ស្វែងយល់ពីប្រសិទ្ធភាព ពណ៌អាវ សម្រាប់ទប់ទល់​នឹង​អាកាសធាតុ​ដ៏ក្ដៅនាពេលបច្ចុប្បន្ន

អាកាសធាតុកាន់តែក្តៅ អាត្រាប្រជាជនដែលប្រឈមនឹងជំងឺដាច់សរសៃឈាមខួរក្បាលកាន់តែកើនឡើង។ កម្តៅកាន់កើនក្តៅ មិនមែនជារឿងលេងសើចទេ វាអាចបង្កផលប៉ះពាល់យ៉ាងច្រើនដល់សុខភាព ដូច្នេះហើយអ្នកគួរតែស្វែងយល់អំពីវិធីសាស្រ្តក្នុងការការពារខ្លួនពីឥទ្ធិពលអាក្រក់ទាំងនោះ ដោយជ្រើសរើសសម្លៀកបំពាក់ដែលមិនចូលរួមស្រូបកម្តៅបន្ថែម ឧស្សាហ៍ជ្រកម្លប់ត្រជាក់ ទទួលទានទឹកឱ្យបានច្រើន កុំព្យាយាមបញ្ចេញកម្លាំងលើសលប់ពេក។

ការជ្រើសពណ៌នៃសម្លៀកបំពាក់ និងរបៀបក្នុងការស្លៀកពាក់នារដូវក្តៅនេះ ពិតជាសំខាន់ខ្លាំងណាស់។ ប្រសិនបើអ្នកមិនបានស្វែងយល់អំពីពណ៌នៃអាវដែលបន្ថែមការស្រូបកម្តៅពីព្រះអាទិត្យទេ នោះវាកាន់តែបង្កគ្រោះថ្នាក់លើសពីអ្វីដែលអ្នកគិតទៅទៀត។

យោងតាម លោក “Toshiaki Ichinose” ជាអ្នកស្រាវជ្រាវវិទ្យាសាស្ត្រផ្នែកបរិស្ថានវិទ្យានៅក្នុងវិទ្យាស្ថានសិក្សាទៅលើបរិស្ថាន ស្ថិតនៅប្រទេសជប៉ុន បានឱ្យដឹងថា “យើងបានធ្វើការពិសោធន៍ ដោយប្រើប្រាស់អាវចំនួន ៩ ពណ៌ខុសគ្នា ប៉ុន្តែផលិតពីប្រភេទសាច់ក្រណាត់ដូចគ្នា ដោយដាក់នៅហាលក្រោមកម្តៅថ្ងៃក្នុងសីតុណ្ហភាព 30 ° C រយៈពេល 5 នាទី។

ពណ៌ដែលត្រូវបានប្រើប្រាស់សម្រាប់ការពិសោធន៍គឺ៖
1. ពណ៌ក្រហម
2. ពណ៌ស
3. ពណ៌ខៀវ
4. ពណ៌បៃតងចាស់
5. ពណ៌ប្រផេះ
6. ពណ៌មុជទឹក
7. ពណ៌ស្វាយ
8. ពណ៌លឿង
9. ពណ៌បៃតងស្រាល

លទ្ធផលនៃការពិសោធន៍បានបង្ហាញអំពីការផ្លាស់ប្តូរសីតុណ្ហភាពនៃសាច់ក្រណាត់របស់អាវដូចខាងក្រោម​ ៖
• ពណ៌អាវដែលស្រូបកម្តៅសីតុណ្ហភាពកម្រិតទាបបំផុត គឺ ពណ៌ស និងពណ៌លឿង (30-34° C)។
• ពណ៌អាវដែលស្រូបកម្តៅសីតុណ្ហភាពកម្រិតមធ្យម គឺ ពណ៌ប្រផេះ ពណ៌ក្រហម ពណ៌ស្វាយ និងពណ៌ខៀវ។
• ពណ៌អាវដែលស្រូបកម្តៅសីតុណ្ហភាពកម្រិតខ្ពស់ មាន ពណ៌បៃតងស្រាល និងពណ៌បៃតងចាស់។
• ចំណែកពណ៌អាវដែលស្រូបកម្តៅសីតុណ្ហភាពកម្រិតខ្ពស់បំផុត គឺ ពណ៌ខ្មៅ (50° C) ។

 

ដូច្នេះ ការជ្រើសរើសពណ៌អាវក្នុងការពាក់គឺមានសារសំខាន់ណាស់អំឡុងរដូវក្តៅនេះ។ កម្តៅនៃព្រះអាទិត្យជះភាពក្តៅពីចម្ងាយបានធ្វើឱ្យអ្នកល្ហិតល្ហៃហើយ សូមកុំស្លៀកពាក់នូវអាវ ឬខោណាដែលស្រូបកម្តៅបន្ថែមទៀត។

សូមថែរក្សាសុខភាពឱ្យបានដិតដល់ទាំងអស់គ្នា នារដូវក្តៅនេះ ជាពិសេសមនុស្សមានវ័យចំណាស់ និងកុមារតូចៗ។