរបស់អ្នកតឹងណែនល្អ។

គុណប្រយោជន៍

យូហ្គាផ្តល់អត្ថប្រយោជន៍ជាច្រើនសម្រាប់រាងកាយ! វាជួយសម្រួលដល់រូបរាងកាយ និងផ្តល់នូវគុណប្រយោជន៍ដល់សុខភាពផងដែរ។ អ្នកនឹងទទួលបានភាពរហ័សរហួននៅពេលដែលអ្នកអនុវត្តលំហាតើប្រាណយូហ្គាជាប្រចាំនិងទៀងទាត់។

តើអ្នកចង់មានសមត្ថភាពចងខ្សែស្បែកជើង ឬរើសប៊ិចដោយមិនចាំបាច់បន្ទន់ជង្គង់ដែរទេ?

អ្នកអាចបន្ទន់ចង្កេះ និងប៉ះដីបានយ៉ាងងាយនិងថែមទាំងជួយកាត់បន្ថយភាពតានតឹងទៀតផង រីឯកម្លាំងរបស់អ្នកក៏កើនឡើងទៅតាមនោះដែរ!

យូហ្គា ជួយសម្រួលដល់សណ្ឋានដងខ្លួនរបស់អ្នក ព្រោះថាការអង្គុយក្នុងការិយាល័យ ឬថ្នាក់រៀនពេញមួយថ្ងៃធ្វើឱ្យឆ្អឹងខ្នងរបស់អ្នករងនូវទម្ងន់យ៉ាងខ្លាំង​ ដែលជាកត្តាបង្កនូវបញ្ហាជាច្រើន។ កាត់បន្ថយភាពតានតឹង និងតម្រង់ឆ្អឹងខ្នងរបស់អ្នក ជួយឱ្យអង្គុយបានយូរដោយគ្មានបញ្ហា និងរក្សាភាពយុវវ័យដ៏រឹងមាំរបស់អ្នកបន្ថែមទៀតផង។

ការសម្រួលដល់ប្រព័ន្ធលំហូរនៃឈាម ដែលជួយបង្ការពីអាការៈជាច្រើនដូចជា កំណកនៃឈាម និងជួយឱ្យសួតមានសុខភាពល្អ។ ព្យាយាមហាត់កាយវិការដាំក្បាលចុះក្រោមមួយដងក្នុងមួយថ្ងៃ លើកលែងតែក្នុងអំឡុងវដ្តរដូវ។ អនុវត្តកាយវិការបញ្ច្រាស់មានដូចជា ការឈរដោយប្រើដៃ ស្មា ឬគ្រាន់តែទម្រេតខ្លួនលើកម្រាលនិងដាក់ជើងរបស់អ្នកទល់ជញ្ចាំង។

អ្នកជំនាញផ្នែកសុខភាពបានឱ្យដឹងថា​ ការធ្វើលំហាត់ប្រាណបង្កើនចង្វាក់បេះដូងឱ្យបាន ៣០នាទីជារៀងរាល់ថ្ងៃធ្វើឱ្យកាត់បន្ថយគ្រោះថ្នាក់ពីជំងឺបេះដូង និងកាត់បន្ថយភាពតានតឹង។ ពន្លឿនដល់ប្រព័ន្ធដុតរំលាយជាតិខ្លាញ់របស់អ្នក និងធ្វើឱ្យស្រកទម្ងន់ដោយការហាត់ប្រាណតែបន្តិចបន្តួច ឬតាមដែលអាចធ្វើទៅបានដោយមិនបង្កភាពចុករោយដល់រាងកាយខ្លាំងពេក។

1. បោះជំហានទៅមុខ (Crescent Pose)

បោះជំហានទៅមុខដោយសង្កត់ត្រង់ម្រាមជើង និងដៃទាំងពីរលើកខ្ពស់ផុតពីក្បាល។ ជំហានបន្ទាប់គឺអ្នកត្រូវយកដៃទាំងពីរភ្ជាប់គ្នារួចពត់ទៅក្រោយ។

2. កាយវិការ Willow

ចាប់ផ្តើមដោយដាក់ជើងទាំងពីរឱ្យឃ្លាតពីគ្នាបន្តិច ដាក់បាតជើងម្ខាងពីលើគន្លាក់ជង្គង​ម្ខាងទៀត ដៃទាំងពីរលើកឱ្យផុតពីក្បាល ដោយបាតដៃផ្គុំគ្នា រួចពត់ចង្កេះទៅចំហៀងខ្លួនដោយជើង​ខាងឆ្វេងលើកឡើង។ កម្រិតបន្ទាប់គឺអ្នកអនុវត្តដោយបិទភ្នែករក្សាលំនឹង។

3. កាយវិការ​ Rocking Boat

អ្នកអាចទទួលបានសាច់ដុំក្បាលពោះជាមួយនឹងលំហាត់ប្រាណនេះ ចាប់ផ្តើមដោយអង្គុយលើកម្រាល និងសណ្តូកជើងនិងដៃ រួចលើកជើងទាំងពីរឡើងឱ្យត្រង់ចេញជាសណ្ឋានអក្សរ V និងដកដង្ហើមមួយៗ។

4. កាយវិការ Hover

ចាប់ផ្តើមកាយវិការ Push Up រួចបន្ទន់កែងដៃបន្តិចដោយបន្ទាបដើមទ្រូងទៅកៀកនឹងកម្រាល និងទប់ខ្លួននៅពេលដែលដើមទ្រូងជិតប៉ះនឹងកម្រាល។ ទប់ដង្ហើម រួចដកដង្ហើមតាមធម្មតា។

5. កាយវិការ Chair

ឈរដោយជើងទាំងពីរផ្គុំគ្នា ហើយអង្គុយហាក់បីដូចជាអង្គុយលើកៅអីមួយ លើកដៃទាំងពីរឱ្យផុតពីក្បាលដោយបាតដៃទាំងពីរផ្គុំគ្នា​ ពើងទ្រូងឡើង និងស្មាពុតទៅក្រោយ ជង្គង់ទាំងពីររួមគ្នា។