សហគ្រិនស្រ្តី បើកភោជនីយដ្ឋាន គោលដៅនាំយកម្ហូបអាហារវៀតណាម ឱ្យអន្តរជាតិបានស្គាល់

Kim Oanh Thi Nguyen គឺជាស្ថាបនិក និង ជាម្ចាស់នៃ Wrap & Roll ដែលជាភោជនីយដ្ឋានលក់អាហារវៀតណាម ដ៏ល្បីល្បាញនៅលើពិភពលោក។ Wrap & Roll ទទួលបានជោគជ័យក្រោមការដឹកនាំរបស់លោកស្រីស្ថាបនិក Kim Oanh Thi Nguyen ដោយសព្វថ្ងៃមានសាខារហូតដល់ទៅ 14 ទីតាំង។

កើតនៅក្នុងគ្រួសារមួយមានជីវភាពសមរម្យ Kim Oanh បានតាមចាប់ក្តីស្រម៉ៃរបស់ខ្លួន ដើម្បីក្លាយជាសហគ្រិនម្នាក់។ ក្រោយចូលធ្វើការនៅក្នុងក្រុមហ៊ុនឯកជនភាពអស់ប៉ុន្មានឆ្នាំ លោកស្រី បានចេញរកស៊ីខ្លួនឯង នៅក្នុងវិស័យម្ហូបអាហារ ​(F&B)។ ដោយមើលឃើញពីការខ្វះខាតនៅក្នុងទីផ្សារ និងសង្កេតឃើញពីសក្តានុពលនៃម្ហូបអាហារវៀតណាម ផងនោះ Kim Oanh បានសម្រេចបើកភោជនីយដ្ឋាន Wrap & Roll នៅក្នុងទីក្រុងហូជីមិញ។

ភោជនីយដ្ឋាន Wrap & Roll បានដាក់គោលដៅធំទៅលើអតិថិជន ជាស្រ្តី ព្រោះពួកគេមានចំណង់ចំណូលចិត្តហូបអាហារផ្តល់ផលល្អ ចំពោះសុខភាព នៅក្នុងភោជីយដ្ឋានបែបទំនើប។ គ្រាន់តែបើកលក់ភ្លាម Wrap & Roll បានទាក់ទាញអតិថិជនក្នុងស្រុក និង ភ្ញៀវបរទេសឱ្យច្រើននឹកស្មានមិនដល់ រហូតធ្វើឱ្យស្ថាបនិក នឹកឃើញគំនិតពង្រីកអាជីវកម្មរបស់ខ្លួនទៅក្រៅប្រទេស។ ភោជនីយដ្ឋាននេះ មានកេរ្តិ៍ឈ្មោះល្បីល្បាញ និង បានឈ្នះពានរង្វាន់មួយចំនួន ដូចជា Vietnam’s Top 100 Restaurants by Delicious Magazine នៅក្នុងឆ្នាំ 2012 និង Top 10 Authentic and Attractive Food with Vietnamese flavor នៅក្នុងឆ្នាំ 2010។ ភាពល្បីសុះសាយរបស់ Wrap & Roll បានធ្វើឱ្យស្ថាបនិក ក្លាយជាគណៈកម្មការមួយរូបនៅក្នុងកម្មវិធី Masterchef Vietnam។

ភាពជោគជ័យនៅក្នុងវិស័យអាជីវកម្ម ម្ហូបអាហារ របស់លោកស្រី Kim Oanh គឺកើតឡើងដោយសារកត្តាសំខាន់ៗដូចជា ការប្រើប្រាស់គ្រឿងផ្សំល្អៗ កត្តាអនាម័យនិងផាសុកភាព ក៏ដូចជាក្រុមការងារចាំបម្រើសេវាដល់ភ្ញៀវ មានភាពរហ័សរហួន រួសរាយរាក់ទាក់ ជាដើម៕

Wrap & Roll Vietnamese Cuisine Restaurant