រូបចម្លាក់បុរាណខ្មែរដ៏កម្រនិងល្អឯកចំនួន១៤ បានមកដល់កម្ពុជាហើយ

រូបចម្លាក់ដ៏កម្រ និងជាស្នាដៃឯកមួយគឺបដិមាព្រះលោកេសូរ ឬ លោកកេស្វារៈធ្វើពីសំលោហៈ ចុងសតវត្សរ៍ទី១០ ដើម១១នៃគ.ស និងរូបចម្លាក់១៣ផ្សេងទៀតបានមកដល់កម្ពុជាវិញហើយ ដោយនៅរសៀលថ្ងៃទី ០៤ ខែកក្កដា ឆ្នាំ២០២៤ នាយកដ្ឋានសារមន្ទីរ បានរៀបចំកម្មវិធី ប្រគល់-ទទួលវត្ថុបុរាណខ្មែរចំនួន១៤វត្ថុ ដែលជាសមុច្ច័យរបស់សារមន្ទីរ Metropolitan Museum ហៅកាត់ថា MET នៃសាហរដ្ឋអាម៉េរិក បានប្រគល់ត្រឡប់មកប្រទេសកម្ពុជាវិញ។

ក្រសួងវប្បធម៌ និងវិចិត្រសិល្បៈ បានឲ្យដឹងថា ក្នុងចំណោមវត្ថុទាំង១៤នោះ មានវត្ថុពិចិត្រមួយចំនួនដែលត្រូវបានយកចេញពីប្រទេសកម្ពុជាទៅដូចជា រូបប្រតិមាព្រះនាងឧមា ធ្វើពីថ្មភក់ ដែលត្រូវបានលួចយកចេញទៅក្នុងឆ្នាំ១៩៩៧, ព្រះសិរលោកេសូរ ធ្វើពីសំរឹទ្ធដែលមានដងខ្លួនរក្សាទុកនៅក្នុងសារមន្ទីរជាតិ និងប្រតិមាព្រះលោកេសូរធ្វើពីសំរិទ្ធដែលសារមន្ទីរ METទិញពីលោក ឌូគ្លាស ឡាដហ្វដ(Douglas Latchford)ក្នុងឆ្នាំ១៩៩២។

វត្ថុបុរាណដ៏សំខាន់មួយទៀតដែរនោះ គឺព្រះកេសព្រះលោកេសូរ ធ្វើពីសំរឹទ្ធនៅសតវត្សរ៍ទី១០គ.ស. ដែលកម្ពុជាតែងព្យាយាមស្វែងរកជាយូរមកហើយដើម្បីយកមកផ្តុំឡើងវិញជាមួយនឹងដងខ្លួនដែលបច្ចុប្បន្នកំពុងដាក់តាំងនៅសារមន្ទីរជាតិកម្ពុជា។ ចម្លាក់ព្រះកេសនេះប្រហែលត្រូវបានគេលួចនៅក្នុងទសវត្សរ៍១៩៩០។ ចំណែកដងខ្លួនត្រូវបានគេរកឃើញនៅក្នុងស្ទឹងមួយក្នុងខេត្តបាត់ដំបងតាំងពីយូរមកហើយ។ ការវិលត្រឡប់មកវិញនូវចម្លាក់ទាំងនេះមានតម្លៃសម្រាប់មនុស្សជាតិទាំងមូល។

ការបញ្ជូនត្រឡប់មកវិញនៃព្រលឹងដូនតានេះបានរួម ចំណែកយ៉ាងសំខាន់ដល់ការផ្សះផ្សានិងការព្យាបាលរបួសផ្លូវចិត្តរបស់ប្រជាជនកម្ពុជា ដែលបានឆ្លងកាត់សង្គ្រាមស៊ីវិល ជាច្រើនទសវត្សរ៍ និងរងគ្រោះដ៏ឈឺចាប់ពីសោកនាដកម្មនៃអំពើប្រល័យពូជសាសន៍ខ្មែរក្រហម។ លទ្ធផលប្រកបដោយផ្លែផ្កានេះ ក៏បានបង្ហាញនូវទំនាក់ទំនងកាន់តែរឹងមាំឡើងជាមួយសហរដ្ឋអាមេរិក៕