ខ្មែរ
English
ទីក្រុងភ្នំពេញនាពេលបច្ចុប្បន្នមានអភិវឌ្ឍន៍កាន់តែរីកចម្រើនពីមួយថ្ងៃទៅមួយថ្ងៃ ដោយមានការរចនាឡើងនូវអាគារទំនើបៗ ទីកន្លែងកំសាន្តស្អាតៗ ជាពិសេសបង្កប់ដោយទិដ្ឋភាពស្រស់ស្រាយ ត្រជាក់ភ្នែក និងសម្បូរបែបជូនប្រជាជនក្នុងការដើរលំហែអារម្មណ៍។ ទីកន្លែងកំសាន្តជាច្រើនបានលេចរូបរាងឡើងបន្តបណ្តាក់គ្នា ហាក់ដូចជាអន្ទងចិត្តប្រជាជនរស់នៅទីក្រុងភ្នំពេញទាំងអស់ ងាកមកចាប់អារម្មណ៍ចង់ចូលទស្សនាយ៉ាងខ្លាំង។
បើទោះបីជាពួកគេពុំមានពេលវេលាគ្រប់គ្រាន់សម្រាកលំហែនៅតាមរមណីយដ្ឋានតំបន់ខេត្តក៏ដោយ ទីកន្លែងកំសាន្តអារម្មណ៍ខាងក្រោមនេះអាចជាជម្រើសដ៏ល្អក្នុងការលំហែរចិត្ត ទទួលបានបរិយាកាសថ្មីៗ ព្រមទាំងទេសភាពទទួលបានអារម្មណ៍ពេញចិត្តជាទីបំផុតដែលទីក្រុងនៃព្រះរាជាណាចក្រកម្ពុជាមានការអភិឌ្ឍន៍ដោយមិននឹកស្មាន។
សួនច្បារកោះនរា – Norea Garden
សួនច្បារកោះនរា គឺជាទីកន្លែងលំហែថ្មីមួយដែលទើបលិចរូបរាងឡើងរយៈពេលក្រោយនេះ ប៉ុន្តែមានការចាប់អារម្មណ៍ជាច្រើនពីសំណាក់ប្រជាជនកម្ពុជា ដើម្បីទស្សនាខ្សែទឹកមាត់ទន្លេ អមជាមួយថ្ងៃលិចដ៏ស្រស់ស្អាត (រសៀលម៉ោង ៥)។ លើសពីនេះ នៅតំបន់កោះនរាក៍មានទីធ្លាធំ ដើម្បីឱ្យលោកអ្នកថ្មើរជើងដោយរីករាយផងដែរ។
សួនច្បារ Coconut Park
Coconut Park មានទីតាំងស្ថិតនៅក្នុងដែនដីកោះពេជ្រ។ ទីកន្លែងមួយនេះពោរពេញទៅដោយវាលស្មៅបៃតង អមដោយដើមឈើជាម្លប់ដ៏ត្រជាក់ល្ហឹម។ អ្នកអាចកំសាន្តជាពិចនិច ជួបជុំមិត្តនិយាយគ្នាបានដោយសប្បាយរីករាយ។ លើសពីនេះ នៅ Coconut Park តែងតែមានការតាំងពិពណ៌ជាប្រភេទផ្សាររាត្រីដូចគ្នា។
ផ្លូវបាសាក់ – Bassac Lane
បាសាក់ គឺជាតំបន់ផ្លូវលំតូចមួយដែលរុំព័ទ្ធទៅដោយភោជនីយដ្ឋានបរិយាកាសបែបអ៊ឺរ៉ុប អមដោយការតុបតែងតាមដងផ្លូវមើលទៅគួរឱ្យចាប់អារម្មណ៍ជាទីបំផុត។ ហាងនីមួយៗមានបរិវេណតូចល្មម និងការរៀបចំយ៉ាងស្រស់ស្អាតទាក់ចិត្តភ្ញៀវជាតិ និងអន្តជាតិឱ្យមានការចាប់អារម្មណ៍យ៉ាងខ្លាំង។
PH Euro Park – ភីអេច យូរ៉ូផាក
សួនកំសាន្តនេះមានទីតាំងស្ថិតនៅក្នុងបុរីប៉េងហួត បឹងស្នោ នាឯខណ្ឌច្បារអំពៅ។ សួន ភីអេច យូរ៉ូផាក មានរចនាបទ និងបរិយាកាសទំនោរទៅប៉ែកខាងអ៊ឺរ៉ុប ដើម្បីផ្តល់ឱ្យប្រជាជនខ្មែរនូវអារម្មណ៍ប្លែកមួយជាមួយនឹងវប្បធម៌ប៉ែកខាងលិចខ្លះៗ ដើម្បីផ្លាស់ប្តូរចំណីចក្ខុ។ ជាពិសេសនៅទីនោះ មានការសាងសង់អាគាររូបតំណាងនៃប្រទេសផ្សេងៗនៅក្នុងសួន ទុកជាទស្សនីយ៍ភាពកំសាន្តដ៏អស្ចារ្យ។
