ប្រព័ន្ធបញ្ជរតែមួយជាតិ នឹងជំរុញកំណើនសេដ្ឋកិច្ច តាមរយៈប្រព័ន្ធឌីជីថលនៅកម្ពុជា

ប្រព័ន្ធបញ្ជរតែមួយជាតិ ត្រូវបានប្រកាសដាក់ឱ្យអនុវត្តជាផ្លូវការ នៅព្រឹកថ្ងៃទី ០៧ ខែឧសភា ឆ្នាំ២០២៤ ដោយមានការអញ្ជើញជាអធិបតីភាព សម្តេចធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា។ ការបង្កើតឡើងនូវប្រព័ន្ធបញ្ជរតែមួយជាតិ នេះ ដើម្បីជួយសម្រួលដល់ការធ្វើពាណិជ្ជកម្មនៅកម្ពុជា ដោយផ្លាស់ប្ដូររបៀបរបបការងារ ពីការពឹងផ្អែកលើក្រដាស (Paper-based) ទៅជាការមិនប្រើក្រដាស (Paperless)»។

 “ប្រព័ន្ធបញ្ជរតែមួយជាតិ” គឺពាក់ព័ន្ធ​នឹ​ងការ​​ចេញ​អាជ្ញាប័ណ្ណ, វិញ្ញាបនបត្រ, លិខិតអនុញ្ញាត និង​ឯកសារផ្សេងទៀត ក្នុងទម្រង់អេឡិកត្រូនិក សម្រាប់ទំនិញនាំចេញ-នាំចូល ដែលស្ថិត​ក្នុងបញ្ជីទំនិញហាមឃាត់ និងទំនិញជាប់កម្រិតកំណត់ ព្រមទាំង​​ ទំនិញដែល​ទទួល​បានការលើកលែងពន្ធនិងអាករស្របតាមច្បាប់ និងបទប្បញ្ញត្តិជាធរមាន ។

 “គម្រោង​​បញ្ជរតែ​មួយ​ជាតិ ដំណាក់កាល​ទី ៣” ​ បានពង្រីក​វិសាលភាពទៅក្រសួង-ស្ថាប័នចំនួន ១៦ ដែលបានចូលរួម ។ ទន្ទឹមនេះ “ប្រព័ន្ធបញ្ជរតែមួយជាតិ” ក៏បានបន្ថែមមុខងារថ្មីចំនួន ៤ រួមមាន មុខងារគ្រប់គ្រងហានិភ័យ, មុខងារនិហិតដ្ឋានឯកសារពាណិជ្ជកម្ម, មុខងារប្រតិបត្ដិករសេដ្ឋកិច្ច​បានទទួលការអនុញ្ញាត និងមុខងារគ្រប់គ្រងគណនីប្រើប្រាស់តែមួយ ។

ដើម្បីផ្តល់ភាពងាយស្រួល​ការធ្វើពាណិជ្ជកម្មនៅកម្ពុជា រាជរដ្ឋាភិបាលបានផ្តួចផ្តើមអោយមានប្រព័ន្ធបញ្ជរតែមួយជាតិនេះឡើងដើម្បីមានភាពងាយស្រួលទៅដល់ អ្នកវិនិយោគ ក្នុងការរៀបចំឯកសារពាក់ព័ន្ធតាមរយៈប្រព័ន្ធឌីជីថល ដោយប្រើរយៈខ្លី និងមានភាពល្អប្រសើរជាងមុន។ ការបើកប្រព័ន្ធបញ្ជរជាតិតែមួយនេះ គឺដោយអនុលោមតាមអនុសាសន៍ របស់មជ្ឃមណ្ឌលនៃអង្គការសហប្រជាជាតិ សម្រាប់កិច្ចសម្រួលពាណិជ្ជកម្ម និង ធុរកិច្ចតាមប្រព័ន្ធអេឡិចត្រូនិក , កិច្ចព្រមព្រៀងស្តីពីការបង្កើត និងអនុវត្តបញ្ជតែមួយអាស៊ាន , កិច្ចព្រមព្រៀងស្តីពីកិច្ចសម្រួលពាណិជ្ជកម្ម របស់អង្គការពាណិជ្ជកម្មពិភពលោក និង រួមទាំងឯកសារគោលសម្រាប់បញ្ជរតែមួយជាតិកម្ពុជា។

ប្រព័ន្ធបញ្ជរតែមួយជាតិ បានផ្តល់អត្ថប្រយោជន៍រួមលើកការផ្តល់ និងទទួលសេវាសាធារណប្រកបដោយ ប្រសិទ្ធភាព សក្តិសិទ្ធភាព តម្លាភាព ចំណេញពេលវេលា និង ចំណេញថវិកា។ ចំពោះអត្ថប្រយោជន៍សម្រាប់ស្ថាប័នក្រសួង រួមមាន ៖ ប្រសិទ្ធភាពការងារស្របតាមច្បាប់និងបទប្បញ្ញត្តិ , ប្រើប្រាស់ធនធានកាន់តែមានប្រសិទ្ធភាព , ទទួលបានទិន្នន័យពាណិជ្ជកម្មត្រឹមត្រូវ និងទាន់ពេលវេលា ,និង កើនឡើងចូលចំណូលថវិកាជាតិ។ ចំណែកអត្ថប្រយោជន៍សម្រាប់វិស័យឯកជន និងភាគីពាក់ព័ន្ធ រួមមាន៖ ចំណេញពេលវេលា និងថវិកា , បង្កើនការវិនិយោគ , មានតម្លាភាព , និងកាត់បន្ថយការិយាល័យធិបតេយ្យក្នុងការស្នើសុំឯកសារផ្សេងៗ។

ប្រព័ន្ធបញ្ជរតែមួយជាតិ អាចចាត់ទុកបានថា ជាជោគជ័យរួមគ្នា គឺសមិទ្ធផលរួមគ្នា របស់ក្រសួង-ស្ថាប័ន នៃរាជរដ្ឋាភិបាល ក្នុងការអនុវត្តការងារ តាមអភិក្រម ចីរភាព នៃប្រព័ន្ធតួអង្គ ទាំងមូល ការធ្វើការរួមគ្នា ប្រកបដោយជោគជ័យ ក៏បានហុចផលដល់វិស័យឯកជន នឹងទទួលបានផលប្រយោជន៍ ជាច្រើនពីប្រព័ន្ធបញ្ជរតែមួយជាតិ ដូចជា ៖ ចំណេញពេល កាត់បន្ថយការចំណាយ ដោយមិនចាំបាច់ រត់ការពីក្រសួង-ស្ថាប័នមួយទៅក្រសួង ស្ថាប័នមួយទៀតនោះទេ»៕