ក្រោយ​ឈ្នះ​ពាន​លើ​ទឹកដីថៃ ល្អហួស ដាក់​១ឃ្លា​រឹត​តែ​ចាក់បេះដូង​ជនជាតិខ្មែរ

ដូចការ​រំពឹង​ទុក ជូរី ល្អហួស កូន​ស្រី​របស់ ដេននី ក្វាន់ បាន​បង្កើត​មោទកភាព​ដល់​ជនរួមជាតិខ្មែរ​ទាំង​ក្នុង និង​ក្រៅ​នគរនៅ​យប់​មិញ​លើទឹកដីថៃ ស្រប​ពេល​សាមីខ្លួន​បាន​ពោល​ពាក្យ​មួយ​ឃ្លា ធ្វើ​ឲ្យ​កាន់តែរំជួល​ដល់​បេះដូង​ខ្មែរ។

ស័ក្តិសម ត្រឹមត្រូវ ដូច​នឹង​ឈ្មោះ “ល្អហួស” កុមារី ជូរី ល្អហួស គឺ​មាន​ចំណុច​ល្អ​ទាំង​ព្រម ទាំង​រូបសម្បត្តិ ចរិយាមាយាទ ទេពកោសល្យ និង​ចំណេះដឹងទូលំទូលាយ​បើ​ទោះ​នាង​នៅ​វ័យ​ក្មេង​ខ្ចី​ក៏​ដោយ។ ទាំង​នេះ ជា​សក្ដានុពល​ដែល​នាំ​ឲ្យ​មាន​ការ​រំពឹង​ទុក​ខ្ពស់​សម្រាប់​ការ​ប្រកួត​ក្នុង​កម្មវិធី Miss Pre Teen Junior Idol World 2024 របស់​ពលរដ្ឋខ្មែរ​គ្រប់​រូប។

 

ពេលវេលា​ជាក់ស្ដែង​នៅ​យប់​មិញ​នេះ ល្អហួស ពិត​ជា​ធ្វើ​បាន​ល្អខ្លាំង ពេល​​បង្ហាញ​ខ្លួន​ជាមួយភាពជឿជាក់ និង​មាន​ភាពលេចធ្លោ​ក្នុង​ចំណោប​បេក្ខភាព​ទាំងអស់។ ជា​លទ្ធផល នាង​ពិត​ជា​ធ្វើ​បាន​មែន គឺ​នាង​បាន​ដណ្ដើម​យក​ជយលាភី Miss Pre Teen Junior Idol World 2024 បាន​សម្រេច ដូច​ដែល​នាង​បានសច្ចា និង​សន្យា​ម្ដង​ហើយ​ម្ដង​ទៀតថា នាង​នឹង​យក​ជ័យលាភី​មក​កាន់​ប្រទេស​កំណើត​នាង​ឲ្យ​ទាល់​តែ​បាន។

ល្អហួស បាន​សរសេរ​លើ​ហ្វេសប៊ុក​របស់​នាង ថ្លែង​អំណរគុណ​បង​ប្អូន ពូមីង ដែល​គាំទ្រ​រូប​នាង ក្នុង​នោះ​សារ​ខ្លី​មួយ បាន​ចាក់បេះដូង​ជន​រួម​ជាតិ​ជា​ថ្មី។ នាងសរសេរ​ថា “ កូនស្រីកម្ពុជា យកភាពជោគជ័យជូនមាតុភូមិតាមដែលនាងខ្ញុំសន្យាបានហើយ!”។

 

សារ​ដ៏​ខ្លី​ តែ​ន័យ​សែន​ស៊ីជម្រៅ​នេះ បាន​ធ្វើ​ឲ្យ​បេះដូង​របស់​បង​ប្អូន​ជនរួម​ជាតិ​កក្រើក​រញ្ជួយ​ជា​ថ្មី។ ពួក​គេ​បាន​ចូល​ទៅ​សរសេរ​សារ បង្ហាញ​ពី​មោទកភាព​របស់​ពួកគេ​ចំពោះ ល្អហួស រាប់ម៉ឺននាក់ ត្រឹម​តែ​ប៉ុន្មាន​ម៉ោង​ប៉ុណ្ណោះ។

គិត​ត្រឹម​ពេល​នេះ ជូរី ល្អហួស ទើប​មាន​អាយុ ១៥ឆ្នាំ តែ​ឆ្លងកាត់​យប់​មិញ នាង​បាន​សម្រេច​សមិទ្ធផល​យ៉ាង​ធំ​ជូន​ជាតិ​មាតុភូមិ​របស់​នាង ដែល​ជា​រឿង​យ៉ាង​កម្រ ក្នុង​វិស័យ​បវរកញ្ញា។

 

ក្រៅ​ពី​ ល្អហួស ក៏​មាន​កុមារី​កម្ពុជា ២នាក់​ទៀត​ក៏​ធ្វើ​បាន​ល្អដែរ​នៅ​ក្នុង​កម្មវិធី​តែ​មួយ​ ក្នុង​នោះ​មាន ជា អមរាសូហ្វី 2nd Runner Up Little Miss Junior Idol World 2024 និង យិត អេលីស 2nd Runner Up Miss Teen Junior Idol World 2024។ កុមារី​ទាំង​៣ បាន​ផ្ដល់​មោទកភាព​ថ្មី​នៅ​ការ​ចាប់​ផ្ដើម​ខែ​ថ្មី គឺ​ថ្ងៃ​ទី១ មេសា ២០២៤៕