ស្បែកមុខខ្លាញ់អាចនឹងពិបាកក្នុងការថែទាំ.. សូមកុំបារម្ភ សាកល្បងវិធីខាងក្រោមនេះ

សុខភាពស្បែកមុខមនុស្សយើងម្នាក់ៗ គឺខុសៗគ្នា ខ្លះជាស្បែកមុខស្ងួត ខ្លះជាស្បែកមុខខ្លាញ់ រីឯអ្នកខ្លះទៀតមានស្បែកមុខចម្រុះ (ខ្លាញ់ + ស្ងួត) ទៅតាមអ័រម៉ូននៃរូបរាងកាយ​ ប៉ុន្តែអ្វីដែលសំខាន់នោះគឺថា អ្នកយល់ដឹងអំពីវិធីសាស្រ្តក្នុងការថែទាំសុខភាពស្បែកតាមប្រភេទនីមួយៗ។

ក្នុងចំណោមស្បែកទាំង ៣ ប្រភេទខាងលើ “ស្បែកខ្លាញ់” ពិបាកក្នុងការថែទាំជាងគេ ព្រោះស្បែកប្រភេទនេះ ងាយរងប្រតិកម្មបំផុត និងអាចបង្កឱ្យមានការកើតមុន រលាក និងមានរន្ធញើសធំៗ ឬស្ទះរន្ធញើសជាដើម។

ឡេឌីស៍ សូមណែនាំគន្លឹះខ្លះៗទាក់ទងនឹងការទាំប្រភេទស្បែកមុខខ្លាញ់ ដូចខាងក្រោម៖

សម្អាតស្បែកមុខ

ដើម្បីទប់ទល់នឹងការកើនឡើងខ្លាញ់នៅលើស្បែកមុខ ប្រាកដណាស់អ្នកត្រូវធ្វើការសម្អាតស្បែកមុខឱ្យបានស្អាតល្អ។ សម្អាតក្នុងមួយថ្ងៃឱ្យបាន ២ ទៅ ៣ ដង ដោយជ្រើសរើសផលិតផលណាសម្រាប់ស្បែកមុខខ្លាញ់។ ប្រសិនបើអ្នកមិនសម្អាតស្បែកមុខឱ្យបានត្រឹមត្រូវទេ ខ្លាញ់នឹងកាន់តែកើនឡើងដែលអាចបណ្តាលឱ្យកើតមុន និងស្ទះរន្ធញើស។

ជម្រុះកោសិកាចាស់ៗ

ព្យាយាមជម្រុះកោសិកាចាស់ៗឱ្យបានទៀងទាត់ ការជម្រុះ​អាចកាត់បន្ថយការកើតមុន និងធ្វើឱ្យស្បែកភ្លឹថ្លា។ សូមជម្រុះ ១ ទៅ ២ដង​ ក្នុងមួយសប្តាហ៍ ដើម្បីធានាថាស្បែកមុចអ្នកគ្មានការកក់ស្ទះកោសិកាចាស់ៗ។

ផ្តល់សំណើមដល់ស្បែក

ត្បិតស្បែកមុខខ្លាញ់ មិនមានសភាពស្ងួត ប៉ុន្តែស្បែកប្រភេទនេះក៏ត្រូការជាតិសំណើម និងជាតិទឹកផងដែរ។ នៅ​ពេល​ដែល​យើង​មិន​ផ្តល់​សំណើម​ដល់​ស្បែក​ នោះ​ក្រពេញ​Sebaceous ​នឹង​ផលិត​ខ្លាញ់​កាន់​តែ​ច្រើន​ ដែល​ជា​ហេតុ​នាំ​ឲ្យ​យើង​ប្រឈម​នឹង​បញ្ហា​ស្បែក​ផ្សេង​ៗ។

ប្រើប្រាស់ឡេការពារកម្តៅថ្ងៃ

សូមលាបឡេកម្តៅថ្ងៃជាប្រចាំ ដើម្បីជៀសវាងការឡើងមុន និង ការរលាកដោយកម្តៅ UV ពីព្រះអាទិត្យ។