ណែនាំវីតាមីន ១០​ មុខ ល្អបំផុតសម្រាប់ស្ត្រីគ្រប់រូប

អាហារហូបចុកប្រចាំថ្ងៃ ពិតជាសំខាន់ណាស់សម្រាប់ស្ត្រីគ្រប់រូប។ អាហារដើរតួនាទីសំខាន់ក្នុងការទ្រទ្រង់សារពាង្គកាយទាំងមូល ហើយវាក៏អាចបំផ្លាញសារពាង្គកាយអ្នកបានដូចគ្នា ​​ប្រសិនបើអ្នកបរិភោគចំណីចំណុកដែលគ្មានសារធាតុចិញ្ចឹម និងផ្ទុកនូវផលប៉ះពាល់ច្រើនលើសលប់ពេក។

អាហារដែលល្អសម្រាប់សុខភាពស្រ្តី គឺជាអាហារដែលមានផ្ទុកវីតាមីនច្រើន ដើម្បីប្រយុទ្ធប្រឆាំងនឹងភាពចុះក្រោយរបស់ស្រ្តី។

វាពិតជាសំខាន់ក្នុងការទទួលទានរបបអាហារវីតាមីន ព្រោះវីតាមីនទាំងនោះបានផ្តល់នូវសារធាតុចិញ្ចឹម និងផ្គត់ផ្គង់រាងកាយឱ្យបានគ្រប់គ្រាន់ ម៉្យាងវាក៏ជាចូលរួមជាចំណែកក្នុងការថែរក្សាសម្រស់ស្រ្តីឱ្យនៅក្មេងជាងវ័យដូចគ្នា។

តាមការស្រាវជ្រាវកន្លងមក ឡេឌីស៍ សូមលើកបង្ហាញថា ខាងក្រោមនេះ គឺជាវីតាមីនទាំង១០​មុខ ដែលដើរតួសំខាន់ចំពោះស្រ្តីគ្រប់រូបក្នុងការទទួលទាន ដើម្បីក្លាយជាស្រ្តីម្នាក់ប្រកបដោយសុខភាពល្អប្រពៃ និងមានសម្រស់ដ៏ផូរផង់គួរជាទីទាក់ទាញចិត្ត។

1.វីតាមីន A

វីតាមីន A ផ្ទុក Antioxidant ដែលស្រ្តីគ្រប់រូបត្រូវការជាចាំបាច់ដើម្បីជួយសាងសង់ និងទ្រទ្រង់ឆ្អឹង ធ្មេញ ស្បែក និងភ្នាសរំអិល។ វីតាមីន A ក៏ជួយកាត់បន្ថយឱកាសនៃការកើតជំងឺរលាកសន្លាក់រ៉ាំរ៉ៃ។ អាហារដែលសម្បូរវីតាមីន A មានដូចជា ផ្លែការ៉ុត ល្ពៅ ត្រសក់ ប៉េងប៉ោះ ត្របែក​ ឪឡឹក ល្ហុង ស៊ុត ខាត់ណាខៀវ ទឹកដោះគោ និងប្រភេទគ្រាប់ធុញ្ញជាតិជាដើម។

2.វីតាមីន B2

វីតាមីន B2 ជួយឱ្យរាងកាយលូតលាស់បានល្អប្រកបដោយសុខភាពរឹងមាំ ជាពិសេសផ្តល់ថាមពលដល់រាងកាយ និងពង្រឹងប្រព័ន្ធភាពស៊ាំ បន្ថយភាពហត់នឿយ ធុញថប់ ស្ពឹកស្រពន់ជាដើម។

វត្តមានរបស់វីតាមីន B2 ជួយការពារមិនឱ្យកើតមានបញ្ហា​ប្រេះបែកបបូរមាត់ សក់ស្ងួត​ ស្បែកជ្រួញ និងរមាស់ស្បែកដោយកត្តាណាមួយ។ ប្រភេទអាហារដែលផ្ទុកវីតាមីនប្រភេទនេះមានដូចជា ឈីស (Cheese) ទឹកដោះគោ បន្លែបៃតង សណ្តែកបាយ គ្រាប់អាល់ម៉ុន (Almond) និងផ្សិត។

3.វីតាមីន B6

បន្ថែមការចងចាំ កាត់បន្ថយជំងឺបេះដូង ការពារជំងឺខ្វះឈាម អស់កម្លាំង ជំនួយខួរក្បាល សម្រួលដល់កម្រិតជាតិស្ករក្នុងឈា​ម បន្ថយអាការចាញ់កូន។ សាច់ ត្រី ផ្លែប៊័រ ផ្លែចេក និង សណ្តែកគឺជាអាហារដែលមានផ្ទុកវីតាមីនប្រភេទនេះច្រើនជាងគេ។

4.វីតាមីន B7

វីតាមីនប្រភេទនេះត្រូវបានគេរាប់បញ្ចូលជាវីតាមីនបង្កើនភាពលូតលាស់កោសិកាស្បែក និងការសំយោគរបស់អាស៊ីតខ្លាញ់។ វាជួយរក្សាសំណើមឱ្យសរសៃសក់ និងជំនួយការលូតលាស់នៃសក់ ព្យាបាលបញ្ហាក្រចកឆាប់បាក់។ វីតាមីន B7 ក៏ជាតម្រូវសម្រាប់ការលូតលាស់នៃឆ្អឹង និងគ្រប់គ្រងកូឡេស្តេរ៉ូលផងដែរ​​។

អាហារដែលផ្ទុកនូវវីតាមីនមានដូចជា ត្រី ដំឡូងជ្វា អាល់ម៉ុន ការ៉ុត ចេក ផ្លែឈើពណ៌លឿង បន្លែបៃតង សណ្តែក ទឹកដោះគោ យ៉ាអ៊ួរ និងម្ទេស…។​

5.វីតាមីន B9

វាដើរតួសំខាន់ណាស់សម្រាប់ស្ត្រី ព្រោះវាអាចជួយការពារជំងឺបេះដូងសំពាធឈាមឡើងខ្ពស់  (Alzheimer) ជំងឺមហារីក អស់កម្លាំង និងការចងចាំចុះខ្សោយ។ ក្រៅពីនោះ វីតាមីននេះក៏ជួយដល់សុខភាពខួរក្បាល ព្រមទាំងជួយការលូតលាស់ទារកនៅក្នុងផ្ទៃម្តាយ។ វីតាមីន B9 មាននៅក្នុងអាហារមួយចំនួនដូចជា បន្លែបៃតង ទឹកក្រូច ត្រសក់ស្រូវ ស្ត្រូប៊ឺរី ស៊ុត…។​

6.វីតាមីន B12

វាមានសារសំខាន់ក្នុងការជួយបំលែងអាហារសំយោគប្រូតេអ៊ីន​ ជួយដល់បេះដូងនិងខួរក្បាលមិនឱ្យកើតបញ្ហាខ្វះឈាម។ វីតាមីនប្រភេទអាចនៅក្នុងអាហារ ត្រី សាច់ ទឹកដោះគោ យ៉ាអ៊ួរ…។

7.វីតាមីន E

សំខាន់សម្រាប់ស្បែក និងសក់។ វាមានផ្ទុកនៅក្នុងប្រភេទអាហារដូចជា ស្ពៃ ប្រេងពោត ប្រេងអូលីវ គ្រាប់ផ្កាឈូករ័ត្ន ស៊ុត និងត្រសក់…។

8.វីតាមីន C

ជួយបន្ថយឱកាសនៃការកើតជំងឺមហារីក ជួយបង្កើតកោសិកាឈាមក្រហម ពង្រឹងប្រព័ន្ធការពារ បង្កើតសមត្ថភាពក្នុងការព្យាបាលរាងកាយ។ វាផ្ទុកនៅក្នុងប្រភេទ ខាត់ណាខៀវ ក្រូចថ្លុង គីវី ក្រូច ត្របែក​ ដំឡូងបារាំង ប៉េងប៉ោះ…។

9.វីតាមីន D

គឺជាភ្នាក់ងារបឺតស្រូបកាល់ស្យូម ដែលដើរតួយ៉ាងសំខាន់ក្នុងការជួយពង្រឹងឆ្អឹងឱ្យរឹងមាំ។ ក្នុងនោះមានដូចជា ខ្លាញ់ត្រី ទឹកដោះគោ និងស៊ុត សុទ្ធតែជាប្រភេទដែលផ្ទុកវីតាមីន D។

1០.វីតាមីន K

វីតាមីននេះក៏រួមជាចំណែកក្នុងការសម្រួលចរន្តឈាម បន្ថយឱកាសកើតជំងឺបេះដូង​ និងជួយទ្រទ្រង់ប្រព័ន្ធសារពាង្គកាយ។ វាសម្បូរនៅក្នុងប្រភេទអាហារដូចជា ស្ពៃក្តោប ត្រសក់ ម្ទេស ចេក ប៉េងប៉ោះ ប្រេងសណ្តែក និងខ្លាញ់ត្រី…។

នៅពេលដែលរាងកាយអ្នកទទួលបាននូវវីតាមីនទាំង១០ នេះគ្រប់គ្រាន់ អ្នកនឹងរស់នៅប្រកបដោយសុខភាពល្អ រឹងមាំ មិនងាយឈឺថ្កាត់​ និងមានសម្រស់ស្រស់ស្អាត ហើយថែមទាំងសាច់ចាំ ក្មេងជាងវ័យទៀតផង។