ធនាគារ​ជាតិ​នៃ​កម្ពុជា​ បាន​បើក​សិក្ខាសាលា​ផ្សព្វផ្សាយ​សៀវភៅ “ដុល្លាររូបនីយកម្មនៅកម្ពុជា“

ធនាគារ​ជាតិ​នៃ​កម្ពុជា​ បាន​បើក​សិក្ខាសាលា​ផ្សព្វផ្សាយ​សៀវភៅ “ដុល្លាររូបនីយកម្មនៅកម្ពុជា៖ ទំនាក់ទំនងផ្នែកគោលនយោបាយក្នុងការអភិវឌ្ឍវិស័យហិរញ្ញវត្ថុសម្រាប់ប្រទេសអភិវឌ្ឍន៍តិចតួច (LDCs)” កាលពីព្រឹកថ្ងៃទី ១០ វិច្ឆិកា ​ឆ្នាំ២០២៣​ កន្លងទៅនេះ។ ​

សៀវភៅ “ដុល្លាររូបនីយកម្មនៅកម្ពុជា៖ ទំនាក់ទំនងផ្នែកគោលនយោបាយក្នុងការអភិវឌ្ឍវិស័យហិរញ្ញវត្ថុសម្រាប់ប្រទេសអភិវឌ្ឍន៍តិចតួច” នេះគឺជា​លទ្ធផលនៃកិច្ចសហការស្រាវជ្រាវរួមគ្នារវាង ធនាគារជាតិនៃកម្ពុជា និងវិទ្យាស្ថានស្រាវជ្រាវនៃទីភ្នាក់ងារសហប្រតិបត្តិការអន្តរជាតិជប៉ុន (JICA) ដោយប្រើប្រាស់ទិន្នន័យប្រមូលបានពីអង្គភាពគ្រួសារ សហគ្រាស និងគ្រឹះស្ថានហិរញ្ញវត្ថុទូទាំងប្រទេស។ ខ្លឹមសារនៃ​សៀវភៅនេះផ្តល់សារៈសំខាន់សម្រាប់ការសិក្សាស្វែងយល់អំពីដំណើរវិវត្តន៍និងស្ថានភាពបច្ចុប្បន្ននៃដុល្លារូបនីយកម្ម​​នៅកម្ពុជា ព្រមទាំងបង្ហាញគោលនយោបាយសំខាន់ៗដែលគាំទ្រកំណើនសេដ្ឋកិច្ច។

លោកជំទាវ ជាសិរី ទេសាភិបាល ធនាគារជាតិនៃកម្ពុជា បានមានប្រសាសន៍​ថា៖ “ដុល្លារូបនីយកម្មបានកើតឡើងក្នុងស្ថានភាពដែលជំនឿទុកចិត្តលើប្រាក់រៀលមានភាពទន់​ខ្សោយ ក្រោយ​ពី​សង្គ្រាមស៊ីវិលជិត ៣ ទសវត្សរ៍ និងការហូរចូលយ៉ាងច្រើនសន្ធឹកសន្ធាប់នៃប្រាក់ដុល្លារអាមេរិក ក្នុងពេលរៀបចំការបោះឆ្នោតសកលលើកដំបូងនៅកម្ពុជា ដោយអាជ្ញាធរបណ្តោះអាសន្ននៃអង្គការសហប្រជាជាតិប្រចាំកម្ពុជា ដែលហៅកាត់ថា UNTAC នៅដើមទសវត្សរ៍ឆ្នាំ ១៩៩០។ ជាការពិតដុល្លារូបនីយកម្មបានរួមចំណែកជួយស្តារសេដ្ឋកិច្ច និងអមដំណើរនៃការសម្រេចបានកំណើនសេដ្ឋកិច្ចខ្ពស់ជាមួយនឹងស្ថិរភាពម៉ាក្រូសេដ្ឋកិច្ចក្នុងរយៈពេលជាងពីរទសវត្សរ៍ចុងក្រោយនេះ។ ទោះយ៉ាងណា ដុល្លារូបនីយកម្ម​ខ្ពស់បានដាក់កំហិតលើការអនុវត្តនយោបាយរូបិយវត្ថុ”។ លោកជំទាវបានលើកឡើងផងដែរថា៖ “នៅពេលដែលទំហំសេដ្ឋកិច្ចកម្ពុជាកើនឡើងកាន់តែធំ ការខ្វះលទ្ធភាពប្រើប្រាស់នយោបាយរូបិយវត្ថុដោយពេញលេញ ក៏ធ្វើឱ្យសេដ្ឋកិច្ចកាន់តែងាយរងគ្រោះផងដែរ ហើយដែលបណ្តាលឱ្យពឹងផ្អែកតែទៅលើនយោបាយសារពើពន្ធ”។

លោក អ៊ិន ចាន់នី ប្រធាននាយកប្រតិបត្តិធនាការអេស៊ីលីដា ​បាន​បញ្ជាក់​ថា៖​ “ការ​បញ្ឈប់ការប្រើប្រាស់​ប្រាក់ដុល្លារ​ភ្លាមៗ​អាច​ប៉ះពាលដល់សេដ្ឋកិច្ចនាំ​ឲ្យកើតមាន​ឡើង​អតិផរណា។ លោក​ថា ការ​​ធ្វើ​បដិ​ដុល្លាររូបនីកម្ម​ដោយ​គំហុក​​ផ្តល់​ផល​ប៉ះពាល់​ច្រើន ​ទាំង​ស្ថាប័ន ​និង​អតិថិជន”។  លោកបានមានប្រសាសន៍បន្ថែមទៀតថា៖ “​ប៉ុន្មានឆ្នាំ​ចុងក្រោយនេះក៏​​​មានវិវឌ្ឍ​​ប្រែប្រួល​លើ​ការ​ប្រើប្រាស់​រូបិយវត្ថុ​ជាប្រាក់រៀល​នៅ​លើទីផ្សារ​ផងដែរ។ ​កាលពី​ឆ្នាំ ២០១៧ ឥណទាន​ជា​ដុល្លារ​គ្រប​ដណ្តប់​ ៩៨ ភាគរយ ខណៈ​នៅ​​ឆ្នាំ ២០២២ ឥណទាន​ប្រាក់ដុល្លារ​ធ្លាក់​ចុះ​នៅ ៨៩%។ ដោយឡែក​​ប្រាក់​បញ្ញើ​សន្សំ​​មាន​ ៩៣ ភាគរយ និង​ឆ្នាំ ២០២២ ​ប្រាក់​សន្សំ​ជា​ដុល្លារ​នៅ ៩០.៤% ដែល​នេះ​បង្ហាញ​ជា​សញ្ញាណ​ដ៏​ល្អ​មួយ”​។

លោកជំទាវ ជា សិរី ក៏​មើលឃើញការប្រែប្រួ​ល​លើ​ទំនុកចិត្ត​​ប្រាក់​រៀល​នៅលើទីផ្សារ​​ហិរញ្ញវត្ថុ​ក្នុង​រយៈពេល​ប៉ុន្មានឆ្នាំ​ចុងក្រោយ​នេះផងដែរ​។ លោកស្រី​ បញ្ជាក់បន្ថែម​ថា៖”សមាមាត្រ​នៃ​ការប្រើប្រាស់​ប្រាក់​រៀល​ក្នុង​រយៈពេល​ ២ ទសវត្សន៍​នេះ​បានកើន​​ពី ០,៨៥ ទ្រីលានរៀល​ ដល់ ១៤,៥ ទ្រីលានគឺ​កើនឡើង​ ១៦ ដង ដែល​នេះ​បង្ហាញ​សញ្ញាណផ្លាស់ប្តូរជាវិជ្ជមានសម្រាប់​ទំនុកចិត្ត​លើ​ការ​ប្រើប្រាស់​រូបិយវត្ថុ​ជាតិ​​​”។

សៀវភៅដុល្លារូបនីយកម្មនៅកម្ពុជាបានរំលេចអំពីប្រវត្តិដុល្លារូបនីយកម្មនៅកម្ពុជា និងទិដ្ឋភាពម៉ាក្រូសេដ្ឋកិច្ច ព្រមទាំងមានអត្ថបទវិភាគស៊ីជម្រៅ អំពីឥទ្ធិពល​នៃចរាចរណ៍ប្រាក់ដុល្លារ នៅក្នុងសកម្មភាពសេដ្ឋកិច្ច និងប្រព័ន្ធទូទាត់ «បាគង» ដែលជួយបង្កើនការប្រើប្រាស់ប្រាក់រៀល ហើយវានឹង​ក្លាយជាករណីសិក្សាដ៏សំខាន់សម្រាប់ប្រទេសកំពុងអភិវឌ្ឍ ហើយប្រព័ន្ធទូទាត់ បាគង ដែលជាគំរូសម្រាប់កាត់បន្ថយចរាចរណ៍ប្រាក់ដុល្លារ។ បន្ថែមលើនេះ ធនាគារជាតិនៃកម្ពុជា ក៏បង្ហាញគម្រោងដាក់ឲ្យអនុវត្តសេវាកម្មហិរញ្ញវត្ថុថ្មីៗ ដើម្បីជំរុញសាធារណជនឱ្យប្រើប្រាស់ប្រាក់រៀលកាន់តែទូលំទូលាយផងដែរ៕