ភាពហត់នឿយនៃការធ្វើទំនាក់ទំនងក្នុងសង្គម

នៅក្នុងសង្គមបច្ចុប្បន្នមនុស្សជាច្រើនជួបប្រទះបញ្ហាផ្សេងៗគ្នា ពួកគេត្រូវរកដំណោះស្រាយ និងការទប់ទល់ចំពោះបញ្ហានោះរៀងៗខ្លួន។ មិនត្រឹមតែទទួលរងនូវបញ្ហាផ្ទាល់ខ្លួនទេ ពួកគេក៏ទទួលរងនូវភាពហត់នឿយនៅក្នុងការធ្វើទំនាក់ទំនងក្នុងសង្គម ដែលបញ្ហានេះតែងកើតមានឡើងជាញឹកញយនៅពេលដែលអ្នកបានចូលសង្គមរហូតដល់ចំណុចមួយដែលអ្នកមិនអាចធ្វើសកម្មភាពនោះបន្តទៀតបាន។ កត្តាដែលបង្កឱ្យកើតមានអារម្មណ៍ថាហត់នឿយក្នុងសង្គម អាចត្រូវបានកើតឡើងដោយ ការអស់កម្លាំងផ្លូវចិត្ត និង ភាពហត់នឿយក្នុងខ្លួនប្រាណ ។

វាមិនមែនការហត់នឿយដែលទាក់ទងនឹងតួនាទីផ្ទាល់ខ្លួន ឬទំនួលខុសត្រូវដែលជាក់លាក់នោះទេ ការហត់នឿយនៅក្នុងសង្គមគឺជាអារម្មណ៍ទូលំទូលាយនៃការហត់នឿយដែលទទួលបានពីបរិយាកាសជុំវិញខ្លួន និងបញ្ចេញកម្លាំងហួសប្រមាណ បន្ទាប់ពីចំណាយពេលជាមួយអ្នកដទៃ។ វាបានជះឥទ្ធិពលយ៉ាងអាក្រក់ដល់មនុស្សគ្រប់រូបខុសៗគ្នា ហើយថែមទាំងប្រែប្រួលពេញមួយដំណាក់កាលនៃជីវិតរបស់ពួកទៀត។

សញ្ញាណនៃភាពហត់នឿយនៅក្នុងការធ្វើទំនាក់ទំនងក្នុងសង្គម៖

• មានអារម្មណ៍ឆាប់ខឹង ម៉ួរម៉ៅ និងមិនចេះអត់ធ្មត់

• បាត់បង់ភាពរីករាយចំពោះអន្តរកម្មសង្គមរីករាយ

• អស់កម្លាំងផ្លូវអារម្មណ៍ និងរាងកាយទាំងមូលគ្មានថាមពល

• ពិបាកក្នុងការផ្តោតអារម្មណ៍

• ការដកខ្លួនចេញពីសង្គម និងចង់នៅម្នាក់ឯងជាជាងមានគ្នីគ្នា

• រោគសញ្ញាដែលបញ្ចេញទៅលើរាងកាយខាងក្រៅ ដូចជា ឈឺក្បាល ឬគេងមិនលក់ជាដើម

1. កំណត់គោលដៅសង្គមឱ្យបានច្បាស់លាស់៖

ចូរអនុញ្ញាតឱ្យខ្លួនអ្នកផ្លាស់ប្តូរទៅតាមរបបសង្គមចុះ ប៉ុន្តែត្រូវមានគោដៅផ្ទាល់ខ្លួនច្បាស់លាស់ និងជៀសវាងការទទួលរងនូវបន្ទុកដែលលើសកម្រិតនៃកាលវិភាគផ្ទាល់ខ្លួនរបស់អ្នក។

2. កាលវិភាគ “ពេលវេលាផ្ទាល់ខ្លួន”៖

ចូរអ្នកចាត់ទុកពេលទំនេររបស់អ្នក សំខាន់ដូចការប្រជុំដ៏ធំមួយ។ បង្កើតវិសម្សកាលសម្រាប់ការដើរកំសាន្ត កាត់បន្ថយភាពតានតឹង ការធ្វើសម្មាធិសម្រួលផ្លូវអារម្មណ៍ ឬសម្រាករាងកាយទាំងមូល។

3. រៀបចំវិធីថែទាំខ្លួនឯងខ្នាតតូចនៅកន្លែងធ្វើការ៖

មានអារម្មណ៍ធុញថប់បន្ទាប់ពីការប្រជុំមែនទេ? អ្នកអាចចាក់ទឹកតែក្តៅញុំាមួយកែវ ស្តាប់តន្រី្តរំងាប់អារម្មណ៍ រួចបិទភ្នែក តម្រេតដងខ្លួនផ្អែកលើកៅអីក្នុងបន្ទប់ធ្វើការរបស់អ្នក។

4. ទំនាក់ទំនងត្រូវមានព្រំដែនជាក់លាក់៖

មិនមែនមានន័យថា អ្នកអាចសម្របបានទៅគ្រប់ស្ថានការដែលគេទម្លាក់មកកាន់អ្នកទេ។ រក្សាថាមពលក្នុងសង្គមរបស់អ្នកដោយការបដិសេធថា “ទេ” ចំពោះផែនការមួយចំនួនដែលចាំបាច់សម្រាប់អ្នក ឬជាផ្ទេរភារកិច្ចផ្សេងៗ។

5. ល្អចំពោះខ្លួនឯងឱ្យបានច្រើន៖

សូមកុំមានអារម្មណ៍ថាវាជាកំហុសនៅពេលដែលផ្តល់អាទិភាពដល់សុខុមាលភាពរបស់អ្នកមុនអ្វីៗគ្រប់យ៉ាង។សូមអ្នកចងចាំថា ខ្លួនឯងខ្លាំង និងមានសមត្ថភាពគ្រប់គ្រាន់ ទើបអាចបង្កើតគន្លឹះក្នុងការប្រយុទ្ធប្រឆាំងនឹងភាពនឿយហត់ក្នុងសង្គម។ សូមយកចិត្តទុកដាក់ទាំងសុខភាពផ្លូវចិត្ត និងសុខភាពផ្លូវកាយ។

ក្រោយពីការស្វែងយល់ដឹងអំពីលើសញ្ញាប៉ះពាល់នៃភាពហត់នឿយក្នុងការធ្វើទំនាក់ទំនងក្នុងសង្គមទាំងនេះ និងទទួលបាននូវដំណោះស្រាយក្នុងការរអនុវត្តការថែទាំខ្លួនឯង យើងធានាថាអ្នកនឹងទទួលអារម្មណ៍ថា បរិបទសង្គមរបស់អ្នកមានភាពរីករាយដ៏សម្បូរបែប ដោយមិនធ្វើឱ្យហត់នឿយខ្លាំង និងទទួលអារម្មណ៍បាត់បង់ចំណង់ចំណូលចិត្តឡើយ។