អត្ថប្រយោជន៍នៃផ្លែត្រសក់ រក្សាសម្រស់ឱ្យក្មេងជាងវ័យ និងស្បែកមុខស្រស់ថ្លា

ត្រសក់ គឺជាបន្លែមួយប្រភេទដែលសម្បូរទៅដោយវីតាមីន C កាល់ស្យូម ស៊ីលីកា និងប៉ូតាស្យូម ដូច្នេះហើយទើបមនុស្សមួយចំនួននិយមយកត្រសក់មកធ្វើជាឱសថប្រចាំត្រកូលក្នុងការថែទាំស្បែកឱ្យស្រស់ស្អាត ទទួលបានសម្រស់ផូរផង់ក្មេងជាងវ័យដែលអ្នកនឹកស្មានមិនដល់។ ត្រសក់មិនគ្រាន់តែល្អចំពោះស្បែកមុខតែប៉ុណ្ណោះទេ វានៅមានអត្ថប្រយោជន៍ជាច្រើនផ្សេងទៀតដែលអ្នកពុំទាន់បានស្វែងយល់ដឹង។

ដូច្នេះ ឡេឌីស៍ សូមបង្ហាញជូនអត្ថប្រយោជន៍បន្ថែមនៃផ្លែត្រសក់ដែលអ្នកគួរដឹង។​

ត្រសក់បំបាត់អាការហើមភ្នែក និងភ្នែករូង ៖ ចំពោះសុភាពនារីដែលអង្គុយធ្វើការនៅមុខកញ្ចក់កុំព្យូទ័រពេញមួយថ្ងៃរហូត អាចប្រឈមជាមួយនឹងអាការផ្សាភ្នែក ហើមភ្នែកដូចខ្លាឃ្មុំផេនដា និងភ្នែករ៉ូងជ្រៅដូចមិនបានគេងគ្រប់គ្រាន់​​​​​​​​​​​​​​​​​​​។ បើអ្នកមានអាការបែបនេះហើយ សូមចិតត្រសក់ជាចំណិតស្តើងៗយកមកដាក់នៅលើត្របកភ្នែករបស់អ្នកប្រមាណរយៈពេល ២០នាទី នោះជាតិអំបិលរ៉ែដែលមានផ្ទុកនៅក្នុងផ្លែត្រសក់នឹងជ្រាបចូលទៅក្នុងស្បែក ដែលអាចជួយបំបាត់អាការហើមភ្នែកបានយ៉ាងមានប្រសិទ្ធិភាព។ ហើយបើអ្នកអនុវត្តជាប្រចាំរៀងរាល់ថ្ងៃ ស្បែកដែលយារធ្លាក់ ខ្លាញ់ និងស្នាមជ្រាវជ្រួញជុំវិញភ្នែកប្រាកដជាមិនហ៊ានមកក្បែរអ្នកទៀតទេ។ ម្យ៉ាង លើសពីនេះប្រសិនបើអ្នកទទួលទានទឹកផ្លែត្រសក់ជារៀងរាល់ថ្ងៃ វាហាក់បីដូចជាអ្នកកំពុងទទួលបានថ្នាំទិព្វលាងជាតិពុលអាក្រក់ក្នុងរាងកាយទៀតផង។

វិធីប្តូរត្រសក់ឱ្យក្លាយជាឱសថឌីថក់ (Detox) ព្យាបាលស្បែកមុខ ៖

ទឹកឌីថក់ (Detox) គឺជាថ្នាំបន្សាបជាតិពុលដែលអាចធ្វើបានយ៉ាងងាយបំផុត ដោយអ្នកគ្រាន់តែគាបច្របាច់យកទឹកត្រសក់មួយផ្លែ លាយជាមួយទឹកខ្ញីស្រស់ៗ ប៉ុន្តែសូមបញ្ជាក់ថា ទទួលទាននៅពេលភ្ញាក់ពីគេងភ្លាមៗ ព្រោះឌីថក់ដែលទទួលបានលទ្ធផលល្អត្រូវធ្វើនៅពេលពោះទទេ មិនទាន់ទទួលទានអ្វីទាំងអស់។

ប្រសិនបើអ្នកចេញទៅក្រៅ ត្រូវកម្តៅថ្ងៃរហូតទាល់តែផ្សារោលស្បែក សូមអ្នកច្របាច់យកទឹកត្រសក់លាយជាមួយឡេបំប៉នស្បែកដែលអ្នកប្រើប្រាស់ជាប្រចាំថ្ងៃ កន្លះស្លាបព្រាកាហ្វេ យកមកលាយហើយលាបនៅបរិវេណដែលរលាកនោះ។ វានឹងជួយឱ្យស្បែកអ្នកឡើងត្រជាក់វិញ ហើយវីតាមីន D ដែលបានមកពីត្រសក់នឹងផ្តល់សំណើមដល់ស្បែក ជួយកាត់បន្ថយភាពផ្សាក្រហាយបានយ៉ាងមានប្រសិទ្ធិភាព និងទាន់ចិត្តបំផុត។