អ្នកស្ទឹងត្រែងដ៏ស្រស់ស្អាតរូបនេះ តស៊ូពីបុគ្គលិកក្នុងហាងកូពី រហូតក្លាយជាប្រធានក្រុមប្រឹក្សាភិបាលក្រុមហ៊ុន

វ៉ាន់ នីដា ហៅក្រៅថា អាឡិច គឺជាស្ត្រីដ៏ស្រស់ស្អាត ឆ្លាត និងពូកែ ដោយបច្ចុប្បន្នកំពុងកាន់តំណែងជាប្រធានក្រុមប្រឹក្សាភិបាលក្រុមហ៊ុន DI&ZA(Cambodia)Co.,Ltd ប៉ុន្តែមុនមកដល់ចំណុចនេះ ស្ត្រីវ័យក្មេងរូបនេះ ក៏មានប្រវត្តិតស៊ូណាស់មិនធម្មតាដែរ។

មូ វណ្ណនីដា ឬ អាឡិច ជាអ្នកខេត្តស្ទឹងត្រែង និងជាកូនស្រីពៅក្នុងគ្រួសារដែលឪពុកម្ដាយសុទ្ធតែជាអ្នកជំនួញ។ អាឡិច ប្រាប់ថា ដើមឡើយគ្រួសារនាង មានជីវភាពធូរធា ប៉ុន្តែអំឡុងឆ្នាំ ២០១៣ គ្រួសារបានជួបវិបត្តិសេដ្ឋកិច្ចធ្ងន់ធ្ងរ ធ្វើឲ្យទ្រព្យសម្បត្តិដែលមានទាំងប៉ុន្មានទៅបង់ទៅវិញអស់គ្មានសល់។

ស្ថានភាពនេះ បានរុញឲ្យ អាឡិច ដែលកាលណោះទើបតែមានវ័យប្រមាណ ១៤-១៥ឆ្នាំ និងជាកូនពៅក្នុងចំណោមបងប្អូន៥នាក់សុទ្ធតែស្រី ត្រូវបង្ខំចិត្តថាត្រូវតែធ្វើអ្វីម្យ៉ាងដើម្បីជួយគ្រួសារ។

អាឡិច បានផ្សងព្រេងឡើងមកភ្នំពេញ ក្នុងបំណងស្វែងរកអ្វីម្យ៉ាង។ “ខ្ញុំឡើងមកភ្នំពេញនៅអំឡុងឆ្នាំ ២០១៤ ដើម្បីមករកការងារធ្វើ ក៏ចង់ដឹងថានៅភ្នំពេញហ្នឹងអាចរកបានអនាគតយ៉ាងម៉េច ហើយខ្ញុំជឿថា មានតែទីក្រុងទេទើបអាចបំភ្លឺផ្លូវខ្ញុំបាន!”។

ការងារដំបូងរបស់ អាឡិច នៅភ្នំពេញ គឺជាបុគ្គលិកក្នុងហាងកូពីនៅពេលថ្ងៃ ពេលយប់ទៅធ្វើការនៅក្នុងម៉ាតមួយកន្លែង។ ការងារទាំង២ បានផ្ដល់តម្លៃតបស្នងសរុប ៧៥ដុល្លារអាមេរិកប៉ុណ្ណោះក្នុង១ខែ។ តួលេខនេះ ស្ត្រីវ័យក្បែរ៣០ឆ្នាំរូបនេះ ប្រាប់ថា នាងចាយមិនដែលគ្រប់ ព្រោះត្រូវចំណាយលើផ្ទះជួល៣០ដុល្លារផង យ៉ាងណា នាងថា ត្រូវតែប្រឹងរស់តាមហ្នឹង។

ជីវិតស្ថិតក្នុងស្ថានភាពមិនប្រាកដប្រជាដដែល អាឡិច ដឹងច្បាស់ថា មានតែការសិក្សាទេ ទើបអាចជួយចម្លងបាន។ ដូច្នេះនាងក៏បាន ចូលរៀនថ្នាក់បរិញ្ញាបត្រនៅសាលា NUM។

ក្រោយចប់ នាងក៏បានចូលធ្វើការជាអ្នកលក់អចលនទ្រព្យវិញ។ ការងារនេះហើយ ដែលបានផ្លាស់ប្ដូរជោគវាសនានាង។ ប៉ុន្តែនៅក្នុងនោះ អាឡិច មានចំណុចខ្លាំងមួយ គឺនាងពូកែក្នុងទំនាក់ទំនងលក់ និងពូកែយកចិត្តភ្ញៀវ ជាលទ្ធផលនាង អាចរកប្រាក់បានច្រើនគួរសម ពីការងារនេះ។

លុះក្រោយមក អាឡិច ក៏បានស្គាល់ស្វាមីបច្ចុប្បន្នដែលជំនាញខាងវិស្វកម្ម និងសំណង់ នាងក៏បានរួមគ្នាបង្កើតក្រុមហ៊ុនផ្នែកដេគ័រមួយ និងចុងក្រោយនេះ គឺក្រុមហ៊ុនផ្គត់ផ្គង់ផលិតផលថែរក្សាសម្ផស្សយីហោ Alexza រូបមន្តរបស់ប្រទេសជប៉ុន ក្រោយពីបានមើលឃើញឱកាសមួយក្នុងទីផ្សារនេះ។

ទាំងក្រុមហ៊ុនដេគ័រ និងក្រុមហ៊ុនផលិតផល កំពុងតែដំណើរល្អ ក្នុងនោះអាជីវកម្មទី២របស់នាង ដែលទើបតែដំណើរបានតែជាង ១ខែ កំពុងបោះជំហានយ៉ាងលឿន។ បច្ចុប្បន្ន អាឡិចគ្រប់គ្របបុគ្គលិកប្រមាណ ៣០នាក់ និងមានតំណាងចែកចាយប្រមាណ ៥០០នាក់។

អាឡិច បានរៀបការជាមួយស្វាមីនៅឆ្នាំ ២០១៩ និងមានកូនស្រីម្នាក់អាយុ ៣ឆ្នាំ។ ឆ្លងតាមបទពិសោធន៍ផ្ទាល់ខ្លួន អាឡិច លើកទឹកចិត្តឲ្យនារីគ្រប់រូប កុំបោះបង់ការសិក្សា ព្រោះមានតែការសិក្សាប៉ុណ្ណោះ គឺជាគ្រឿងបំភ្លឺផ្លូវដើម្បីដើរទៅរកគោលដៅដ៏ឧត្តុងឧត្តមមួយ៕