អាហារដែលស្ត្រីគួរចៀសវាងបរិភោគ ក្នុងអំឡុងពេលមានវដ្តរដូវប្រចាំខែ

ស្រ្តីមួយចំនួនតែងទទួលនូវអាការឈឺចុកចាប់ក្នុងអំឡុងពេលមករដូវ ឬគេហៅថាការធ្លាក់ឈាមប្រចាំខែនៃនារីភេទ។ ការមកវដ្តរដូវនេះ គឺជាធម្មជាតិរបស់មនុស្សស្រី នោះមានន័យថារូបរាងកាយរបស់អ្នកនឹងធ្វើការបញ្ចេញចោលនូវជាលិកាដែលលែងត្រូវការ តាមរយៈឈាមរដូវ។

ដូច្នេះ​ក្នុងអំឡុងពេលមានវដ្តរដូវប្រចាំខែ ស្រ្តីអាចទទួលរងអារម្មណ៍ឈឺចាប់មួយចំនួន ល្ហិតល្ហៃ អស់កម្លាំង ចុកផ្នែកខាងក្រោមពោះ ឬជាំអាការឈឺក្បាល វិលមុខដូចគ្នា។​ ដូច្នេះហើយទើប ស្រ្តីត្រូវយកចិត្តទុកដាក់ទៅលើចំណីអាហារបរិភោគ ព្រោះអាហារមួយចំនួនអាចបន្ថែមការឈឺចាប់ក្នុងអំឡុងពេលមកវដ្តរដូវរបស់អ្នក។

ខាងក្រោមនេះ គឺជាប្រភេទអាហារមួយចំនួនដែលស្រ្តីមិនគួរទទួលទានអំឡុងពេលមានវដ្តរដូវប្រចាំខែ ៖

កាហ្វេ

ជាតិកាហ្វេអ៊ីន គឺមិនល្អចំពោះស្រ្តីដែលកំពុងមកខែ ព្រោះសារធាតុនេះអាចបណ្តាលឱ្យ ហើមពោះ មានបញ្ហាប្រព័ន្ធរំលាយអាហារបន្តិចបន្តួច (អាចបណ្តាលឱ្យស្រ្តីរាគ​ កន្រ្ទាក់សាច់ដុំពោះ) ម៉្យាងវាក៏អាចធ្វើឱ្យអ្នកមានអាការឈឺក្បាលបន្ថែមផងដែរ។

គ្រឿងស្រវឹង

ជាតិអាល់កុល​នៅក្នុងសុរា មានផលប៉ះពាល់ជាច្រើនដល់សុខភាពស្រ្តី ជាពិសេសប្រសិនបើស្រ្តីទទួលទានក្នុងអំឡុងពេលមករដូវ។ ជាតិអាល់កុល អាចធ្វើឱ្យអ្នកខ្សោះជាតិទឹកក្នុងខ្លួន ឈឺក្បាល ឈឺពោះ ក្អួតចង្អោរ អស់កម្លាំង។ល។

អាហារដែលមានជាតិហឹរ

ស្រ្តីដែលចូលចិត្តទទួលទានអាហារដែលមានជាតិហឹរ អាចនឹងប្រឈមបញ្ហា ឈឺក្រពះ រាគ ឈឺពោះ លើសពីនេះអ្នកអាចក្អួតចង្អោរទៀតផង។ 

ជាតិស្ករ

ប្រសិនបើអ្នកបរិភោគអាហារដែលផ្ទុកជាតិស្ករច្រើន វាអាចជារឿងមិនល្អសម្រាប់អ្នក ព្រោះជាតិស្ករអាចបន្ថែមនូវកម្រិតការឈឺចាប់ ២ដង ទៅលើការឈឺចាប់ក្នុងអំឡុងពេលមករដូវដែលអ្នកកំពុងជួបប្រទះ។ 

អាហារកែច្នៃ

អាហារកំប៉ុង សាច់កែច្នៃ និងប្រភេទអាហារផ្សេងទៀតដែលផលិត និងរក្សាទុកដោយសារធាតុគីមី ធ្វើឱ្យហើមពោះ និងបាត់បង់ជាតិទឹកក្នុងខ្លួន។ កម្រិតខ្ពស់នៃជាតិសូដ្យូមគឺមិនល្អសម្រាប់សុខភាពស្រ្តីនៅពេលមកវដ្ដតរដូវប្រចាំខែនោះទេ៕