អូលីវ៉ា គង់ រំភើបចិត្តបានយកវប្បធម៌ដូនតាទៅបង្ហាញពិភព​លោក ហើយត្រូវសារព័ត៌មានធំៗចុះផ្សាយទៀត

លោក ម៉ែន សីហា ហៅ អូលីវ៉ា គង់ រួម​នឹង​សិល្បករខ្មែរច្រើនរូបទៀត​បានបញ្ចប់បេសកកម្ម​នៅលើកម្រាលព្រំក្រហមទីក្រុងកានប្រទេសបារាំង ស្រប​ពេលសាមីខ្លួនបានអះអាង​ថា លោក​រីករាយ និងមោទកភាពណាស់ដែលបាននាំយកសិល្បៈវប្បធម៌ដូនតាទៅបង្ហាញពិភពលោក។

 

លោក អូលីវ៉ា បាននាំ​យកឈុត​សំលៀកបំពាក់ច្នៃដោយកូនខ្មែរ២ ឈុត ឆ្ពោះ​ទៅកម្រាលព្រំក្រហមដ៏មានកិត្យានុភាព​របស់ Cannes។ ថ្ងៃដំបូងបំផុតនៅលើកម្រាលព្រំ លោក បាន​បង្ហាញឈុត រយលានអត្ថន័យ ឫ Millions Followers។

រូបភាព៖ gettyimages

ថ្ងៃបន្ទាប់ លោក​បានបង្ហាញឈុត គឺ “ឈុតសមរាត្រីបរមវិស្ណុលោក” ដែលច្នៃបង្កប់សិល្បៈវប្បធម៌ខ្មែរដ៏ល្អឯក។ ឈុត​នេះច្នៃផ្សំចេញពី​សិល្បៈស្បែកធំ កូរសមុទ្រទឹកដោះ និង​ព្រឹត្តិការណ៍សមរាត្រីនៅអង្គរវត្ត ឬហៅម្យ៉ាងទៀត​ថា Equinox។

 

ឈុត​នេះទាំងស្អាត និងមានអត្ថន័យ ដោយបានធ្វើអោយពលរដ្ឋកម្ពុជា​សម្ដែងការសាទរភាគច្រើន។ ក្រៅ​ពី​នេះ ក៏​មានសារព័ត៌មានធំៗរបស់ ចក្រភព​អង់គ្លេស និងអ៊ីតាលី ក៏បាន​ធ្វើការចាប់អារម្មណ៍ដែរ។

រូបភាព៖ FAB UK Magazine

D Fashion Magazine ទស្សនាវដ្ដី​អនឡាញ​ធំ​មួយរបស់ អ៊ីតាលី ដែលមានមូលដ្ឋាន​ផ្សាយនៅ ឌូបៃ និង​ប្រទេស​អារ៉ាប់រួម បាន​ដាក់ចំណងជើងថា “ម៉ែន សីហា(អូលីវ៉ា គង់) គឺជា​អ្នកច្នៃម៉ូត​ល្បីឈ្មោះរបស់កម្ពុជា”។

 

ចំពោះបញ្ហានេះ លោក អូលីវ៉ា លើកឡើងថា លោកពិតជារំភើបរីករាយមែនទែន។ “រំភើបចិត្តណាស់ ពិភពលោកចាប់ផ្ដើមទទួលស្គាល់ពីភាពអស្ចារ្យរបស់កម្ពុជាហើយ”។

អូលីវ៉ា គឺ​ជាសិល្បករកម្ពុជាទី២ ដែលទទួលបានការចាប់អារម្មណ៍ពីសារព័ត៌មាន​របស់​អឺរ៉ុប។ នៅមុន​នេះ មាន សូនីតា ក៏ធ្វើបានដូចគ្នា​ តាម​រយៈ​ឈុត “រាជិនីក្រមាយ័ន្តខ្មែរ” ដោយ​សារព័ត៌មានចក្រភពអង់គ្លេស Dailymail និងសារព័ត៌មានប្រចាំតំបន់របស់បារាំង Nice martin៕