ខាត់ វ៉ៃហាំង សិល្បករខ្មែរម្នាក់គត់ បានពានតារាប្រុសកំពុងមានប្រជាប្រិយភាពខ្លាំងពី Global Leadership Summit 2023

តារាសម្តែងប្រុសឆ្នើមជួរមុខ ខាត់ វ៉ៃហាំង បានលេចមុខក្នុងកម្មវិធីកម្រាលព្រំក្រហម និង Gala Night Award របស់កម្មវិធី Global Leadership Summit 2023 ដែលកម្មវិធីនេះត្រូវបានប្រារព្ធក្នុងប្រទេសថៃ។កម្មវិធីនេះមានការអញ្ជើញចូលរួមពីសំណាក់វត្តមាន មន្រ្តីយោធាជាន់ខ្ពស់របស់ប្រទេសថៃ តារា និងភ្ញៀវកិត្តិយសមកពីបណ្តាប្រទេសផ្សេងៗ ជាច្រើន។
លោក ខាត់ វ៉ៃហាំង ត្រូវបានកម្មវិធី Global Leadership Summit 2023 ជ្រើសរើសផ្តល់ពានរង្វាន់ផ្នែក “តារាប្រុសកំពុងមានប្រជាប្រិយភាពខ្លាំង” ព្រោះសមិទ្ធផលស្នាដៃខ្សែភាពយន្តភាគនៅស្ថានីយទូរទស្សន៍ប៉ុស្ត៍ភីអិនអិន និងការផលិតកម្មវិធីទេសចរណ៍ សាកថ្មជីវិត ដែលបានរួមចំណែកផ្សព្វផ្សាយពីសក្តានុពលដែលអំណោយផលដោយធម្មជាតិ ក្នុងនោះរួមមាន ការបណ្តុះគំនិតថែរក្សារធនធានធម្មជាតិ និងបរិស្ថាន ការចែករំលែកក្តីស្រលាញ់ដល់កុមារនៅតំបន់ដាច់ស្រយាល ការបង្ហាញពីការមិនរើសអើង និងសម័យកាលនៃម្លប់សន្តិភាព។ អ្វីដែលពិសេសជាងគេ គឺការផ្ទុះខ្លាំងនៃភាពយន្តខ្នាតធំរឿង “ប្រុសលក់ខ្លួន” ឬ “RENT BOY” ដែលល្បីសុះសាយចេញដល់ក្រៅប្រទេស។

នៅកំឡុងពេល បីឆ្នាំចុងក្រោយនេះ លោក ខាត់ វ៉ៃហាំង តារាប្រុសដែលកំពុងទទួលបានប្រជាប្រិយភាពខ្លាំង បានទទួលពានរង្វាន់ចំនួន ៦ រួចមកហើយផងដែរ ។ នៅឆ្នាំ២០២០ លោកបានទទួលពានរង្វាន់ចំនួនពីរ ក្នុងកម្មវិធី Thailand Digital Award 2020 និងលើកទី២ លោកទទួលបានពានរង្វាន់ក្នុងកម្មវិធី Thailand Digital Award 2022 សម្រាប់ឆ្នាំ២០២២ លោកទទួលបានពានរង្វាន់ចំនួន ពីរផងដែរ ដែលពានរង្វាន់ទី១ មានឈ្មោះថា តារាសម្ដែងឋិតក្នុងដូងចិត្តទស្សនជនជារៀងដរាប និងពានរង្វាន់ទី២ ដៃគូសម្ដែងដ៍សក្ដិសម និងពានរង្វាន់មួយទៀតមានឈ្មោះថា The Best of K beauty Award 2022។ សម្រាប់ដើមឆ្នាំ២០២៣ លោកទទួលបានពានរង្វាន់តារាប្រុសមានប្រជាប្រិយភាពប្រចាំឆ្នាំ ដែលធ្វើឡើងក្នុងប្រទេសថៃ សម្រាប់ព្រឹត្តិការណ៍ Asian Top Award 2023 ផងដែរ។ សម្រាប់ចុងឆ្នាំ២០២៣ លោក ខាត់ វ៉ៃហាំង បានទទួលពានរង្វាន់មួយទៀត ក្នុងកម្មវិធី Global Leadership Summit 2023ជាសមិទ្ធផលស្នាដៃថ្មីមួយ និងជាមោទនភាពសម្រាប់សិល្បករខ្មែរ និងប្រជាជនកម្ពុជា ក្នុងនាមជាតារាសម្តែងដែលមាននាំយកសិល្បៈវប្បធម៌ដ៏រស់រវើករបស់ខ្មែរទៅកាន់ពិភពលោកបាន។