បុណ្យទន្លេ ៣ថ្ងៃ សៀមរាបស្រូបទាញភ្ញៀវទេសចរបានជាង ៥០ម៉ឺននាក់!

បុណ្យទន្លេលើកទី៨ រយៈពេល ៣ថ្ងៃនៅលើទឹកដីអង្គរបានបញ្ចប់ទៅហើយជាមួយនឹងការទាក់ទាញភ្ញៀវទេសចរមកកាន់ខេត្តសៀមរាបបានចំនួនជាង ៤០ម៉ឺននាក់។

តាមរបាយការណ៍មន្ទីរទេសចរណ៍ខេត្តសៀមរាប ពិធីបុណ្យទន្លេលើកទី៨នៅខេត្តសៀមរាប សរុបរយៈពេលបីថ្ងៃនៃបុណ្យទន្លេ ចាប់ពីថ្ងៃទី១៥-១៧ ខែមីនា ឆ្នាំ២០២៤ មានទេសចរសរុបប្រមាណ ៥៥៣.៧៩៤ នាក់ រួមមាន
– ទេសចរជាតិ ប្រមាណ ៥២០.០០០ នាក់ ក្នុងនោះបងប្អូនប្រជាពលរដ្ឋក្នុងខេត្តសៀមរាប ប្រមាណ ២៨១.០០០ នាក់
– ទេសចរបរទេស ប្រមាណ ៣៣.៧៧០ នាក់។

ចំនួនភ្ញៀវទេសចរនេះ មានបែងចែកទៅតាមថ្ងៃនីមួយៗទៀតដូចខាងក្រោម៖

ថ្ងៃទី១ នាថ្ងៃទី១៥ ខែមីនា ឆ្នាំ២០២៤
* ទេសចរសរុបប្រមាណ ១៦០.២៧២ នាក់ ក្នុងនោះ
-ទេសចរជាតិ ប្រមាណ ១៥០.០០០ នាក់ ក្នុងនោះបងប្អូនប្រជាពលរដ្ឋក្នុងខេត្តសៀមរាប ប្រមាណ ៦៥.០០០ នាក់
-ទេសចរបរទេស ប្រមាណ ១១.២៧២ នាក់។

– ថ្ងៃទី២ នាថ្ងៃទី១៦ ខែមីនា ឆ្នាំ២០២៤
* ទេសចរសរុបប្រមាណ ២៩៦.២៧៩ នាក់ ក្នុងនោះ
-ទេសចរជាតិ ប្រមាណ ២៨៥.០០០ នាក់ ក្នុងនោះបងប្អូនប្រជាពលរដ្ឋក្នុងខេត្តសៀមរាប ប្រមាណ ១៥៨.០០០ នាក់
-ទេសចរបរទេស ប្រមាណ ១១.២៥៥ នាក់។

-ថ្ងៃទី៣ នាថ្ងៃទី១៧ ខែមីនា ឆ្នាំ២០២៤
*ទេសចរសរុបប្រមាណ ៩៦.២៤៣ នាក់ ក្នុងនោះ
– ទេសចរជាតិ ប្រមាណ ៨៥.០០០ នាក់
ក្នុងនោះបងប្អូនប្រជាពលរដ្ឋក្នុងខេត្តសៀមរាប ប្រមាណ ៥៨.០០០ នាក់
– ទេសចរបរទេស ប្រមាណ ១១.២៤៣ នាក់។

សូមជម្រាបថា៖ ពិធីបុណ្យទន្លេ ធ្វើឡើងដើម្បីជំរុញកំណើនទេសចរណ៍តាមដងទន្លេកម្ពុជា ឱ្យក្លាយទៅជាគោលដៅទេសចរណ៍ប្រកបដោយឧត្តមភាព។ ពិធីបុណ្យនេះ មានការផ្សព្វផ្សាយអំពីប្រពៃណី វប្បធម៌ ប្រវត្តិសាស្ត្រ និងតំបន់រមណីយដ្ឋានធម្មជាតិតាមដងទន្លេ រួមទាំងការតាំងពិព័រណ៍ផលិតផលក្នុងស្រុក ដើម្បីទាក់ទាញទេសចរជាតិ និងអន្តរជាតិ។

មកដល់ឆ្នាំ២០២៤នេះ កម្ពុជាបានប្រារព្ធធ្វើពិធីបុណ្យទន្លេ ចំនួន៨លើកហើយ ដោយពិធីបុណ្យទន្លេលើកទី១ ធ្វើនៅទីរួមខេត្តក្រចេះ លើកទី២ ខេត្តកំពង់ចាម និងខេត្តត្បូងឃ្មុំ លើកទី៣ ខេត្តស្ទឹងត្រែង លើកទី៤ ខេត្តកណ្តាល លើកទី៥ ខេត្តកំពង់ឆ្នាំង លើកទី៦ នៅខេត្តបាត់ដំបង លើកទី៧ ខេត្តកំពង់ធំ និងលើកទី៨នេះនៅក្នុងខេត្តសៀមរាប។

តាមសម្ដេចបវរធិបតី ការរៀបចំធ្វើបុណ្យទន្លេនៅខេត្តសៀមរាប គឺដើម្បីទាញចំណាប់អារម្មណ៍ភ្ញៀវទេសចរឲ្យទៅទស្សនាខេត្តសៀមរាប អោយស្របគោលនយោបាយទេសចរណ៍របស់រាជរដ្ឋាភិបាល “២០២៤ ទស្សនាសៀមរាប”។

យ៉ាងណាសម្ដេចធិបតី បញ្ជាក់ថា នេះជាយុទ្ធនាការទាក់ទាញចំណាប់អារម្មណ៍ឲ្យងាកមកសៀមរាប តែមិនមែនតែឆ្នាំនេះទេ គឺគោលនយោបាយនេះ នឹងគិតគូរជារៀងរហូតបើទោះផុត ២០២៤ក៏ដោយ។ ក៏ដូចគ្នា គោលនយោបាយនេះ ក៏មិនរារាំងភ្ញៀវទេសចរទៅទស្សនាខេត្តផ្សេងៗរបស់កម្ពុជានោះដែរ៕