មកស្វែងយល់ពី អត្ថប្រយោជន៍របស់ “ប្រេងដូង” ចំពោះសុខភាពស្បែករបស់យើង

តើប្រេងដូងជាអ្វី?

ប្រេងដូង គឺជាប្រេងដែលចម្រាញ់ចេញពីសាច់ដូង ឬខឺណែលនៃដូង។ វាមានសារធាតុខ្លាញ់ខ្ពស់ ហើយគេបានយកប្រេងដូងទៅប្រើប្រាស់ជាធាតុផ្សំរួមមាន៖ ការចម្អិនអាហារ គ្រឿងសំអាងស្រ្តីនិងផលិតផលឧស្សាហកម្មជាច្រើនមុខទៀត។

ប្រេងដូង ជាសារធាតុរាវម្យ៉ាងដែលត្រូវបានគេប្រើជាញឹកញាប់នៅក្នុងផលិតផលថែរក្សាស្បែក ហើយទទួលបានប្រសិទ្ធភាពខ្ពស់ជាទីគាប់ចិត្ត

ប្រេងដូងត្រូវបានគេប្រើជាញឹកញាប់នៅក្នុងផលិតផលថែរក្សាស្បែក។ ខ្លាញ់នៃប្រេងដូង និងអាស៊ីតអាមីណូសំខាន់ៗនៅក្នុងប្រេងដូង បានជួយឱ្យរបាំងការពារស្បែករបស់យើងនៅតែរឹងមាំ ធ្វើឲ្យស្បែកមានសំណើម និងព្យាបាលនូវបញ្ហាស្បែកផ្សេងៗទៀត រួមមាន “ព្យាបាលស្លាកស្នាម ព្យាបាលមុន បញ្ហារលាកស្បែក និងស្បែកស្ងួតខ្លាំង”។

សូមអានអត្ថបទខាងក្រោម ដើម្បីទទួលបានចំណេះបន្ថែមអំពីគុណប្រយោជន៍នៃប្រេងដូងចំពោះសុខភាពស្បែករបស់អ្នក ៖

១. ប្រឆាំងការឆ្លងមេរោគលើស្បែក ៖

អាស៊ីតខ្លាញ់ដែលប្រេងដូងមានគឺ ជាប្រភេទអាស៊ីត Lauric និង Capric សារធាតុទាំងពីរនេះ មានសារៈសំខាន់ណាស់ក្នុងការរក្សាស្បែកឱ្យមានសុខភាពល្អ ព្រោះវាមានផ្ទុកនូវលក្ខណៈសម្បត្តិប្រឆាំងនឹងមេរោគ ក៍ដូចជាសម្លាប់មីក្រូសរីរាង្គដែលបង្កគ្រោះថ្នាក់លើស្បែក។

២. ល្អសម្រាប់ស្បែកស្ងួត និងផ្តល់សំណើមខ្ពស់ ៖

ប្រេងដូងត្រូវបានគេរកឃើញថា ជាសារធាតុផ្តល់សំណើមជាតិទឹកដ៏មានប្រសិទ្ធភាពខ្ពស់សម្រាប់ស្បែកស្ងួត។ អ្នកអាចប្រើប្រាស់វាដោយ ការលាបផ្ទាល់នៅលើស្បែកដើម្បីទទួលបានប្រសិទ្ធភាពទ្វេដង។

៣. ជំនួយការព្យាបាលស្បែកមុន ៖

លក្ខណៈសម្បត្តិប្រឆាំងនឹងការរលាកពីកម្តៅថ្ងៃ ឬការប្រតិកម្មជាមួយផលិតផលផ្សេងៗ ទាំងនោះ គឺជាកត្តាធ្វើឱ្យស្បែកមុខ និងស្បែកដងខ្លួនមានការឡើងមុន រោលរមាស់ និងក្រហាយ ប៉ុន្តែសូមកុំបារម្ភ ប្រេងដូងមានសមត្ថភាពជួយព្យាបាលបញ្ហាទាំងនោះបានល្អបំផុត។ មិនត្រឹមតែប៉ុណ្ណឹងទេ ទាំងអាស៊ីត Lauric និង Capric ដែលមាននៅក្នុងប្រេងដូង ត្រូវបានគេបង្ហាញថា មានសមត្ថភាពសម្លាប់បាក់តេរីមុននៅលើស្បែកថែមទៀត។

៤. មានប្រសិទ្ធភាពទៅលើបញ្ហារលាក ៖

អត្ថប្រយោជន៍មួយទៀតនៃប្រេងដូងសម្រាប់ស្បែកគឺថា វាអាចជួយបន្ថយការរលាកតាមរយៈការប្រឆាំងអុកស៊ីតកម្ម។ សារធាតុប្រឆាំងអុកស៊ីដកម្មបានជួយប្រឆាំងនឹងរ៉ាឌីកាល់សេរី (អាតូមមិនស្ថិតស្ថេរដែលភ្ជាប់នឹងស្បែករបស់យើង) បានបង្កឲ្យមានការរលាកកើតឡើង។

៥. រួមចំណែកធ្វើឱ្យស្បែកភ្លឺម៉ត់ស្មើ ៖

អត្ថប្រយោជន៍បន្ថែមនៅក្នុងប្រេងដូងចំពោះស្បែក ត្រូវបានគេទទួលស្គាល់ថា អាចជួយកាត់បន្ថយស្នាមអុជខ្មៅ បំបាត់ស្បែកក្រហម និងជួយជួសជុលស្បែកឲ្យមានសភាពភ្លឺម៉ត់ស្មើគ្នា។

៦. ជួយកាត់បន្ថយសញ្ញានៃភាពចាស់នៃស្បែក ៖

អត្ថប្រយោជន៍មួយនៃប្រេងដូងសម្រាប់ស្បែកគឺថា វាជួយបង្កើនការផលិតកូឡាជែនធម្មជាតិ។ ប្រេងដូងធម្មជាតិជាប្រភពនៃវីតាមីន E និងសមាសធាតុ Polyphenolic ដែលដើរតួនាទីសំខាន់ប្រឆាំងអុកស៊ីតកម្មក្នុងការទប់ស្កាត់ផលប៉ះពាល់នៃរ៉ាឌីកាល់សេរី ដែលធ្វើឲ្យស្បែកឆាប់ចាស់ មានស្នាមជ្រួញ ឬស្នាមជាំ។